jab se us ko nazar mein rakkhaa hai — Abdul Qadir

"aasmaan sar pe uThaayaa bhi nahin jaaegaa haan magar us ko bhulaayaa bhi nahin jaaegaa hausla apni jagah Thiik hai lekin ham se dusraa ishq nibhaayaa bhi nahin jaaegaa shikva-e-zulmat-e-shab khuub kiyaa jaaegaa ik diyaa khud kaa jalaayaa bhi nahin jaaegaa khaak us shakhs se taabir pe asraar karein jis se kuchh khvaab dikhaayaa bhi nahin jaaegaa tum ne achchhaa hi kiyaa tark-e-mohabbat kar ke tum se ye misraa uThaayaa bhi nahin jaaegaa vo bhi mumkin hai na aane ke bahaane DhunDe aur ab ham se bulaayaa bhi nahin jaaegaa puchhne aae hain ahvaal vo 'abdul-qaadir' kyaa bataaein ki bataayaa bhi nahin jaaegaa"

"ham nahin milte nahin milte hain ham shaam ke baad phir bhi aa jaate hain kuchh ahl-e-karam shaam ke baad din vo zaalim hai ki Dhaataa hai sitam shaam ke baad baDhtaa jaataa hai miraa koh-e-alam shaam ke baad jaane lag jaate hain sab su-e-haram shaam ke baad aur vahaan phir se vahi jhuTi qasam shaam ke baad apni yaadon se gham-e-shaam ki chhuTTi rakkhein hone lag jaati hai aankh aur bhi nam shaam ke baad biivi bachchon ki hansi asl kamaai hai miri bas yahi bachti hai le de ke raqam shaam ke baad mai-kadaa saare masaail ko miTaa detaa hai masala diin kaa vahaan hai na dharam shaam ke baad din mein to khuub sataaish ki sanad milti hai khulte jaate hain mire saare bharam shaam ke baad vo jo jaataa hai to mujh ko bhi liye jaataa hai haae ho jaataa huun main aur bhi kam shaam ke baad aaj kyaa lenaa hai kyaa khaanaa hai 'abdul-qaadir' sar uThaae hue phirte hain ye gham shaam ke baad"

"koi divaar na dar khultaa hai par miraa azm-e-safar khultaa hai baDi mushkil se vo dar khultaa hai ye alag baat magar khultaa hai ham hi divaane bane phirte hain kab tiraa zauq-e-nazar khultaa hai maan to ro leti hai lekin yaaro kab yahaan koi pidar khultaa hai parda-e-ishq hai laazim varna main idhar aur vo udhar khultaa hai sher-dar-sher kahe jaate hain tab kahin jaa ke hunar khultaa hai mere nazdik vo 'abdul-qaadir' puuraa khul jaataa hai gar khultaa hai"

"sar mein saudaa koi baaqi na junun hai yuun hai ab to aaraam hai raahat hain sukun hai yuun hai us se milne ke bahaane to bahut hain lekin us se milnaa mire pindaar kaa khuun hai yuun hai naasehaa tujh ko khabar sab hai mohabbat kyaa hai varna yunhi nahin samjhaa thaa ki yuun hai yuun hai ham hain muhtaaj har ik kaam ke karne mein yahaan rab kaa har kaam faqat kun-fayakun hai yuun hai kitni raghbat thi tiri yaad se pahle mujh ko aur tiri yaad bhi ab kaar-zabun hai yuun hai phir vahi kal ki tarah der se ghar aaoge phir vahi uzr bataaoge ki yuun hai yuun hai pahle kuchh baat bhi ho jaati thi us se 'qaadir' aur ab us se miri haan hai na huun hai yuun hai"

"ab kyaa ye hisaab kitaab rakkhein kis kis ne hamein barbaad kiyaa kis kis ne khushiyaan diin ham ko kis kis ne hamein naashaad kiyaa ik aas thi so vo TuuT gai ik saans thi vo bhi chhuT gai ab ye kaahe ki hichki hai ab kaun hai jis ne yaad kiyaa vo ishq thaa yaa majburi thi ab tak ye muamma hal na huaa har roz muaafi ke badle ik taaza sitam ijaad kiyaa aasaan nahin thaa us ke binaa par guzar gai jo guzarni thi vo dil jo kabhi ujaaDaa hi nahin tire gham ne jise aabaad kiyaa ye pyaar-vyaar ki baatein sab duniyaa jise sher samajhti hai sab us ki jafaa ke qisse hain jis ne hamein laaeq-e-daad kiyaa jab tum hi nahin haasil ham ko kyaa haasil duniyaa milne se bejaa ye khvaahish-e-ishq rahi bejaa khud ko farhaad kiyaa barbaad to honaa thaa aakhir ik din to kisi ke haathon se par naaz karo 'abdul-qaadir' ki us ne tumhein barbaad kiyaa"

"kaam bas faatiha-khvaani se nahin hotaa hai ishq izhaar zabaani se nahin hotaa hai hai ye quraan amal karne ki daulat yaaro nafaa bas lafz-e-maaani se nahin hotaa hai kuchh inaayat yahaan ahbaab bhi kar jaate hain sab ziyaan dushman-e-jaani se nahin hotaa hai kaam ho jaataa hai bas misraa-e-avval se bhi kabhi kaam jo misra-e-saani se nahin hotaa hai ye tijaarat nahin ik aham ibaadat hai miyaan ishq mein laabh-o-haani se nahin hotaa hai baaz auqaat Thaharne ki talab hoti hai kaam har vaqt ravaani se nahin hotaa hai jaan-levaa kabhi khaamoshi bhi ho jaati hai khuun bas shoala-bayaani se nahin hotaa hai aarzi pyaas to bujh jaati hai is se lekin pyaas miT jaae ye paani se nahin hotaa hai piinaa paDtaa hai yahaan jaam-e-shahaadat 'qaadir' naam bas qissa kahaani se nahin hotaa hai"

"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"

"aisaa to yahaan kuchh bhi nahin hadd-e-nazar tak ham ko to pahunchnaa thaa kisi khvaab-nagar tak ab paanv nahin raah mein dil thakne lagaa hai lekin hamein chalnaa to hai anjaam-e-safar tak ham shor bhi sunte hain samaaat se bahut kam aavaaz bhi jaati hai to bas hadd-e-nazar tak mumkin hai main ab sabr kaa ye peD giraa duun jab haath pahunchtaa hi nahin shaakh-e-samar tak ham apne hi mausam se parakhte hain jahaan ko maahaul kaa lete hi nahin koi asar tak main apne hi andar ki taraf chikh rahaa huun ab dekhiye jaati hai ye aavaaz kidhar tak"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"tire jamaal se ham runumaa nahin hue hain chamak rahe hain magar aaina nahin hue hain dhaDak rahaa hai tu ik ism ki hai ye barakat vagarna vaaqiye is dil mein kyaa nahin hue hain bataa na paaein to khud tum samajh hi jaao ki ham bilaa javaaz to be-maajraa nahin hue hain tiraa kamaal ki aankhon mein kuchh zabaan pe kuchh hamein to moajize aise ataa nahin hue hain ye mat samajh ki koi tujh se munharif hi nahin abhi ham ahl-e-junun lab-kushaa nahin hue hain ba-naam-e-zauq-e-sukhan khud-numaai aap karein ham is maraz mein abhi mubtalaa nahin hue hain hami vo jin kaa safar maavaraa-e-vaqt-o-vajud hami vo khud se kabhi jo rihaa nahin hue hain khud-aagahi bhi khaDi maangti hai apnaa hisaab junun ke qarz bhi ab tak adaa nahin hue hain kisi ne dil jo dukhaayaa kabhi to ham 'irfaan' udaas ho gae lekin khafaa nahin hue hain"

"ba-zom-e-aql ye kaisaa gunaah main ne kiyaa ik aainaa thaa usi ko siyaah main ne kiyaa ye shahr-e-kam-nazaraan ye dayaar-e-be-hunaraan kise ye apne hunar kaa gavaah main ne kiyaa harim-e-dil ko jalaane lagaa thaa ek khayaal so gul use bhi ba-yak sard aah main ne kiyaa vahi yaqin rahaa hai javaaz-e-ham-safari jo gaah us ne kiyaa aur gaah main ne kiyaa bas ek dil hi to hai vaaqif-e-rumuz-e-hayaat so shahr-e-jaan kaa use sarbaraah main ne kiyaa har ek ranj usi baab mein kiyaa hai raqam zaraa saa gham thaa jise be-panaah main ne kiyaa ye raah-e-ishq bahut sahl ho gai jab se hisaar-e-zaat ko paivand-e-raah main ne kiyaa ye umr ki hai basar kuchh ajab tavaazun se tiraa huaa na hi khud se nibaah main ne kiyaa khirad ne dil se kahaa tu junun-sifat hi sahi na puchh us ki ki jis ko tabaah main ne kiyaa"

"faqat saje hue divaar-o-dar kaa kyaa matlab jahaan sukun nahin aise ghar kaa kyaa matlab kisi ke kaam na aae to zar kaa kyaa matlab na phal na chhaanv hai aise shajar kaa kyaa matlab na raaston kaa Thikaana na manzilon kaa pataa tire baghair mire is safar kaa kyaa matlab koi hayaat ke maani bataa ke samjhaae tavil kyaa hai bhalaa mukhtasar kaa kyaa matlab"