fasl-e-gul mein bhi vahi daur-e-khizaan hai ab ke — Ali Abbas Ummeed

"varaq hai mere sahife kaa aasmaan kyaa hai rahaa ye chaand to shaayad tumhaaraa chehraa hai jo puchhtaa thaa miri umr us se kah denaa kisi ke pyaar ke mausam kaa ek jhonkaa hai simaT gayaa thaa andheron ko dekh kar lekin sahar ke saath mire raaste mein bikhraa hai jise bachaataa rahaa thaa main aabru ki tarah vo lamha aaj miri muTThiyon se phislaa hai fazaa ki shaakh pe lafzon ke phuul khilne do jise sukut samajhte ho zard patta hai abhi to mere garebaan mein hai tiri khushbu tire badan pe abhi meraa naam likkhaa hai har ek shakhs ko ummid bas usi se hai hamaare shahr mein vo ek hi to rusvaa hai"

"qazaa ke saath chale zindagi ke badle mein mili na chhaanv bhi ahal-e-amal ko raste mein javaab-e-shahr-e-khamoshaan har ek basti hai gulaab khilte nahin ab kisi dariche mein gham-e-hayaat ki paighambaraana ulfat ko na jaane kab se basaae hue hain siine mein pahunch chuke hain yaqin ki hudud mein phir bhi laraz rahe hain qadam saath saath chalne mein shuur-e-zist ki alhaD kiran nazar aai hayaat-e-nau ke simaTte hue dhundalke mein tumhaare qurb ki vo saaat-e-hasin ab bhi ravaan hai saath mire yaad ke safine mein har ek saans su-e-kahkashaan baDhi lekin qadam bhaTakte rahe umr bhar andhere mein nikal ke mahbas-e-shab-rang se junun vaale asiir hote rahe asr-e-nau ke dhoke mein kare jo azm-e-safar us ko ye khabar kar do ki ik paDaav hain ham is tavil mele mein bahaa jo subh-e-bahaaraan ki justuju mein 'umid' usi lahu kaa hai partav har ik shagufe mein"

"raat tahriron ki ab yaksar khayaali ho gai lafz jab jaage 'ibaarat bhi niraali ho gai anginat chehre the shahr-e-dil mein lekin kyaa kahun vaqt kaa saaya paDaa basti ye khaali ho gai jin kaa ik ik lafz thaa muzhda nae mausam ke naam haif un safhaat ki surat bhi kaali ho gai dil ke mahbas se chale the qaafile yaadon ke par ik kiran palkon ki suuli par savaali ho gai ham-safar shaaistagi thi rahguzaar-e-zist mein phir bhi jis se baat ki har baat gaali ho gai haadson ki dhund se fankaar ne jis ko gaDhaa shukr hai us but ki peshaani ujaali ho gai kaise is mausam ko daur-e-gul kahun 'ummid' main rang se mahrum jab ik ek Daali ho gai"

"main to ik lamha-e-parida rahaa jaane kyuun vo bahut kashida rahaa ru-ba-ru zikr-e-naa-shunida rahaa uTh gayaa to miraa qasida rahaa main bhi banda hi thaa khudaa ki qasam ye alag hai ki barguzida rahaa aur to koi gham na thaa us ko bas miri chaah mein tapida rahaa shab ki peshaani kaa main jhumar thaa kyaa huaa gar havaa-guzida rahaa mere hisse mein us sahife kaa ik varaq thaa vahi darida rahaa koi ummid bar na aati thi zindagi bhar sitam-rasida rahaa"

"jab kabhi tark-e-gham-e-dil kaa savaal aataa hai ret par naam thaa meraa bhi khayaal aataa hai mauj-e-tufaan uThi bah chale khvaabon ke sadaf phir baraste hue baadal pe zavaal aataa hai ab mire khvaab ke hamraah vahi yaadein hain jin ko maalum na thaa shishe mein baal aataa hai jab simaT aayaa hai khud jism hi peshaani par kyon dar-e-dil pe dabe paanv malaal aataa hai kyaa tiraa zehn bhi lamhon ke safar mein hogaa teri baaraat mein rah rah ke khayaal aataa hai koi aisaa bhi hai jo naqsh-ba-divaar na ho ab ye taamir ki raahon mein savaal aataa hai ghanTiyaan vaqt ki bajti hain musalsal 'ummid' faasle kahte hain ik aur bhi saal aataa hai"

"tavil soch hai aur mukhtasar lahu meraa garaan safar mein hai zaad-e-safar lahu meraa vo raunaqein bhi gaiin us ke khushk hote hi sajaataa rahtaa thaa divaar-o-dar lahu meraa har ek lamha mujhe zindagi ne qatl kiyaa tamaam umr rahaa mere sar lahu meraa dayaar-e-ghair ko mahkaa gayaa hinaa ban kar ye vaaqia hai rahaa be-hunar lahu meraa vo ruuh thi jise ahd-e-vafaa kaa paas na thaa kabhi na chhoD sakaa apnaa ghar lahu meraa ujaal deinge andheron ki ye jabin ik din bikhertaa hai kuchh aise sharar lahu meraa ravaan hai qaafila-e-fikr su-e-dasht-e-junun dikhaa rahaa hai use rahguzar lahu meraa ravaani likhti rahi jin kaa naam aaTh pahar vahin bahaayaa gayaa khaak par lahu meraa na jaane kaun si rut aa gai 'umid' ab ke chhupaa na paai miri chashm-e-tar lahu meraa"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"nahin piitaa main par navaazish hui hai baDi mausamon ki sifaarish hui hai bahut din se sahraa ke jaisaa ye dil hai na baadal ghire hain na baarish hui hai yahaan hai bulandi jo kirdaar ki to vahaan khaal-o-khad ki numaaish hui hai tiri jhiil jaisi jo dekhi hain aankhein miri Duub jaane ki khvaahish hui hai chhalaktaa nahin khuun zakhmon se aise kahin naakhunon ki bhi kaavish hui hai hamein 'ishq mein mubtalaa kar rahe hain nazar aur dil mein ye saazish hui hai vahaan dushmanon ki baDi yaad aai jahaan doston ki navaazish hui hai vafaa-daariyon kaa sila mil rahaa hai hamaari sadaa aazmaaish hui hai pareshaaniyon mein jo ham mubtalaa hain yaqinan koi ham se laghzish hui hai vahin apni aankhon ko ham chhoD aae jahaan manzaron ki numaaish hui hai raqibon ko hai chhuT mahfil mein un ki mire aane jaane pe bandish hui hai ghazal kahnaa 'faaruq' main chhoD dungaa isi baat par un se ranjish hui hai"

"jab se aayaa huun tere gaanv mein rang hi rang hain fazaaon mein aa ki dukh sukh ki koi baat karein baiTh kar shishamon ki chhaanv mein main bhi kartaa huun zabt ki koshish to bhi takhfif kar adaaon mein vo tiraa dafatan bichhaD jaanaa vo miraa dekhnaa khalaaon mein ho agar koi gosh-bar-aavaaz ik khamoshi bhi hai sadaaon mein yahi mere liye ghanimat hai saans le luun khuli fazaaon mein"

"bas ki ik lams ki ummid pe vaare hue hain so tire saamne ye khaak pasaare hue hain jaane kab un ko bujhaa baiThe koi baad-e-alam sar-e-mizhgaan-e-tamannaa jo sitaare hue hain zindagi tu bhi hamein vaise hi ik roz guzaar jis tarah ham tujhe barson se guzaare hue hain nit-nae naqsh karein us pe aziyyat ke raqam aa ki ham takhti-e-dil apni pachaare hue hain kab kuchal jaaein kisi paanv se ham barg-e-vajud vaqt ki dhuup mein vaise hi karaare hue hain jaante hain ki tu hi ishq-badan ko hai libaas ham tiraa ruup jo aashuftagi dhaare hue hain apni jurat ki sataaish ho ki ham chob-mizaaj rabt rakhte hain sadaa un se jo aare hue hain"

"phir bahaar aai hai phir josh mein saudaa hogaa zakhm-e-derinaa se phir khuun Tapaktaa hogaa biiti baaton ke vo naasur hare phir honge baat niklegi to phir baat ko rakhnaa hogaa yurishein kar ke umanD aaeingi suuni shaamein laakh bhaTkein kisi unvaan na saveraa hogaa ji ko samjhaaeinge matvaali havaa ke jhonke phir koi laakh sambhaale na sambhalnaa hogaa kaisi rut aai havaa chalti hai ji Doltaa hai ab to hansnaa bhi taDapne kaa bahaanaa hogaa TuuT jaaegaa ye laachaari-e-daaem kaa fusun aur is tarah ki jaise koi aataa hogaa dil dhaDakne ki sadaa aaegi sune-pan mein duur baadal kahin parbat pe garajtaa hogaa"