kah ke pechida hamaari zindagi — Deepak Vikal

"us ki shaadi kaa vo manzar vo tamaasha chhoD kar ham chale aae hain us ko raqs kartaa chhoD kar jal gae hote sahar ke khvaab gar jagtaa na main dhuup aa baiThi thi bistar par daricha chhoD kar ham se to kuchh 'aadatein bhi ab talak chhuTi nahin tum chale aae ho pichhe ek duniyaa chhoD kar us ki baaton mein sadaaqat ki mahak roko use sab chale jaaeinge us ko bhi akelaa chhoD kar haae ye khushiyon kaa mausam aur ye khaTkaa hamein rut chali jaaegi ik din ye baghicha chhoD kar is khule aakaash mein baarish ke phir imkaan hain ghar chale aao jahaan bhi ho ye jhagDaa chhoD kar"

"us ne baat nahin kaaTi yuun mere baat banaane par main bhi haan mein haan kartaa thaa us ke har afsaane par jis rishte ko zinda rakhne ki khaatir main martaa thaa phir ik din main ji uTThaa us rishte ke mar jaane par sadmon par sadme milte hain lekin meri jaan-e-jaan rone tak kaa vaqt nahin hai tere is divaane par mere baa'd ye duniyaa thoDi aur hari ho jaaegi peD phalaa phulaa karte hain kuchh shaakhein kaT jaane par bas kuchh pal ko aankh laDi thi ek safar kaa qissa thaa phir saalon gumraah rahe ham us laDki ke jaane par us ke ranj-o-gham se saari duniyaa kaa vo rishta thaa baagh pareshaan ho jaae jyuun ek kali murjhaane par hijr manaane ab ke majnun maikhaane mein jaa baiThaa lailaa jaane kyaa biiti ho us paagal viraane par"

"tumhaari yaad-gaahon se kinaaraa kar gae hote faqat hotaa yahi ham phir kami se bhar gae hote main vo be-zaar banda huun jo mere saath tum rahte mujhi par hans rahe hote mujhi se Dar gae hote na yuun baiThe hue hote bure haalon ki mahfil mein hamaaraa ghar agar hotaa to kab ke ghar gae hote kahaan bachte hain aksar log tanhaai ke 'aalam mein na hote gar hamaare dost ham bhi mar gae hote"

"ek patthar par nadi ke der tak baiThaa huaa ro rahaa thaa main vo manzar dekh kar sukhaa huaa haan vahi ik shakhs mere vaaste sahraa huaa jis ki khaatir main kabhi jharnaa huaa dariyaa huaa bol ye kaisi mohabbat hai ki tere baagh mein har kali nochi hui har phuul hai raundaa huaa mujh se badlaa lene kaa us kaa tariqa thaa ki vo raqs kartaa thaa chhaton par zulf lahraataa huaa"

"mu'aaf karnaa ki aur himmat nahin kareinge na ho tamaasha so raqs-e-vahshat nahin kareinge udaas laDkon ko kyon samajhti nahin ye duniyaa udaas laDke kabhi shikaayat nahin kareinge kahaan talak joDein TuuTe dil ko so tai kiyaa hai makaan gire to gire marammat nahin kareinge vo laakh dushman sahi hamaaraa magar usulan jo dar pe aayaa to ham fazihat nahin kareinge"

"kuchh baahar kuchh bhitar bhitar rote hain 'ishq mein paDne vaale aksar rote hain megh garajte hain aur baarish hoti hai dharti par jab mast qalandar rote hain tere hijr mein hanste bhi hain gaate bhi kaisaa paagal-pan hai mil kar rote hain ham ko to kuchh machhvaare batlaate hain jhilein dariyaa aur samundar rote hain kuchh logon par hoti hai rab ki ne'mat qismat vaale hain jo khul kar rote hain ronaa fan hai jab se ye maa'lum paDaa rone vaale ham se behtar rote hain"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"jaagte hi nazar akhbaar mein kho jaati hai zindagi dard ke ambaar mein kho jaati hai naa-khudaa aql ke patvaar uThaataa hai ki jab kashti-e-dil miri manjdhaar mein kho jaati hai be-sabab sochne vaale kabhi sochaa tu ne aagahi kasrat-e-afkaar mein kho jaati hai uDte rahte hain khayaalaat ke jugnu phir bhi baat kyuun parda-e-izhaar mein kho jaati hai us ke kaamon kaa hai rangin khushaamad pe madaar aur mehnat miri isaar mein kho jaati hai hurmat-e-parda zaruri hai 'ataa-ji' varna chiiz jaisi bhi ho baazaar mein kho jaati hai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"