jab zamin ke muqaddar sanvar jaaeinge — Anwar Minai

"khvaab bikhreinge to ham ko bhi bikharnaa hogaa shab ki ik ek aziyyat se guzarnaa hogaa vo hamaare hi rag-o-pai mein nihaan rahtaa hai is ki tasdiq to ik din hamein karnaa hogaa apne khaakistar-e-tan ko liye kuche kuche kyaa havaaon ki tarah mujh ko guzarnaa hogaa hamein ahbaab ki be-laus rifaaqat ke sabab vaqt aaegaa to be-maut bhi marnaa hogaa honge sahraaon ke sannaaTe nazar ki had mein koi vaadi na koi khvaab na jharnaa hogaa aaina aaina khud saari dishaaein hongi aks-dar-aks magar ham ko ubharnaa hogaa chikhte khvaabon ki taabir yahi kahti hai hogi haDtaal kahin to kahin dharnaa hogaa"

"gum kar dein ik zaraa tujhe khvaabon ke shahr mein nukte kuchh aise DhunD kitaabon ke shahr mein divaangi ki aisi milegi kahaan misaal kaanTe khaaridtaa huun gulaabon ke shahr mein aaine bolte hain to ye bhi bataaeinge kyaa be-hijaab huun main hijaabon ke shahr mein naakaamiyon ki aag mein tapti hain khvaahishein jalti hai meri ruuh azaabon ke shahr mein is ahd-e-naa-shanaas mein ikhlaas ki talab gauhar ki justuju hai habaabon ke shahr mein har manzar-e-hasin pe hai ik chaadar-e-ghubaar kyaa main bhaTak rahaa huun saraabon ke shahr mein 'anvar' hamein to aaj bhi fikr-o-nigaah ke bosida ghar mile hain nisaabon ke shahr mein"

"har dam duaa-e-aab-o-havaa maangte rahe nange darakht sabz qabaa maangte rahe yaaron kaa e'tiqaad bhi andhaa thaa is qadar gungi rivaayaton se sadaa maangte rahe kitni ajiib baat thi jab sard raat se ham dopahar ki garm havaa maangte rahe karte rahe jo din ke ujaalon se ehtiraaz vo bhi andheri shab mein ziyaa maangte rahe kuchh log aise bhi the jo lamhaat-e-karb se aasuda saaaton kaa pata maangte rahe"

"makhmali khvaab kaa aankhon mein na manzar phailaa zahr hi zahr mire jism ke andar phailaa sabz mausam mein bhi ho jis ki shabaahat piili is chaman mein kahin shoale kahin patthar phailaa khaufnaaki asar-andaaz huaa karti hai is ko akhbaar ki maanind na ghar ghar phailaa ho ye mumkin to mire jism ke andar bhi utar reza reza mujhe har samt baraabar phailaa ikhtiraaaat ke baais hi jahaan mein ab tak nae ehsaas kaa be-paayaan samundar phailaa vajh-e-taklif na ban jaae khalaa ki khvaahish ab uDaanon ke liye par na kabutar phailaa laakh suraj ki inaayaat rahein mere saath meraa saaya na mire qad ke baraabar phailaa"

"ehsaas ki ragon mein utarne lagaa hai vo ab buund buund mujh mein bikharne lagaa hai vo gumnaamiyon ki andhi guphaaein hon nauha-khvaan maanind-e-aaftaab ubharne lagaa hai vo kaise kahun ki gham huaa khvaabon ki bhiiD mein zakhmon kaa indimaal to karne lagaa hai vo ik harf-e-aatishin bhi nahin us ke honT par lagtaa hai lahza lahza ThiThurne lagaa hai vo imkaan ki hadon se guzarne ke baad kyuun ab reza reza ho ke bikharne lagaa hai vo utraa thaa meri ruuh ke rauzan se jo kabhi ghuT ghuT ke mere jism mein marne lagaa hai vo"

"baDe sukun se khud apne ham-saron mein rahe jab aaina-sifat insaan pattharon mein rahe bhalaa vo kaise jaraaem ke haath kaaTeinge jo sahme simTe se khud apne bistaraon mein rahe nafas nafas thaa bikharne kaa silsila jaari baraae naam hi mahfuz ham gharon mein rahe hamaari nukta-rasi is qadar giraan guzri ki ban ke khaar hamesha nazar-varon mein rahe sahife fikr-o-nazar ke jo de gae tartib vahi to sher-o-sukhan ke payambaron mein rahe uThaae dosh pe maslub hasraton ki laash ham apne shahr ke khun-baar manzaron mein rahe taraash kar nai tahzib ke sanam ham log ''ba-sad vaqaar zamaane ke aazaron mein rahe"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"