sar ko tan se mire judaa kiije — Meer Mehdi Majrooh

"na vo naalon ki shorish hai na ghul hai aah-o-zaari kaa vo ab pahlaa saa hangaama nahin hai be-qaraari kaa talab kaisi bulaanaa kyaa vahaan khud jaa pahunchte hain agar aalam yahi chande rahaa be-akhtyaari kaa vahaan vo naaz-o-ishve se qadam gin gin ke rakhte hain yahaan is muntazir kaa vaqt pahunchaa dam-shumaari kaa kabhi chashm-e-khumaar-aalud ki masti nahin dekhi bajaa hai hazrat-e-naaseh ko daavaa hoshiyaari kaa bhalaa kyaa aisi roti shakl paas aa kar koi baiThe uThe aakhir vo jhunjhlaa kar buraa ho ashk-baari kaa ajab kyaa hai ki qaasid bhuul jaae us kaa le jaanaa likhun jis naame mein shikva tiri ghaflat-shiaari kaa misaal-e-nakhl dekhaa hai usi ko phulte-phalte kiyaa jis shakhs ne haasil tariqa khaaksaari kaa har ik shai kaa hai andaaza magar paayaan nahin hargiz tiri ghaflat-shiaari kaa miri ummid-vaari kaa zi-bas aankhon mein rangat chhaa rahi hai laala-o-gul ki khizaan mein lutf aataa hai hamein fasl-e-bahaari kaa kabhi sar paanv par rakhnaa kabhi qurbaan kah uThnaa hamein thoDaa saa Dhab aataa to hai matlab-baraari kaa chhupaa kal gosha-e-mai-khaana mein 'majruh' ne dekhaa yunhi shohra sunaa thaa shaikh ki parhez-gaari kaa"

"vo kahaan jalva-e-jaan-bakhsh butaan-e-dehli kyuun ki jannat pe kiyaa jaae gumaan-e-dehli in kaa be-vajh nahin TuuT ke honaa barbaad DhunDe hai apne makinon ko makaan-e-dehli jis ke jhonke se sabaa tabla-e-attaar bane hai vo baad-e-sahar-e-itr-fishaan-e-dehli mehr zar khaak ko kartaa hai ye sach hai lekin is se kuchh baDh ke hain saahab-nazaraan-e-dehli aaina-saaz sikandar hai tu jam jaam-farosh vusat-aabaad hai kis darja jahaan-e-dehli kar ke barbaad use kis ko basaaegaa falak kyaa koi aur bhi hai shahr basaan-e-dehli is liye khuld mein jaane kaa har ik taalib hai ki kuchh ik duur se paDtaa hai gumaan-e-dehli vo sitam dekh chuke the ki rahe aasuda fitna-o-hashr mein aafat-zadagaan-e-dehli samjhe hain su-e-adab jannat-e-saani kahnaa vo kuchh ashkhaas jo hain martaba-daan-e-dehli saili-e-panja-e-jallaad-e-sitam se hai hai nazr-e-be-daad hue muntakhabaan-e-dehli yaa-khudaa hazrat-e-ghaalib ko salaamat rakhnaa ab isi naam se baaqi hai nishaan-e-dehli karbat-e-ghurbat-o-tanhaai-o-shab-haa-e-daraaz aur 'majruh'-e-dil-afgaar bayaan-e-dehli"

"harf tum apni nazaakat pe na laanaa hargiz haath bedaad-o-sitam se na uThaanaa hargiz tum bhi chori ko yaqin hai na kahoge achchhaa ab hamein dekh ke aankhein na churaanaa hargiz ishq hai ek magar aafat-e-nau hai har-dam ye vo mazmun hai ki hogaa na puraanaa hargiz yahi andaaz to hain dil ke uDaa lene ke un ki tum nichi nigaahon pe na jaanaa hargiz sabab-e-qatl-e-mohabbat hai agar ai zaalim to miraa jurm kisi ko na bataanaa hargiz dil-e-khun-gashta kaa ho raaz na ifshaa ai chashm ashk-e-gul-rang kaa Tapkaa na lagaanaa hargiz huun tunak-zarf na jhelungaa sharaab-e-pur-zor parda yakbaar na chehre se uThaanaa hargiz ham se bimaar bhi jaan-bar kahin hote hain masih tum yahaan aa ke na taklif uThaanaa hargiz jins-e-naayaab ke hote hain hazaaron gaahak tum pataa apnaa kisi ko na bataanaa hargiz main to kyaa us se to muusaa bhi na sar-bar aae imtihaanan hamein jalva na dikhaanaa hargiz jo chalaa tir-e-sitam dil se vo guzraa ai charkh teraa khaali na gayaa koi nishaanaa hargiz zikr barbaadi-e-dehli kaa sunaa kar hamdam neshtar zakhm-e-kuhan par na lagaanaa hargiz aab-e-rafta nahin phir bahr mein phir kar aataa dehli aabaad ho ye dhyaan na laanaa hargiz vo to baaqi hi nahin jin se ki dehli thi muraad dhokaa ab naam pe dehli ke na khaanaa hargiz geti-afroz agar hazrat-e-nayyar rahte itnaa taarik to hotaa na zamaanaa hargiz ab to ye shahr hai ik qaalib-e-be-jaan hamdam kuchh yahaan rahne ki khushiyaan na manaanaa hargiz dar-e-mai-khaana huaa band sadaa ye hai buland yaan harifaan-e-qadah-khvaar na aanaa hargiz allaah allaah vo navvaab-e-ulaai ke kalaam jin se rangin nahin bulbul kaa taraanaa hargiz tu to hai 'anvar'-o-'maikash' ki judaai kaa nishaan dil-e-pur-dard se ai daagh na jaanaa hargiz saut-e-bulbul taraf-angez sahi par hamdam dard farsuda dilon ko na sunaanaa hargiz main huun ik majma-e-ahbaab kaa bichhDaa gulchin mujh ko gul-dasta-e-rangin na dikhaanaa hargiz jama hai majma-e-ahbaab fazaa mein teri ai tasavvur ye muraqqaa na miTaanaa hargiz dil mein hain hasrat-o-andoh ke ambaar lage itnaa yakjaa na kahin hogaa khazaanaa hargiz saaqi-e-bazm tiri tarz-e-taghaaful ke nisaar durd-e-mai kaa bhi idhar jaam na laanaa hargiz qahr laaeinge ye taalea jo zaraa bhi chete ai falak khvaab se un ko na jagaanaa hargiz mahfil-e-aish se gar haz ho uThaanaa ai dost ham se aazurda-dilon ko na bulaanaa hargiz daar-e-faani mein na kar fikr-e-qayaam ai naadaan guzar-e-sail hai yaan ghar na banaanaa hargiz jin ke aivaan the ham-palla-e-qasr-e-qaisar un ki miltaa nahin qabron kaa Thikaanaa hargiz vo gae din jo chaman-zaar mein dil lagtaa thaa sach hai yaksaan nahin rahtaa hai zamaanaa hargiz ham-safiraan-e-chaman sab hue garm-e-parvaaz ab khush aataa nahin gulzaar mein jaanaa hargiz zaghan-o-zaagh ki gulshan mein sadaa hai har su murgh-e-khush-naghma na aavaaz sunaanaa hargiz qasr-e-haali ke havaali mein zaraa tum 'majruh' apni DeDh iinT ki masjid na banaanaa hargiz"

"mere dil mein to har zamaan ho tum chashm-e-zaahir se kyuun nihaan ho tum be-vafaaein kaa aib kaisaa hai ye to sach hai ki meri jaan ho tum jab chalo TiTar hi ki chalte ho mere haq mein to aasmaan ho tum dil-o-din donon nazr kartaa huun aisi chizon ke qadr-daan ho tum dekh ghamgin mujhe bigaDte ho par-le darje ke bad-gumaan ho tum arsh-paimaai-e-khayaal abas kaun pahunchaa vahaan jahaan ho tum baat mein dil ko khinch lete ho kis qayaamat ke khush-bayaan ho tum hai savaal aur aur javaab hai aur sach kaho is ghaDi kahaan ho tum bachiye aghyaar ki nazar na lage chashm-e-bad-dur naujavaan ho tum dushmani ham karein to kis kis se ek aalam pe mehrbaan ho tum zulf ke baar se kamar lachke kis qadar naazuk ai miyaan ho tum dekhne ki majaal hai kis ko misl-e-khurshid go ayaan ho tum hai vahi Thiik jo kaho 'majruh' kyuun na ho saahab-e-zabaan ho tum"

"jaanaa zi-bas zarur thaa us jalva-gaah mein ham dair-o-kaa'ba chhoD gae donon raah mein jab bosa le liyaa to nahin gaaliyon kaa ranj taa'zir mahv ho gai shauq-e-gunaah mein bikhre hain phuul idhar to dhare hain udhar ko jaam hai bu-e-itr-e-fitna tiri khvaab-gaah mein suufi na khaanqaah mein nai rind dair mein majmaa hai ik jahaan kaa tiri jalva-gaah mein 'majruh' kahiye main na hansun-bolun taa-ba-kai tum to sadaa rahoge isi aah-aah mein"

"asar aah kaa gar dikhaaeinge ham abhi khinch kar tum ko laaeinge ham zaraa rah tu ai dasht-e-aavaargi tiraa khuub khaaka uDaaeinge ham fasaana tiri zulf-e-shab-rang kaa baDhegaa jahaan tak baDhaaeinge ham vahi dard-e-furqat vahi intizaar bhalaa mar ke kyaa chain paaeinge ham vo gumraah ghairon ke hamraah hai use raah par kyuun ki laaeinge ham qafas se huaa izn-e-parvaaz kab ye khvaahish hi dil se uDaaeinge ham tilism-e-mohabbat hai 'aashiq kaa haal unhein bhi ye qissa sunaaeinge ham vo nakhvat se hain aasmaan se pare kahaan se unhein DhunDh laaeinge ham na kar aah ye shorish-afzaaiyaan tujhe bhi kabhi aazmaaeinge ham na TuTegaa sar-rishta-e-ikhtilaat vo khincheinge jitnaa baDhaaeinge ham ye maanaa ki ho rashk-e-hur-o-pari magar aadmiyyat sikhaaeinge ham hazar tir-e-mizhgaan ki bochhaaD se ye ik dil kahaan tak bachaaeinge ham hamein zahr-o-khanjar ki kyuun hai talaash shab-e-gham mein kyaa mar na jaaeinge ham na niklaa koi Dhab to ban kar ghubaar nazar mein tumhaari samaaeinge ham kahaan ghar mein muflis ke farsh-o-farosh vo aae to aankhein bichhaaeinge ham tire qad se ki sarv ne ham-sari use aaj sidhaa banaaeinge ham nahin ghusl-e-mayyat ki jaa qatl-gaah magar khaak-o-khun mein nahaaeinge ham rah-e-'ishq se naa-balad hai abhi khizar ko ye rasta bataaeinge ham huaa vasl bhi to mazaa kaun saa vo ruTheinge har dam manaaeinge ham shab-o-roz dil ko kuredein na kyuun yahin se pataa us kaa paaeinge ham 'abas hai ye 'majruh' tul-e-amal bakheDe ye sab chhoD jaaeinge ham"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"