aql se kaam kar — Hafiz Karnataki

"ye mahakte hue jazbaat ye ashaar ke phuul kaash kaam aaein kisi ke mere afkaar ke phuul mere dil ne jo sajaa rakhe hain zakhmon ki tarah khil na paae kisi gulshan mein vo meaar ke phuul sunghti hain unhein khush ho ke bahishti hurein sarfaroshon ke badan par hain jo talvaar ke phuul ye mere ashk-e-nadaamat hain khudaa ko mahbub duniyaa vaalon ki nigaahon mein hain be-kaar ke phuul mujh ko tohfe mein ataa us ne kiye hain 'haafiz' kabhi inkaar ke kaanTe kabhi iqraar ke phuul"

"ham ne tiri talab ko tamanna banaa liyaa paDh paDh ke teraa naam vazifa banaa liyaa hamvaar kar li pahle tire dil ki sarzamin aur phir yahaan pe apnaa Thikaana banaa liyaa jis ke kinaare baiTh ke kartaa thaa tum se baat main ne to us nadi se bhi rishta banaa liyaa ham to hamaare dil ko na apnaa banaa sake lekin banaane vaalon ne kyaa kyaa banaa liyaa har saans pe hai maut kaa dhaDkaa lagaa huaa qaatil ko zindagi ne masihaa banaa liyaa ham shaatiron ke shahr mein be-mol bik gae ham ko siyaasi logon ne mohraa banaa liyaa khushbu se roz khat likhaa 'haafiz' havaa ke naam patton ko moD de ke lifaafa banaa liyaa"

"ham ne sikhaa hai mohabbat karnaa ek ik dil pe hukumat karnaa ham bhi taarikh badal sakte hain shart hai himmat-o-jurat karnaa zeb detaa nahin insaanon ko kisi insaan ki ibaadat karnaa rakh ke khud apni zarurat ko udhaar puuri auron ki zarurat karnaa shab ki taariki mein sikhaa ham ne chaand taaron ki tilaavat karnaa aakhiri saans talak jivan ki mard ki shaan hai mehnat karnaa farz se haj ke hai afzal 'haafiz' buDhe maan baap ki khidmat karnaa"

"miri vafaa ki vo pahchaan bhi nahin rakhte sila to duur hai ehsaan bhi nahin rakhte vo barkaton ke farishton ke intizaar mein hain gharon mein apne jo quraan bhi nahin rakhte jinhein khulus ki khushbu aziiz hoti hai vo apni mez pe gul-daan bhi nahin rakhte vo haadson se Daraate hain apne bachchon ko diyon ke saamne tufaan bhi nahin rakhte baDe ajiib musaafir hain ham bhi ai 'haafiz' safar pe nikle hain saamaan bhi nahin rakhte"

"ye raaz koi jaanne vaalaa bhi nahin hai suraj ki viraasat mein ujaalaa bhi nahin hai sau raste kamaane ke nazar aate hain lekin khaane ke liye ek nivaala bhi nahin hai lab naam tiraa lene se katraane lage hain haalaanki tujhe dil se nikaalaa bhi nahin hai kyon surkh huaa hai ye falak aaj sar-e-shaam main ne to lahu apnaa uchhaalaa bhi nahin hai vo lafz huun main jo na adaa ho sakaa 'haafiz' vo baat huun main jis kaa havaala bhi nahin hai"

"aankh ke taare TuuT gae khvaab hamaare TuuT gae kal maujon mein jang hui aur kinaare TuuT gae qatra qatra barf banaa aur favvaare TuuT gae meri palkon se gir ke aansu saare TuuT gae 'haafiz' vaqt buraa aayaa dekho saare TuuT gae"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"jab tak mizaaj-e-dost mein kuchh barhami rahi goyaa bujhi bujhi si miri zindagi rahi jis par nigaah-e-lutf-e-karam aap ki rahi hairat se har nigaah use dekhti rahi go main rahaa kashaakash-e-dauraan se ham-kanaar lekin mire labon pe hansi khelti rahi laayaa hai ishq ne mujhe aise maqaam par khud-aagahi rahi na khudaa-aagahi rahi josh-e-junun ne manzil-e-maqsud paa liyaa aql-e-salim dekhti hi dekhti rahi sab kuchh mujhe 'khayaal' ki duniyaa mein mil gayaa lekin tumhaare husn-e-nazar ki kami rahi"

"aaina toD de rihaa kar de bevafaa ik yahi vafaa kar de rishta-e-dard toD de dil se rang ko phuul se judaa kar de zindagi-bhar tujhi ko chaahaa hai qarz kuchh to miraa adaa kar de de rahaa hai zakaat-e-husn agar mire haq se zaraa baDhaa kar de muddatein ho gaiin tujhe dekhe ab to milne kaa silsila kar de phir koi gul khile sar-e-mizhgaan phir dar-e-khvaab koi vaa kar de ik sitaare ko bakhsh kar mire khvaab phir use meraa aaina kar de baiThtaa jaa rahaa hai jaan kaa ghubaar ab use mujh se maavaraa kar de ai faqir-e-dayaar-e-laili-jaan mire haq mein bhi kuchh duaa kar de"