husn hiire ki kani ho jaise — Afzal Parvez

"khush-qismat hain vo jo gaanv mein lambi taan ke sote hain ham to shahr ke shor mein shab-bhar apni jaan ko rote hain kis kis dard ko apnaaein aur kis kis zakhm ko sahlaaein dekhti aankhon qadam qadam par kai havaadis hote hain dil ki dilli luT gai is ke aivaanon mein ghadar machi khuddaari ke mughal shahzaade shahr mein Thaliyaa Dhote hain khush-lahnon ke liye gulshan bhi kunj-e-qafas ban jaae to jabr ke gun gaate hain yaa naghmon mein dard samote hain shaam ne din kaa saath chhuDaayaa raat ne dasht mein aan liyaa aise safar mein rahgiron par saans bhi dubhar hote hain main to apni jaan pe khel ke pyaar ki baazi jiit gayaa qaatil haar gae jo ab tak khuun ke chhinTe dhote hain dil ke ziyaan kaa sabab kyaa puchho un tufaanon ko dekho jin ke bhanvar saahil ke safinon ko bhi aan Dubote hain 'parvez' aaj nahin milti hai khum ke bhaav talchhaT bhi is par turra ye hai ki saaqi nashtar-e-taan chubhote hain"

"main ne dil-e-be-taab pe jo jabr kiyaa hai khuun ho ke meri aankhon se ab chhuT bahaa hai jis ko kisi aazar ne hai patthar se taraashaa ab shumi-e-taqdir se vo meraa khudaa hai us ke sitam-o-jaur kaa ehsaas kise ho us shokh ki surat hi baDi hosh-rubaa hai mujh bekas-o-aavaara ki phir aa gai shaamat suntaa huun ki basti mein kahin qatl huaa hai tum un ko sazaa kyuun nahin dete ki jinhon ne mujrim kaa zamir aur sukun luuT liyaa hai ab daavaa-e-insaaf ki auqaat khulegi khud shaikh mire shahr kaa mukhtaar banaa hai"

"kaarzaar-e-ishq-o-sar-masti mein nusrat-yaab hon vo jununi daar tak jaane ko jo betaab hon kohsaaron par savaa-neze pe suraj aae to choTiyon ki barf pighle vaadiyaan sairaab hon dusre saahil pe koi sohni ho muntazir ham mahinvaalon ke aage bahr bhi paayaab hon 'aafiyyat paate hain khvaabon ke hasin bahron mein log jab har ik mauj-e-haqaaeq mein nihaan girdaab hon"

"lailaa sar-ba-garebaan hai majnun saa aashiq-e-zaar kahaan hiir duhaai deti hai raanjhe saa yaar-e-ghaar kahaan apnaa khun-e-jigar piite hain tujh ko duaaein dete hain tere maikhaane mein saaqi ham saa baada-khvaar kahaan hijr kaa zulm hamaari qismat vasl ki daulat ghair kaa maal zakhm kise aur marham kis ko dard kahaan hai qaraar kahaan hijr kaa zulm hamaari qismat vasl ki daulat ghair kaa maal zakhm kise aur marham kis ko dard kahaan hai qaraar kahaan pir-e-mughaan kyaa kam thaa mohtasibon kaa bhi ab dakhl huaa miinaa par kyaa guzregi sar phoDeinge mai-khvaar kahaan sunte hain ki chaman mahke bulbul chahke ban lahke hain apne nasheman tak jo na pahunchi aisi bahaar bahaar kahaan kunj-e-mehan hai daar-o-rasan hai zulmat hai tanhaai hai kaun si jaa hai ham-safaro le aai talaash-e-yaar kahaan gul-chinon ko aaj chaman-bandi kaa daavaa hai 'parvez' ab dekhein luT kar biktaa hai kali kali kaa singhaar kahaan"

"gard uDe yaa koi aandhi hi chale ye umas to kisi unvaan Tale ang par zakhm liye khaak male aan baiThe hain tire mahal tale apnaa ghar shahr-e-khamoshaan saa hai kaun aaegaa yahaan shaam Dhale dil-e-parvaana pe kyaa guzregi jab talak dhuup bujhe shama jale ruup ki jot hai kaalaa jaadu ik chhalaavaa ki farishton ko chhale daldalon mein bhi kanval khilte hain nakhl-e-ummid bahar-taur bhale apne hi rain-baseron ki taraf lauT aae hain sabhi shaam Dhale mai-kade mein to nasha baTtaa hai kaun yaan jaanche bure aur bhale raushni dekh ke chundhiyaa jaaein jo andheron mein baDhe aur pale khaar to saif banegaa gul ki ye bhale hi kisi gulchin ko khale raat baaqi hai abhi to 'parvez' baada sar-josh rahe daur chale"

"jo dard-e-dil kaho aahista bolo khushi se gham saho aahista bolo fughaan karnaa bhi jurm-e-aashiqi hai baDe chaukas raho aahista bolo tumhaari aah bhi hai baar-e-khaatir takallum ke shaho aahista bolo dar-o-divaar bhi hote hain jaasus koi suntaa na ho aahista bolo ab aah-e-zer-e-lab hai bazm ki rasm isi rau mein baho aahista bolo sirhaane dil hi dil mein baat karnaa hamaare dil-daho aahista bolo sadaa sar phoD kar aaegi vaapas yahi chaabuk saho aahista bolo"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"