is tarah ham ne sar-e-daar bhi sardaari ki — Aarib Hashmi

"nahin chaahaa thaa ye kyaa ho gayaa hai use mujh par bharosa ho gayaa hai ye ik duuje kaa dukh bhi baanTte naiin mere logon ko ye kyaa ho gayaa hai bujhaa do taaq mein jalte diyon ko idhar dekho ujaalaa ho gayaa hai mayassar hai sabhi ko teri qurbat to kyaa tu itnaa sastaa ho gayaa hai buraa kahti thi jis ko saari duniyaa kahaa tum ne to achchhaa ho gayaa hai uThi jo aankh manzil saamne thi dharaa paaon to rasta ho gayaa hai falak ko chhu ke lauT aaiin duaaein ye mere saath dhokaa ho gayaa hai udhar niklaa vo mashkiza uThaa kar idhar har shakhs pyaasaa ho gayaa hai tire bin bhi guzaaraa zindagi ko sitam ye hai guzaaraa ho gayaa hai mujhe us ki khabar kaise ho 'aarib' mile jo ek arsa ho gayaa hai"

"dekhnaa bhi to tiri baat kaa ik Dhang lage tu ne dekhaa jise ik baar use rang lage ain mumkin hai qabile mein baghaavat honaa ain mumkin hai tire naam pe ik jang lage tu na jis raaste pe jaae vahaan dhuul uDe tu na jis aaine mein ho so use zang lage sochte sochte vusat bhi ataa hoti hai dekhte dekhte nazron ko khalaa tang lage ishq vaale use gul-paashi kahaa karte hain husn vaalon ke mohalle mein agar sang lage"

"ghamon ki dhuup thi aur saaebaan na miltaa thaa gharon se nikle huon ko makaan na miltaa thaa hamaare paanv ke niche zamin thi lekin hamaare sar pe koi aasmaan na miltaa thaa tumhaaraa khoyaa huaa lams apne kamre mein vahin pe DhunDh rahe the jahaan na miltaa thaa jo dard ham ne sanbhaalaa huaa thaa siine mein kise sunaate koi mehrbaan na miltaa thaa jo saans saans mayassar rahaa mujhe barson bichhaD gae to phir us kaa nishaan na miltaa thaa nai nai thi mohabbat magar dilon mein thi ye aisi aag thi jis kaa dhuaan na miltaa thaa vo roz baagh mein aati thi sair karne ko parinde khush the unhein aab-o-daana miltaa thaa ye log jis ke bahaao ke giit gaate the hamein vo dariyaa kabhi bhi ravaan na miltaa thaa ham aise bolne vaale kahaan the par 'aarib' vo boltaa to hamein bhi bahaana miltaa thaa"

"nahin ki teri mohabbat mein ghar se nikle the ham apne aap se vahshat mein ghar se nikle the ik ek kar ke sabhi raaste mein maare gae jo log teri hifaazat mein ghar se nikle the hamaari be-sar-o-saamaani ye bataati hai ham aise log to ujlat mein ghar se nikle the tamaam khvaab the bikhre hamaare bistar par badan sameT ke vahshat mein ghar se nikle the"

"ishq mein soch kaa rukh moD diyaa jaataa hai aur divaar se sar phoD diyaa jaataa hai hijr de kar to sabhi maar diye jaate hain haae vo shakhs jise chhoD diyaa jaataa hai ek lamhe mein hue qaid zamaane kitne vaqt se vaqt yahaan joD diyaa jaataa hai ishq phir apni panaahon mein use rakhtaa hai jis ko be-rahm-o-karam chhoD diyaa jaataa hai ab zaraa siikh le khaamosh takallum karnaa kaasa-e-harf yahaan toD diyaa jaataa hai"

"dayaar-e-ghair mein koi to aasraa niklaa vo ajnabi thaa mire apne gaanv kaa niklaa vagarna kaun mohabbat yahaan nibhaa paataa khudaa kaa shukr judaai kaa raasta niklaa main sab ko raah dikhaate yahaan talak aaya phir apne ghar kaa pata puchhtaa huaa niklaa main ek umr jise sang hi samajhtaa rahaa vo ek shakhs mohabbat mein mubtalaa niklaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"chaahe khoTe hain yaa khare hain ham Dast-e-qudrat ke laaDle hain ham 'aks-e-rafta ko dekhiye saahib kitne maa'sum lag rahe hain ham raat jivan kaa giit gaati hai khvaab-e-tanvim dekhte hain ham 'umr lag jaaegi sanbhalne mein kis bulandi se yuun gire hain ham ek hangaam hai taghayyur kaa kunj-e-nisyaan mein paDe hain ham ab bhi mehndi kaa rang gahraa hai sandalin haath par rache hain ham ik tamaashaa hai kaar-zaar-e-hayaat dekh kar ser ho chuke hain ham jhilmilaate hain aarzu ke kanval dil-jharoke se jhaankte hain ham"