sar-kashi vusat-o-pahnaai tak — Aarij Meer

"har gaam pe haalaat se ik naqsh banaa hai ehsaas miraa chaaron taraf phail gayaa hai main bhi huun tahi-dast kharidaaron ki saf mein basti mein miri misr kaa baazaar lagaa hai chaahegaa bhalaa kaun ho divaaron kaa qaidi taqdir magar bair havaaon se paDaa hai barte hue alfaaz mire sher na chhuein haalaat nae hain miraa ehsaas nayaa hai maujein mire paanv se dabi ret na le jaaein armaan ke saahil pe koi soch rahaa hai har moD pe main khud se milaa haath pasaare main ne hi miri soch pe har vaar kiyaa hai"

"bas gai aa ke aankhon mein shaam-e-adn jagmagaate badan rang-e-rukh pairahan sahmi sahmi kiran sabz akhlaaq ki khurdure peD be-barg halki chubhan sarsaraati hui ret karti hai chheD kasmasaane lage sipiyon ke badan khushk aavaara phirtaa huaa gard-baad muntashir raah mein shor-e-zaagh-o-zaghan dhuup rangoliyon mein bhare raushni jagmagaataa huaa aarzu ka chaman"

"dharti ki zabaan suukh gai zard hui ghaas aakaash se imsaal utarti hai faqat pyaas aabaad hui shaam ki raunaq mire ghar mein saDkon pe bhaTaknaa mujhe kyon aaegaa ab raas haathon mein hai fursat ki guthaa ziist kaa lachchhaa yaaron kaa sar-e-shaam huaa lawn pe ijlaas ab jaaun kahaan chhat se Tapakti hain balaaein ab kis kaa bharosaa huaa ghar ghar se nahin aas manzar hain sabhi mere dil-e-binaa pe raushan ghurbat mein miraa shahr bhi hotaa hai mire paas"

"sadiyon se shab-o-roz yahi soch rahaa huun main kaun khudaa kaun hai main bhuul gayaa huun aise mein umangein hi zaraa saaz uThaaein dahliz pe phir se main iraadon ki khaDaa huun har chand bhaTaknaa paDaa baazaar mein barson har shakl ki tasvir magar khinch chukaa huun aae na yaqin aae kisi aur ko mujh par sahraa-e-khamoshi mein bahut der phiraa huun 'aarij' kabhi utraa huun andheron ke jigar mein suraj ke samundar mein kabhi gharq huaa huun"

"apni baaton ko tolnaa hogaa yaani suraj ko bolnaa hogaa dhuup kamre mein yuun na aaegi uTh ke darvaaza kholnaa hogaa haadse hain shikast-aamaada maut ko sar pe Dolnaa hogaa naqsh bikhraa diye havaa ne sab ek ik zarra rolnaa hogaa aankh vaale se ye taqaazaa hai ek andhaa huun bolnaa hogaa"

"jo naa-shunida rahe lafz aaj boleinge shagufa-haa-e-takhayyul zabaan kholeinge buland Tiile abhi darmiyaan-e-parda hain havaa ik aaegi sab us ke saath ho leinge qadim unchi imaaraat par nasab katbe zamin pe aaein to sochon mein qand gholeinge na haadsaat ki chaadar se Dhak sake asbaab parind jaa ke bulandi pe bhed kholeinge jahaan pe chhaanv hai aaseb Deraa Daale hain na dhuup chhoD ki vo saae mein piro leinge"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"chaahe khoTe hain yaa khare hain ham Dast-e-qudrat ke laaDle hain ham 'aks-e-rafta ko dekhiye saahib kitne maa'sum lag rahe hain ham raat jivan kaa giit gaati hai khvaab-e-tanvim dekhte hain ham 'umr lag jaaegi sanbhalne mein kis bulandi se yuun gire hain ham ek hangaam hai taghayyur kaa kunj-e-nisyaan mein paDe hain ham ab bhi mehndi kaa rang gahraa hai sandalin haath par rache hain ham ik tamaashaa hai kaar-zaar-e-hayaat dekh kar ser ho chuke hain ham jhilmilaate hain aarzu ke kanval dil-jharoke se jhaankte hain ham"