dard juun shama mile hai shab-e-hijraan mujh ko — Wali Uzlat

"khudaa shaahid buto do-jag se ye saudaa hai nirvaalaa main do baadaam-e-chashm-e-lutf par dil bechne vaalaa dono aalam se mashrab mast-e-vahdat kaa hai nirvaalaa mire ek haath mein tasbih hai ik haath mein pyaalaa nahin is saal vo khunin-nayan bhure alak vaalaa lago laalaa ko aag aur ho jo naa-farmaan kaa munh kaalaa vo shirin-lab kaa bosa kyunke chhoDe mujh saa matvaalaa ki juun laala bichhaDte us dahan se daagh ho paalaa nahin faarigh main baad-az-marg bhi soz-e-mohabbat se miraa khuun daaman-e-qaatil mein hogaa daagh juun laalaa vo naa-farmaan banaa khun-e-jigar se mai na pi uzlat kabaab-e-dil ki bu aati hai har pyaale se juun laalaa"

"main vo majnun huun ki aabaad na ujDaa samjhun musht-e-khaak apni uDaa kar use sahraa samjhun is qadar mahv huun in shola-rukhon kaa juun shama ki na jalne ko pahchaanun na tamaashaa samjhun chashmak-e-yaar hain mujh shama ke haq mein gul-gir dam ye qainchi ke main anfaas-e-masihaa samjhun gardish-e-chashm-e-sajan le gayaa khaatir se ghubaar us ko dasht-e-dil-e-'uzlat' kaa bagulaa samjhun"

"yaar uTh gae duniyaa se aghyaar ki baari hai gul sair-e-chaman kar gae ab khaar ki baari hai zaahid ne ibaadat chhoD us zulf se uljhaa hai tasbih ki shaikhi gai zunnaar ki baari hai us kaakul-e-mushkin ki bu hui hai pareshaan aa sab shahr-e-khutan luT gae taataar ki baari hai gulshan mein khiraamaan ho ab burqa uThaayaa hai sab gir gayaa sarvistaan gulzaar ki baari hai kar zakhmi nigaahon se ab dil pe uThaayaa haath nezon ki gai naubat tarvaar ki baari hai dil par hain jahaan ke sab baaham ki kudurat se aainon ki saafi gai zangaar ki baari hai jhaD gae vo tabassum se gul ghunche khaDe hain sarv tamkin ne chaman luuTaa raftaar ki baari hai un zulfon ke aqrab ne dil meraa Dasaa 'uzlat' pichhe paDi hai choTi ab maar ki baari hai"

"hue ham jab se paidaa apne divaane hue hote khudaa ko ham pahunchte khud se begaane hue hote mazaa raushan-dilli kaa zindagaani hai tajarrud se ham apne misl shabnam aab aur daane hue hote muue ham intizaar-e-nashsha se khoshon ke jaa yaarab huvaidaa taak se pur-baada paimaane hue hote hoveinge khaak vusat mashrabi ki rah gai hasrat ham avval hi se misl-e-dasht viraane hue hote rahe duniyaa mein be-aish aur shuhud-e-haq se uqbaa mein hue zuhhaad kor ai kaash ke kaane hue hote mai-e-irfaan kaa zarf aadam hi ko thaa gar malak dete to saat iblis ke sargarm yaaraane hue hote abas tum munzavi masjid mein ho zuhhaad kyaa haasil vo saahab etakaaf-e-kunj-e-maikhaane hue hote hue maston pe gar tegh-e-zabaan-zan shaikh shekhi mein jo apne nafs-parvar hote mardaane hue hote agar sad-chaak ho haat us ke lagte aish thaa 'uzlat' dil-e-ushshaaq saare kaash ke shaane hue hote"

"ai naaseh chashm-e-tar se mat kar aansu paak rahne de are bedard rone mein mujhe bebaak rahne de baras mat abr miT jaagaa bagholaa khaak-e-majnun kaa khudaa ke vaaste dasht-e-junun ki naak rahne de dil-e-zakhmi hai shaaeq bu-e-gul aur shor-e-bulbul kaa rafu-gar fasl-e-gul mein ye garebaan chaak rahne de ye taaqat nazr hai ai naa-tavaani par bahaaron mein mire haathon ko chaak-e-jeb par chaalaak rahne de nasihat mujh ko tark-e-ishq ki kuchh farz nahin tujh par na chhoD ai shaikh sunnat munh mein nit misvaak rahne de uDaa mat ai nasim-e-baagh-e-jannat kyaa karun tujh ko mire sar par zaraa pi ki gali ki khaak rahne de agar juun shama-did-e-shoala-ruyaan chaahiye 'uzlat' nazaaraa taa na jal jaa chashm ko namnaak rahne de"

"hansun juun gul tire zakhmon se ulfat is ko kahte hain tu gaali de duaaon mein mohabbat us ko kahte hain nahin gham hashr kaa har-chand aafat is ko kahte hain phirun yaaron kaa munh dekhun qayaamat is ko kahte hain mire sailaab-ashkon mein bahe duniyaa, pa juun saayaa na sarkaa main jagah se istaqaamat is ko kahte hain ataa kar siim shabnam juun hansi subh apne ehsaan par girah hui gul ki peshaani par izzat is ko kahte hain dam-e-raushan-dili jo maarte hain shama se zaahid kaTe se naak sarkash-tar hain zillat is ko kahte hain bagule saa uDaataa dhuul 'uzlat' vajd kartaa hai sar-e-baazaar rusvaai mein khalvat is ko kahte hain"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"