jag mein aataa hai har bashar tanhaa — Elizabeth Kurian Mona

"kho gae ho tum jab se vaqt ki khalaaon mein maangti huun main tum ko raat-din du'aaon mein mujh ko thi ye khush-fahmi phir bahaar aaegi raunaqein kahaan aatin dil ke in khizaaon mein dil dhaDakne lagtaa hai sun ke halki aahaT bhi tere pyaar ki dastak jo hui havaaon mein bhulne ki koshish bhi kaamyaab kyaa hoti 'aks teraa dikhtaa hai mujh ko sab dishaaon mein saath teraa paaun gar khil uThegaa phir jivan intizaar kaa 'aalam hai abhi fazaaon mein phir se shaam-e-tanhaai yaad teri laai hai phir se kho gayaa hai dil maazi ki guphaaon mein kyaa gila karun 'monaa' teri bevafaai kaa jab vafaa nahin shaamil husn ki adaaon mein"

"gham kisi kaa miTaa kar to dekho apne gham ko bhulaa kar to dekho rang chehre kaa zaahir karegaa raaz-e-ulfat chhupaa kar to dekho tum se saaraa zamaana jalegaa naam-o-shohrat kamaa kar to dekho dost dushman ki pahchaan hogi dard apnaa sunaa kar to dekho ik zaraa muskuraahaT se apni ranjishon ko haTaa kar to dekho 'aib auron ke ginne se pahle khud se nazrein milaa kar to dekho be-khudi chiiz hoti hai kaisi dil kisi par luTaa kar to dekho log kaise badalte hain 'monaa' koi rishta nibhaa kar to dekho"

"daaman teraa mujh se chhuTaa milne ke haalaat nahin lekin tujh ko bhuul sakun main aisi bhi to baat nahin badle badle se lagte hain aaj ye tere tevar kyuun pahle jaise kyuun ab tere pyaar ke vo jazbaat nahin mere haath ki saari lakirein uljhi uljhi laakh sahi un mein mujh ko tu mil jaae hogi meri maat nahin tum se bichhDe arsa biitaa phir bhi aks hai aankhon mein aae na ho tum khvaabon mein jo aisi koi raat nahin khush-qismat hain log vo jin ko pyaar ke badle pyaar milaa is duniyaa mein har insaan ko haasil ye saughaat nahin jaate jaate gham ki daulat tum ne bhar di jholi mein ab ye ziist kaa sarmaaya hai maamuli khairaat nahin dard-bhari hai yaad-e-maazi phir bhi bas ji lete hain ham ne jaanaa har manDap mein aati hai baaraat nahin chaahe bahaar kaa mausam ho yaa vasl kaa koi aalam ho biit gae jo phir se vaapas aate vo lamhaat nahin jab jab tum yaad aae 'monaa' bhar aaiin meri aankhein aag lagaae dil mein aansu ye koi barsaat nahin"

"ziist mein gham hain ham-safar phir bhi taa-ajal karnaa hai basar phir bhi TuTi-phuTi huun chaahe divaarein apnaa ghar to hai apnaa ghar phir bhi chaahe inkaar ham karein sach kaa hove hai zehn par asar phir bhi dil machaltaa hai un se milne ko ham churaate rahe nazar phir bhi hai yaqin tum hamein na bhuloge ik zamaana gayaa guzar phir bhi hain ye alfaaz dil lubhaane ke kaash shaayad yunhi magar phir bhi"

"hai nahin koi naakhudaa dil kaa dil hi hai ek aasraa dil kaa chaar-su be-khudi mein phirtaa hai kuchh Thikaanaa nahin rahaa dil kaa rasm-e-duniyaa ko kyuun ye maanegaa hai alag jag se qaaeda dil kaa shekh-o-panDit ko koi samjhaae rab se rahtaa hai raabta dil kaa raah-e-insaaniyat hi avval hai hai yaqinan ye falsafa dil kaa do-jahaan bhi yahaan samaa jaaein kitnaa phailaa hai daaera dil kaa lab talak aa ke baat hi badli kyaa kare lafz tarjuma dil kaa aql kab aaegi tumhein 'monaa' maante kyuun ho tum kahaa dil kaa"

"khushi ki mili ye sazaa rafta rafta taaaruf ghamon se huaa rafta rafta thi chehre ki rangat to nazron ke aage chalaa rang dil kaa pata rafta rafta bhalaai kiye jaa yaqin rab pe rakh kar vo detaa hai sab ko sila rafta rafta suni bhuke bachche ne jab maan ki lori to ro ro ke vo so gayaa rafta rafta tire bin bhi kaT jaaegi umr lekin chhuDaa apnaa daaman zaraa rafta rafta nazar jo mili dil huaa raakh jal kar dhuaan phir usi se uThaa rafta rafta chaman mein khilin hanste hanste jo kaliyaan to khushbu se mahki fazaa rafta rafta na ghabraao 'monaa' pareshaaniyon se asar laaegi har duaa rafta rafta"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"jab tak mizaaj-e-dost mein kuchh barhami rahi goyaa bujhi bujhi si miri zindagi rahi jis par nigaah-e-lutf-e-karam aap ki rahi hairat se har nigaah use dekhti rahi go main rahaa kashaakash-e-dauraan se ham-kanaar lekin mire labon pe hansi khelti rahi laayaa hai ishq ne mujhe aise maqaam par khud-aagahi rahi na khudaa-aagahi rahi josh-e-junun ne manzil-e-maqsud paa liyaa aql-e-salim dekhti hi dekhti rahi sab kuchh mujhe 'khayaal' ki duniyaa mein mil gayaa lekin tumhaare husn-e-nazar ki kami rahi"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"