khvaahishein intizaar aur yaqin — Faisal Nadeem Faisal

"kuchh saliqe se agar chaak ghumaayaa jaataa ain mumkin hai ki shahkaar banaayaa jaataa jaane vaale ne ghalat fahmi mein lauT aanaa thaa be-khayaali mein bhi gar haath hilaayaa jaataa ishq mansur ko khud daar talak le aayaa is se pahle ki koi hashr uThaayaa jaataa lauTne vaalaa isi soch mein mar jaaegaa kaash zanjir ko do baar hilaayaa jaataa rang bharne mein musavvir ne riyaa-kaari ki varna tasvir ko mandir mein lagaayaa jaataa is mein vahshat hai aziyyat hai zabun-haali hai ab ye kirdaar nahin mujh se nibhaayaa jaataa aap to shakl se lagte hain adaakaar mujhe aap jaison ko nahin dost banaayaa jaataa avvalin khat ko jalaa kar vo gunahgaar huaa kaash taazim se dariyaa mein bahaayaa jaataa main ne badli hain rivaayaat puraani varna main bhi 'faisal' kisi paTri se uThaayaa jaataa"

"saraab-o-dasht vahi saarbaan tisraa hai safar ke saath bandhaa imtihaan tisraa hai huzur fahm-o-faraasat se kaam lijiyegaa saDak ke maghribi jaanib makaan tisraa hai ye do jahaan se aage ki ek manzil hai ataa-e-ishq-e-mohammad jahaan tisraa hai azal abad ke nishaan zindagi ke haami hain tabaahiyon ki ibaarat nishaan tisraa hai ham is se pahle bhi guzre hain imtihaanon se paDaav pahlaa sahi imtihaan tisraa hai ye donon kaan to divaar ki amaanat hain jo intihaa-e-yaqin hai vo kaan tisraa hai main dhuup oDh ke niklaa to ye khulaa 'faisal' yaqin dusraa mausam gumaan tisraa hai"

"agarche tum saa banaayaa nahin gayaa huun main magar banaa ke miTaayaa nahin gayaa huun main use ye dukh ki zamin tang qaafiya mushkil mujhe ye dukh ki nibhaayaa nahin gayaa huun main main jis taraf se mukammal dikhaai detaa huun usi taraf se dikhaayaa nahin gayaa huun main ye inkisaari azal se mire khamir mein hai jhukaa huaa huun jhukaayaa nahin gayaa huun main ghurur laazmi unsur thaa is vazaarat kaa so khud haTaa huun haTaayaa nahin gayaa huun main main apni zaat mein ik mo'atabar havaala huun kisi ke saath milaayaa nahin gayaa huun main main masalon mein filistin huun magar 'faisal' kisi jagah pe uThaayaa nahin gayaa huun main"

"mujh par nishaan lagaaiye pahle savaaliye phir masalon ko kholiye aur hal nikaaliye jazbaat aa sake hain kabhi ikhtiyaar mein aankhon ki fikr chhoDiye dil ko sambhaaliye vahshat ne meri niind pe pahre lagaa diye kuchh khvaab meri aankh ki jaanib uchhaaliye vahm-o-gumaan utaar ke pheinke hain aur phir ham ne yaqin ki uun se khirqe silaa liye kam paD rahaa thaa pahle hi kashkol-e-zindagi aur ham ne apni zaat ke gham bhi uThaa liye kuchh log gaanv chhoD ke shahron mein jaa base baaqi ko intizaar ki dimak ne khaa liye 'faisal' vo phir bhi aankh pe zaahir nahin huaa parde bhi darmiyaan se saare uThaa liye"

"kuchh aisaa rabt musalsal rahaa shuur se bhi ki khauf aane lagaa ishq ke vafur se bhi vo shash-jahaat se yaksaan dikhaai detaa hai use qarib se dekhaa hai aur duur se bhi hamaaraa ishq haqiqat mein ghaar-e-saur-o-hiraa agarche khaas aqidat hamein hai tuur se bhi sunaa hai khaas taalluq hai khaarjiyat kaa hamaari zaat ke kuchh daakhli umuur se bhi tabhi to zehn pe haavi hai ishq-e-sahraai azal se dil ke maraasim rahe khajur se bhi ye aur baat hai maano ki ikhtilaaf karo nishaaniyaan to hazaaron milin zabur se bhi lahu mein raqs-kunaan ishq hai mire 'faisal' juDaa huaa hai koi silsila qusur se bhi"

"mujh diye par ye ik ataa rahi hai khud muhaafiz miri havaa rahi hai log sahme hue hain hijrat se dhuul chehron pe muskuraa rahi hai tere imaan kaa khudaa-haafiz tu use naam se bulaa rahi hai shor har gaam kaamyaab rahaa khaamushi gham mein mubtalaa rahi hai vaqt par kaar ban gayaa so yahaan bebasi daaere banaa rahi hai is taalluq pe maut vaajib thi dosti darmiyaan aa rahi hai tere mutalaashiyon ki khair jinhein tirgi raaste bataa rahi hai is kaa radd-e-amal bhi dhyaan mein rakh tu agar masala uThaa rahi hai ham gharibon ki umr bhar 'faisal' pahli tarjih bas anaa rahi hai"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"