rashk is baat pe mar jaataa hai — Dakhlan Bhopali

"ghazal kahein to vahi daastaan niklegi har ek sher mein aah-o-fughaan niklegi safar ki mushkilein rone kaa faaeda kyaa hai ki jaate jaate hi meri thakaan niklegi jabin ke niche do kashti mein baandh li hai nadi zarur legi ye ik din ufaan niklegi ye saare tanz ye taane ye rishte naate sab kahaan chhupeinge jo meri zabaan niklegi vo jis ne khud pe rivaayat kaa rakh liyaa hai qafas vo ek laDki meraa aasmaan niklegi main chand lamhe agar ziist se haTaa duun to ye meri zindagi bas khaak-daan niklegi ye zabt sabr tabassum hue hain chaak sabhi main sakht jaan huun lekin ye jaan niklegi"

"faiz samjhe the jise thaa vo ziyaan hairat hai ye mohabbat hi mire dil ko garaan hairat hai guzre lamhaat kaa aankhon mein pighalnaa hairat uf tiri yaad ki ye tarz bayaan hairat hai ek raajaa ne utaari thi zamin par gangaa ik nadi dukh mein hai aankhon se ravaan hairat hai ham jise duniyaa samajh baiThe the ik muddat se shakhs niklaa vo faqat ek gumaan hairat hai ek laDki jo mere haafize se ghaaeb thi aaj phir siine mein hai raqs kunaan hairat hai"

"hamaari ruuh ko chhukar guzar gayaa hai abhi vo ek lamha na jaane kidhar gayaa hai abhi ki daur-e-ishq mein us kaa bhi ek jism to thaa mujhe hai shak vo fazaa mein bikhar gayaa hai abhi khazaane DhunDhtaa hai vo agar to le jaae hamaari aankh se zaaea guhar gayaa hai abhi jabin pe lahrein thiin bhitar badan mein tufaan thaa khudaa kaa shukr hai dariyaa utar gayaa hai abhi tamaam umr diye main ne vaqt ko taane abhi sukun hai thoDaa sudhar gayaa hai abhi"

"vo bas rassa-kashi thi mohabbat thak chuki thi do kashti mein nadi thi zamin viraan si thi achaanak kyaa ghaTaa thaa mujhe hairaangi thi nazar bhar us ne dekhaa main samjhaa paarkhi thi kiyaa sone ko miTTi ghazab kuza-gari thi bachaataa kaun ham ko jabin par shal likhi thi hamein jis ne Duboyaa hamaari saadgi thi masaafat khatm thi par thakan zinda khaDi thi havaa zahrili thi par badan mein chal rahi thi jise samjhe the jiinaa faqat vo khud-kushi thi main bas thaa nim-bismil mohabbat mar chuki thi"

"abhi abhi huaa ham tirgi se nikle hain jahaan-e-ishq ki andhi gali se nikle hain kisi se kahte to ilzaam apne sar aataa ye haadisa thaa so ham khaamushi se nikle hain hamein yaqin nahin hai kisi dikhaave mein so samt-e-hijr mein ham saadgi se nikle hain nahin hai qaid kisi daaere mein apni zaat jahaan bhi nikle hain aavaargi se nikle hain hamaari aankh mein tinkaa paDaa hai aandhi se kaho na ashk ye bechaargi se nikle hain hamein banaae jo shaair nahin banaa vo gham hamaare sher to naaraazgi se nikle hain nazir ban chuke hain raah-e-ishq ki 'dakhlan' ye koi piir hain divaangi se nikle hain"

"ujDe hue jahaan bahut vaqt ho gayaa zinda hai bas thakaan bahut vaqt ho gayaa ik qaul thaa ki saath jiyeinge mareinge ham badle hue bayaan bahut vaqt ho gayaa sun fasl ishq ki miri barbaad ho gai kab tak bharun lagaan bahut vaqt ho gayaa ham khaandaani log anaa se bhare hue bikhraa hai khaandaan bahut vaqt ho gayaa khaana-ba-dosh ruuh to khanDar mein qaid hai TuuTe hue makaan bahut vaqt ho gayaa ham se lipaT ke rone ko hi aao ek din roe hue bhi jaan bahut vaqt ho gayaa jannat kaa aadmi huun zamin pe udaas huun kuchh soch aasmaan bahut vaqt ho gayaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"chaahe khoTe hain yaa khare hain ham Dast-e-qudrat ke laaDle hain ham 'aks-e-rafta ko dekhiye saahib kitne maa'sum lag rahe hain ham raat jivan kaa giit gaati hai khvaab-e-tanvim dekhte hain ham 'umr lag jaaegi sanbhalne mein kis bulandi se yuun gire hain ham ek hangaam hai taghayyur kaa kunj-e-nisyaan mein paDe hain ham ab bhi mehndi kaa rang gahraa hai sandalin haath par rache hain ham ik tamaashaa hai kaar-zaar-e-hayaat dekh kar ser ho chuke hain ham jhilmilaate hain aarzu ke kanval dil-jharoke se jhaankte hain ham"