baagh mein jugnu chamakte hain jo pyaare raat ko — Rasheed Lakhnavi

"dam-e-raftaar-e-jaanaan ye sadaa-e-naaz aati hai sambhaalein sab dilon ko paanv ki aavaaz aati hai sabaa jo pur miraa ai baaghbaan laati hai gulshan mein qafas se saath yaan tak hasrat parvaaz aati hai abhi jaao na yaaraan qafas-e-gulzaar ki jaanib zaraa ham muntazir hain taaqat-e-parvaaz aati hai asar ye hai ki bulbul jab qafas mein karti hai naala shikast-e-rang-e-gul ki baagh se aavaaz aati hai nazar duzdida teri kab nazar aati hai aashiq ko uDaa jaataa hai dil aur tiir ki aavaaz aati hai shikva-e-husn ye hai jab kabhi tum jaa nikalte ho to but-khaane se yaa-allaah ki aavaaz aati hai sadaa di main ne jab aane lagi subh shab-e-vaslat samajh kar aa kidhar o tafarqe parvaaz aati hai tire baais se jis ne kal hamein di thi bahut iizaa vahi shab aaj phir ai taala-e-naa-saaz aati hai hui muddat tire zulfon ke divaane ki sehat ko bigaD jaataa hai shab zanjir ki aavaaz aati hai zaraa kah de koi un se qarib aayaa dam-e-aakhir ki ulTi saans ab to ai mire dam-saaz aati hai javaani ke nishaan andaam se hone lage zaahir mubaarak ho bahaar ai sard baagh naaz aati hai jhukaae sar na kyuun khaamosh baiThun hijr-e-jaanaan mein ki dil ke TuTne ki kaan mein aavaaz aati hai bhalaa aaj zinda aah-e-dil aashiq kare paidaa ki khud vo kah rahe hain dard ki aavaaz aati hai 'rashid' ashaar mohmal paDh rahe ho jama hain shaair khajil hote nahin tum dil ki ye aavaaz aati hai"

"dilaa maashuq jo hotaa hai vo saffaak hotaa hai baDaa be-rahm hotaa hai baDaa bebaak hotaa hai khushi hogi halaak apnaa dil-e-sad-chaak hotaa hai kahaan ab aarzu ghar hasraton kaa khaak hotaa hai tumhaari tegh mujh se chupke chupke kahti jaati hai mubaarak ho ki ye sar zinat-e-fitraak hotaa hai tujhe allaah ne bakhshaa hai kaisaa rutba-e-aali ki teraa naqsh-e-paa taaj-e-sar-e-aflaak hotaa hai qarib aayaa hai vaqt ai jaan-e-jaan ab dam nikalne kaa tire kuche se ham uThte hain jhagDaa paak hotaa hai jo piite hain sharaab un ki mohabbat mein nahin aasi ye tar-daaman vahi hain jin kaa daaman paak hotaa hai khayaal aataa hai badnaami kaa aashiq qatl hote hain ki maashuqon ko naam-e-aashiqi se paak hotaa hai asar se meri vahshat ke koi jaama nahin saabit main suntaa huun garebaan har kafan kaa chaak hotaa hai main kah detaa huun ho aa kar zulf ke kuche mein dam-bhar ko kisi din jab bahut muztar dil-e-ghamnaak hotaa hai pahunch jaae haqiqat tak tiri ye ghair-mumkin hai bahut go tujh se vaaqif saahab-e-idraak hotaa hai 'rashid'-e-zaar kyuun khush khush na jaae qabr ki jaanib mayassar aaj didaar-e-shah-e-laulaak hotaa hai"

"sharaab-e-naab kaa qatra jo saaghar se nikal jaae taDap ke dil miraa qaabu-e-dil-bar se nikal jaae khushi mein kah rahaa huun aamad aamad hai jo us gul ki koi kah de ki viraani mire ghar se nikal jaae sataate hain raqib aa aa ke main go chhup ke baiThaa huun ajab ye zulm hai koi kidhar ghar se nikal jaae agar sun le ki tere sakht-jaan ki baari aa pahunchi simaT kar aab-e-khanjar chashm-e-jauhar se nikal jaae nikaalo roz ghar se Dar nahin lekin ye hai dhaDkaa ki meraa naam hi ik din na daftar se nikal jaae ghaTaa ke main ne apnaa shauq-e-dil likkhaa hai jaanaan ko ki uDne mein na khat aage kabutar se nikal jaae na jaane ki karo jaldi ki qissa khatm hotaa hai Thahar jaao zaraa dam jism-e-laaghar se nikal jaae qafas mein daam mein mere phaDakne kaa ye baais hai havaa parvaaz karne ki mire par se nikal jaae ijaazat abr ko dar par Thaharne ki nahin dete bas itnaa hukm hai aa ke faqat barse nikal jaae 'rashid'-e-sokhta-dil sar paTakne par hai aamaada kaho har ik sharar se jald patthar se nikal jaae"

"na chhoDaa dil-e-khasta-jaan chalte chalte ghazab kar chale mehrbaan chalte chalte kaheinge kuchh ai baaghbaan chalte chalte agar degi yaaraa zabaan chalte chalte gire ham pas-e-kaarvaan chalte chalte thake paanv apne kahaan chalte chalte tiri chaal baad-e-khizaan ne uDaai ujaaDaa miraa aashiyaan chalte chalte karo aankhein jhapkaa ke tirchhi nigaahein sinaanein chalin barchhiyaan chalte chalte bharein sard aahein jo garm aah bhar ke nasim aai baad-e-khizaan chalte chalte na ghabraa zaraa daaman-e-roz-e-mahshar karungaa tiri dhajjiyaan chalte chalte adam ko chale qaid zulf-e-sanam mein rahein paanv mein beDiyaan chalte chalte dam-e-naza sar par gire koh-e-ulfat uThaain baDi sakhtiyaan chalte chalte miri laash ko paanv se khuub raundaa thame surat-e-aasmaan chalte chalte bas ab to adam mein mulaaqaat hogi ye kahte gae raftagaan chalte chalte na qaatil ne tegh-e-nigah tak lagaai na kartaa gayaa imtihaan chalte chalte jahaan se gae hashr tak khuub soe liyaa saath khvaab-e-giraan chalte chalte rahe umr-bhar teri vahdat ke qaail na liin ham ne do hichkiyaan chalte chalte 'rashid'-e-hazin laakh rokaa kiye ham vo lete gae naqd-e-jaan chalte chalte"

"gardish-e-chashm hai paimaane mein tum gae ho kabhi maikhaane mein ek jalva saa nazar aataa hai koi to hai mire gham-khaane mein yuun hai siine mein dil-e-pur-hasrat qabr jaise kisi viraane mein saaz-e-nairang hai meri zanjir nai aavaaz hai har daane mein dekh ai dil na mujhe chhoD ke jaa farq aa jaaegaa yaaraane mein jal ke aashiq hue maashuq sifat shama kaa soz hai parvaane mein jaan us but mein lagi rahti hai apne ko paate hain begaane mein be-khudi ne na kahin kaa rakkhaa ham hain basti mein na viraane mein sang-e-dar tak tire jab sar pahunchaa laakh sajde kiye shukraane mein nahin maalum gayaa kis jaanib dil lagaa hai tire divaane mein qissa-e-hazrat-e-yusuf na suno turfa ibrat hai is afsaane mein haal-pursi nahin kartaa koi bekasi hai mire gham-khaane mein is tarah dil mein hai aahon kaa dhuaan jaise khaak uDti hai viraane mein barakat kis ke qadam ki hai 'rashid' ki azaan hoti hai but-khaane mein"

"maar Daalegi hamein ye khush-bayaani aap ki maut kaa paighaam aaegaa zabaani aap ki zindagi kahte hain kis ko maut kis kaa naam hai mehrbaani aap ki naa-mehrbaani aap ki baad-e-murdan khinch laayaa jazb-e-dil siine pe haath ik anguThi mein jo pahne thaa nishaani aap ki baDh chukaa qad bhi farogh-e-husn ki had ho chuki ab to qaabil dekhne ke hai javaani aap ki aap se mil ke gale raahat se aa jaati hai niind sabza-e-khvaabida hai poshaak dhaani aap ki rang aalam kaa badalnaa aap ke sadqe mein hai jama kar rakkhi thiin poshaakein puraani aap ki aankhon par bandhvaai paTTi taa na dekhun aur ko mar gayaa main par vahi hai bad-gumaani aap ki jab vo mujh ko dekhtaa hai hans ke kahtaa hai 'rashid' kitni paaband-e-vafaa hai zindagaani aap ki"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"