kabhi be-niyaaz-e-makhzan kabhi dushman-e-kinaaraa — Farooq Banspari

"dil-e-izaa-talab le teraa kahnaa kar liyaa main ne kisi ke hijr mein jiinaa gavaaraa kar liyaa main ne but-e-paimaan-shikan se intiqaaman hi sahi lekin sitam hai vaada-e-tark-e-tamannaa kar liyaa main ne niyaaz-e-ishq ko surat na jab koi nazar aai junun-e-bandagi mein khud ko sajda kar liyaa main ne vafaa-naa-aashnaa is saadgi ki daad de mujh ko samajh kar teri baaton par bharosaa kar liyaa main ne mohabbat be-bahaa shai hai magar taqdir achchhi thi mata-e-do-jahaan de kar ye saudaa kar liyaa main ne milaa to diid kaa mauqaa magar ghairat ko kyaa kahiye jab aai vaadi-e-aiman to pardaa kar liyaa main ne baDi daulat hai haq ke naam par daulat luTaa denaa jahaan mein phunk kar chaandni ko sonaa kar liyaa main ne kisi ke ek dard-e-bandagi se kyaa mili fursat ki dil mein sau tarah kaa dard paidaa kar liyaa main ne tamaashaa dekhte hi dekhte un ki adaaon kaa sar-e-mahfil khud apne ko tamaashaa kar liyaa main ne kisi ki raah mein 'faaruq' barbaad-e-vafaa ho kar buraa kyaa hai ki apne haq mein achchhaa kar liyaa main ne"

"khushi se phulein na ahl-e-sahraa abhi kahaan se bahaar aai abhi to pahunchaa hai aablon tak miraa mazaaq-e-barhana-paai tire mufakkir samajh na paae mizaaj-e-tahzib-e-mustafaai usul-e-johd-e-baqaa ke bande buland hai zauq-e-khud-fanaai khalil mast-e-mai-e-junun thaa magar main tum se ye puchhtaa huun razaa-e-haq ki chhuri ke niche hayaat aai ki maut aai jo qillat-e-sim-o-zar kaa gham hai to aao qaisar ke jaanashino tumhaari khaatir zaraa jhukaa duun main apnaa ye kaasa-e-gadaai bajaa tiraa naaz-e-be-niyaazi magar ye insaaf bhi nahin hai ki teri duniyaa mein tere bande buton ki dete phirein duhaai nadim taarikh-e-fath-e-daanish bas itnaa likh kar tamaam kar de ki shaatiraan-e-jahaan ne aakhir khud apni chaalon se maat khaai chalo ki 'faaruq' mai-kade mein dimaagh taaza to pahle kar lein phir aa ke ahl-e-haram ko deinge payaam-e-tajdid-e-paarsaai"

"tumhaare qasr-e-aazaadi ke me'maaron ne kyaa paayaa jahaan-baazon ki ban aai jahaan-kaaron ne kyaa paayaa sitaaron se shab-e-gham kaa to daaman jagmagaa uTThaa magar aansu bahaa kar hijr ke maaron ne kyaa paayaa naqib-e-ahd-e-zarrin sirf itnaa mujh ko batlaa de tulu-e-subh-e-nau bar-haq magar taaron ne kyaa paayaa junun ki baat chhoDo is gae ghar kaa Thikaanaa kyaa fareb-e-'aql o hikmat ke parastaaron ne kyaa paayaa sar-afraazi mili ahl-e-havas ki paarsaai ko magar teri mohabbat ke gunahgaaron ne kyaa paayaa khilaune de diye kuchh aap ne dast-e-tamannaa mein ba-juz daagh-e-jigar aaina-bardaaron ne kyaa paayaa mili sar phoDte hi qaid-e-hasti se bhi aazaadi rukaavaT Daal kar zindaan ki divaaron ne kyaa paayaa hamaare saamne hi baiTh kar 'faaruq' masnad par hamin se puchhte ho phir ki ghaddaaron ne kyaa paayaa"

"jo rahaa yuun hi salaamat miraa jazb-e-vaalhaana mujhe khud karegaa sajda tiraa sang-e-aastaana rah-e-haq ke haadson kaa na sunaa mujhe fasaana tiri rahbari ghalat thi ki bahak gayaa zamaana main jahaan-e-hosh-o-irfaan ba-libaas-e-kaafiraana ba-hijaab-e-paarsaai tu hama sharaab-khaana tujhe yaad hai sitamgar koi aur bhi fasaana vahi zikr-e-aab-o-daana vahi fikr-e-taaeraana miri zindagi kaa mahvar yahi soz-o-saaz-e-hasti kabhi jazb-e-vaalhaana kabhi zabt-e-aarifaana tiraa jazba-e-rifaaqat miraa saath kaise degaa ki main zinda-e-kohistaan tu halaak-e-aashiyaana miri bazm-e-fikr mein hai yahi kashmakash azal se kabhi chhaa gai haqiqat to kabhi jam gayaa fasaana vo bajaae aah 'faaruq' abhi vaah kar rahe hain abhi dard se hai khaali ye navaa-e-aashiqaana"

"kohsaar kaa khugar hai na paaband-e-gulistaan aazaad hai har qaid-e-maqaami se musalmaan ghar kunj-e-qafas ko bhi banaa leti hai bulbul shaahin ki nigaahon mein nasheman bhi hai zindaan allaah ke bandon ki hai duniyaa hi niraali kaanTe koi botaa hai to ugte hain gulistaan kah do ye qayaamat se dabe paanv guzar jaae kuchh soch rahaa hai abhi bhaarat kaa musalmaan ai shaikh-e-haram aaj tiraa faisla kyaa hai saf-bandi-e-masjid ki saf-aaraai-e-maidaan siine mein shikam le ke ubharti hain jo qaumein ban jaati hain aakhir mein khud aazuqa-e-dauraan chalti hui ik baat hai naa-mo'tabar ik chiiz naa-ahl ki daulat ho ki naadaar kaa imaan mullaa kaa ye fatvaa hai ki 'faaruq' hai mulhid ai din-e-mohammad tiraa allaah nigah-baan"

"ba-roz-e-hashr mire saath dil-lagi hi to hai ki jaise baat koi aap se chhupi hi to hai na chheDo baada-kasho mai-kade mein vaaiz ko bahak ke aa gayaa bechaara aadmi hi to hai qusur ho gayaa qadmon pe loT jaane kaa buraa na maaniye sarkaar be-khudi hi to hai riyaaz-e-khuld kaa itnaa baDhaa chaDhaa ke bayaan ki jaise vo mire mahbub ki gali hi to hai yaqin mujhe bhi hai vo aaeinge zarur magar vafaa karegi kahaan tak ki zindagi hi to hai mire baghair andheraa tumhein sataaegaa sahar ko shaam banaa degi aashiqi hi to hai ba-chashm-e-nam tiri dargaah se gayaa 'faaruq' khataa muaaf ki ye banda-parvari hi to hai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"shab ki taarik raahdaari hai aur miraa khauf iztiraari hai sabz khvaabon ki kam se kam qimat zindagi bhar ki ashk-baari hai ik musallat-shuda tamaddun ko ye na kahiye ki ikhtiyaari hai shash-jihaati mushaahida hai miyaan tajrabon ki sanad pe bhaari hai shukriya aap ki mohabbat kaa dil kaa maqsum sogvaari hai tajziye sun ke muskuraa denaa apni itni hi zimmedaari hai"

"ye hai mai-kada yahaan rind hain yahaan sab kaa saaqi imaam hai ye haram nahin hai ai shaikh ji yahaan paarsaai haraam hai jo zaraa si pi ke bahak gayaa use mai-kade se nikaal do yahaan tang-nazar kaa guzar nahin yahaan ahl-e-zarf kaa kaam hai koi mast hai koi tishna-lab to kisi ke haath mein jaam hai magar is pe koi kare bhi kyaa ye to mai-kade kaa nizaam hai ye janaab-e-shaikh kaa falsafa hai 'ajib saare jahaan se jo vahaan piyo to halaal hai jo yahaan piyo to haraam hai tujhe apne husn kaa vaasta mere shauq-e-did pa rahm khaa zaraa muskuraa ke naqaab uThaa ki nazar ko shauq-e-salaam hai na sunnaa to huur o qusur ki ye hikaayatein mujhe vaa'izaa koi baat kar dar-e-yaar ki dar-e-yaar hi se to kaam hai na to e'tikaaf se kuchh gharaz na savaab-o-zuhd se vaasta tiri diid aisi namaaz hai na sujud hai na qayaam hai ye durust ki 'aib hai mai-kashi ye ba-jaa ki baada haraam hai magar ab savaal ye aa paDaa ki tumhaare haath mein jaam hai jo uThi to subh-e-davaam thi jo jhuki to shaam hi shaam thi tiri chashm-e-mast mein saaqiyaa miri zindagi kaa nizaam hai miraa farz hai ki paDaa rahun tiri baargaah mein saaqiyaa koi tishna-lab hai ki sair hai yahi dekhnaa tiraa kaam hai isi kaaenaat mein ai 'jigar' koi inqalaab uThegaa phir ki buland ho ke bhi aadmi abhi khvaahishon kaa ghulaam hai"