ashkon mein aaj phir se nahaae hue hain ham — Kashif Shakeel

"hijrat ne yuun kiyaa hai mujhe meri maan se duur yuun lag rahaa hai jaise huun main jism-o-jaan se duur ruh-o-badan kaa rishta makin-o-makaan kaa hai matlab hai maut kaa ki makin hai makaan se duur baanhein chhuDaa ke jab vo gayaa mere paas se mujh ko lagaa ki main huaa daarul-amaan se duur jaao kahin bhi maut tumhein aaegi zarur jaanaa hai ek roz sabhi ko yahaan se duur alfaaz bhi hain tiir zabaan bhi hai ik kamaan be-soche-samjhe tiir na karnaa kamaan se duur patjhaD mein jis shajar se vo guzraa to yuun huaa aai bahaar ho gae patte khizaan se duur 'kaashif' bahut hi soch ke ham ne kiyaa hai ishq sud-o-ziyaan se duur tumhaare jahaan se duur"

"tishnagi had se baDh gai hai ab zindagi qad se baDh gai hai ab pahle rahte the sad masaail-e-jaan ginti ye sad se baDh gai hai ab zulf-e-jaanaan ki paaki-o-rangat sang-e-asvad se baDh gai hai ab abtari yuun na thi magar haakim teri masnad se baDh gai hai ab hauz-e-kausar ki chaashni yaaro ism-e-ahmad se baDh gai hai ab pahle bachpan thaa ab javaani hai umr abjad se baDh gai hai ab zindagi mukhtasar thi 'kaashif' ki maut ki zad se baDh gai hai ab"

"jahaan-e-ishq ab suunaa paDaa hai tumhein paa kar ke bhi khonaa paDaa hai udaasi ho gai mujh par musallat tumhein bhi raat-din ronaa paDaa hai paDaa rahtaa thaa ik kone mein har dam magar ab mujh mein hi konaa paDaa hai bhagaane ke liye khvaabon se tum ko tasavvur mein tumhein chhunaa paDaa hai yahi kyaa kam qayaamat hai miri jaan tumhein chume binaa sonaa paDaa hai main do se ek phir zero huaa huun magar ye ishq kyon duunaa paDaa hai tire daaman ke daaghon ko mujhe jaan jigar ke khuun se kyon dhonaa paDaa hai ghamon kaa bojh thaa yaksaan sabhi par magar 'kaashif' ko hi Dhonaa paDaa hai"

"yagaane bhi begaane ho gae hain mohabbat mein divaane ho gae hain ba-juz is ke nahin kuchh jaante ham hamein bichhDe zamaane ho gae hain musalmaanon ki khaatir hind mein ab qafas hi aashiyaane ho gae hain javaani ki nai rut aur mohabbat sabhi sapne suhaane ho gae hain hamaaraa ishq bachpan mein huaa hai abhi se ham siyaane ho gae hain taajjub kyaa hai fashion ki sadi mein jo mardon mein zanaane ho gae hain anaa haail hai milne mein so 'kaashif' bahaane hi bahaane ho gae hain"

"bechain bahut huun mujhe aaraam pilaa de laa saaqiyaa laa baada-e-gulfaam pilaa de mujh ko to zarurat hai davaa ki na duaa ki taaviz mein likh kar vahi ik naam pilaa de hangaama bapaa hotaa hai milte hi badan mein jaise vo labon se koi kohraam pilaa de maikhaane se nisbat kahaan ham baada-kashon ko bas mai-kada-e-chashm se ik jaam pilaa de aalaam se mashrut hai aaraam hamaaraa ai kaash koi talkhi-e-ayyaam pilaa de be-saakhta saaqi ki taraf jaataa huun har roz baada na sahi ru-e-dil-aaraam pilaa de gar hosh mein 'kaashif' ho to shab Dasti hai us ko mohsin hai vahi jo use har shaam pilaa de"

"ab chhoD bhi do yaar badan TuuT rahaa hai baanhon mein giraftaar badan TuuT rahaa hai is kibr se kab kis ko sukun aayaa mayassar mast-e-mai-e-pindaar badan TuuT rahaa hai daaman jo huaa chaak to kuchh gham nahin lekin ai husn ki sarkaar badan TuuT rahaa hai har roz patangon se charaaghon ne kahaa ye mil kar na karo vaar badan TuuT rahaa hai barson se miraa jism dil-o-jaan-o-jigar se hai bar-sar-e-paikaar badan TuuT rahaa hai roTi ke liye roz thakan saath huun laataa ab mat karo singaar badan TuuT rahaa hai miTTi ke khilaunon ko uThaae hue buDhiyaa DhunDhe hai kharidaar badan TuuT rahaa hai inkaar zabaani thaa koi jang nahin thi phir kyon miraa be-kaar badan TuuT rahaa hai chaDhti hui har saans nahin aakhiri hoti ab bas bhi karo pyaar badan TuuT rahaa hai kaanTon ki zamin sang ki baarish mein yuun 'kaashif' chalnaa huaa dushvaar badan TuuT rahaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"