phir mujhe kaun-o-makaan dasht-o-bayaabaan se lage — Ehsan Akbar

"kisi se apni khabar ham vasul kyaa karte khud aainon kaa bhi ehsaan qubul kyaa karte vo khet khet rahin jin ki khaar-daar safein unhi mein phuul the do chaar phuul kyaa karte tamaam jaanon ke dushman tamaam haath hue ye ummatein thiin ab un ke rasul kyaa karte ye koi umr thi teri mohabbaton vaali saron ki raakh mein shaamil ye dhuul kyaa karte tumhaare jaisaa koi naqsh har nigaar mein thaa magar the ham bhi bahut baa-usul kyaa karte unhein ki jin se baDi choT kar gai thi hayaat ab aur pursish-e-gham se malul kyaa karte jahaan thaa toDnaa dastur kaa bhi ik dastur vahaan hamaare tumhaare usuul kyaa karte ham aise log jo khvaabon ke chalne vaale the sahar se ajr-e-masaafat vasul kyaa karte"

"khabar nahin ki koi kis ke intikhaab mein hai magar jo shakhs kal ubhregaa mere khvaab mein hai jahaan vaalon ke laakhon idhar udhar ke javaab hayaat kaa to savaal aadmi ke baab mein hai hamein na gherti shaayad ye chaar-divaari magar ye khaak jo is aalam-e-kharaab mein hai khud apne par jo gae hain vo tifl kaun se hain vo nasl kaisi hai jis kaa jahaan azaab mein hai nae jahaan ke meamaar pahle guzreinge phir us ke baad vo duniyaa jo sirf khvaab mein hai ajab se naqsh main divaar-o-dar pe dekhtaa huun bas aane vaale hain jin kaa sukhan kitaab mein hai"

"phir mujhe kaun-o-makaan dasht-o-bayaabaan se lage ru-ba-ru kaun thaa jo aaine hairaan se lage kuchh thi kam-hauslagi apni thi kuchh be-basari kuchh hamein ishq ke hangaame bhi aasaan se lage zindagi mere izaafe mujhe vaapas kar de jhaaD de khaar jo naahaq tire daamaan se lage vaqt kaTtaa rahaa thaa ahd-e-huzuri ki firaaq zakhm lagte rahe chaahe kisi unvaan se lage ziist ham haar ke bhi haath milaaein tujh se apne ye hausle shaayad tujhe be-jaan se lage"

"kulaah-e-kaj badal jaati hai yaa afsar badaltaa hai abhi khultaa nahin kyaa vaqt kaa tevar badaltaa hai ye dekhaa hai ki mehvar istavaa uupar badaltaa hai falak sadiyon puraani nilgun chaadar badaltaa hai dilon mein soz-e-gham vaale dhuein bhi aarzuein bhi ajam vaalaa musalmaan har sadi mein ghar badaltaa hai nishaan-karda gharon ko chhoD bhaage ghar jo lauTe hain to dekhaa pichhli shab dahliz kaa number badaltaa hai har ik firaun ke ahvaal-e-gharqaabi judaagaana kabhi dariyaa badaltaa hai kabhi lashkar badaltaa hai zamaana ehtiraaman ghuum jaataa hai usi jaanib jo achchhaai ko ik insaan ratti bhar badaltaa hai ham ab maghrib ke dast-aamoz duniyaa ko nahin lagte ug aaein baal-o-par apne to baal-o-par badaltaa hai koi darvaaza bhitar ki taraf khultaa nahin 'ehsaan' vahi andar ki kaalak hai faqat baahar badaltaa hai"

"har ek gaam pe had har qadam dar-o-divaar fazaa-e-shahr bani besh-o-kam dar-o-divaar yahi the sahn-e-fazaa aur yahi ghar aangan thaa tum aae ho to hue muhtsham dar-o-divaar ham apne dard havaaon se bhi nahin kahte uThaae phirte hain khud apne gham dar-o-divaar ye reg-zaar hai aur is ki apni duniyaa hai yahaan hamesha rahe kam se kam dar-o-divaar havaa vatan ki palaT aai baadbaan ke saath vahi yahaan bhi fazaa aashram dar-o-divaar nazar ke aage nahin par nazar mein zinda hain schōl baste gharaunde qalam dar-o-divaar gae jahaan bhi vahin shahr bas gayaa 'ehsaan' azal se apne rahe ham-qadam dar-o-divaar"

"aaina aaina kyuun kar dekhe apne hi daagh nazar bhar dekhe tum ne jalve ko bhi chhunaa chaahaa ham ne khushbu mein bhi paikar dekhe aap insaan huaa surat kaa asiir shisha TuuTe to sikandar dekhe ham ne aavaaz lagaai sar-e-tur ruup jab shauq se kamtar dekhe jalva-e-tur bajaa thaa lekin aankh mushtaaq thi paikar dekhe dard ko khauf bikhar jaane kaa aankh ko shauq ki baDh kar dekhe mustaqil sab kaa pata ek hi thaa kis ne faghfur-o-sikandar dekhe"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"shab ki taarik raahdaari hai aur miraa khauf iztiraari hai sabz khvaabon ki kam se kam qimat zindagi bhar ki ashk-baari hai ik musallat-shuda tamaddun ko ye na kahiye ki ikhtiyaari hai shash-jihaati mushaahida hai miyaan tajrabon ki sanad pe bhaari hai shukriya aap ki mohabbat kaa dil kaa maqsum sogvaari hai tajziye sun ke muskuraa denaa apni itni hi zimmedaari hai"

"ye hai mai-kada yahaan rind hain yahaan sab kaa saaqi imaam hai ye haram nahin hai ai shaikh ji yahaan paarsaai haraam hai jo zaraa si pi ke bahak gayaa use mai-kade se nikaal do yahaan tang-nazar kaa guzar nahin yahaan ahl-e-zarf kaa kaam hai koi mast hai koi tishna-lab to kisi ke haath mein jaam hai magar is pe koi kare bhi kyaa ye to mai-kade kaa nizaam hai ye janaab-e-shaikh kaa falsafa hai 'ajib saare jahaan se jo vahaan piyo to halaal hai jo yahaan piyo to haraam hai tujhe apne husn kaa vaasta mere shauq-e-did pa rahm khaa zaraa muskuraa ke naqaab uThaa ki nazar ko shauq-e-salaam hai na sunnaa to huur o qusur ki ye hikaayatein mujhe vaa'izaa koi baat kar dar-e-yaar ki dar-e-yaar hi se to kaam hai na to e'tikaaf se kuchh gharaz na savaab-o-zuhd se vaasta tiri diid aisi namaaz hai na sujud hai na qayaam hai ye durust ki 'aib hai mai-kashi ye ba-jaa ki baada haraam hai magar ab savaal ye aa paDaa ki tumhaare haath mein jaam hai jo uThi to subh-e-davaam thi jo jhuki to shaam hi shaam thi tiri chashm-e-mast mein saaqiyaa miri zindagi kaa nizaam hai miraa farz hai ki paDaa rahun tiri baargaah mein saaqiyaa koi tishna-lab hai ki sair hai yahi dekhnaa tiraa kaam hai isi kaaenaat mein ai 'jigar' koi inqalaab uThegaa phir ki buland ho ke bhi aadmi abhi khvaahishon kaa ghulaam hai"