shab-e-firaaq mein aahon ko niind aa rahi hai — Amaan Haider

"us ke zarraat ko dariyaa ki ravaani karnaa ai miri pyaas zaraa dasht ko paani karnaa baDaa mushkil hai ye aasaan nahin hai logo khud kaa faaqa ho magar rizq-risaani karnaa bhuuk dar dar liye phirti hai vagarna saahib achchhaa lagtaa hai kise naql-e-makaani karnaa toDne denaa hadein rasm-o-rivaajon ki hamein ham nae logon se mat baat puraani karnaa us ki khushbu se dar-o-baam mahak uTTheinge kaasht aangan mein kabhi raat ki raani karnaa apne lahje se to bas phuul baraste hain miyaan ham ko aataa hi nahin talkh-bayaani karnaa bas lughat-saaz hi alfaaz samajh paate hain itnaa aasaan nahin tafsir-e-ma'aani karnaa she'r mein rakkho agar misra'-e-ulaa mein mujhe meri tanhaai ko phir misra'-e-saani karnaa ham qalamkaar hain shaa'ir hain moarrikh hain 'amaan' ham se sikhe koi lafzon ko kahaani karnaa"

"dast-bardaari-e-taa'lim nahin ho sakti fikr apni kabhi do-nim nahin ho sakti dostaa apni gharibi kaa bahaanaa na banaa kyaa ghizaa faaqon mein taqsim nahin ho sakti kuchh sukhan-fahm hi ash'aar samajh paate hain sab se tashrih-e-mafaahim nahin ho sakti kyaa kahaa dasht mein shamshir se khaaif the gale baat ye qaabil-e-taslim nahin ho sakti kis ko kyaa denaa hai ye sirf khudaa jaantaa hai vo nahin chaahe to taa'zim nahin ho sakti ye jo allaah ne chaudah ki banaai hui hai is se behtar koi tanzim nahin ho sakti kitni hi 'itr-e-mavaddat mein nahaa le lekin alqamaa kausar-o-tasnim nahin ho sakti apne akbar ko bhi qurbaan kareinge shabbir khatm tahrik-e-baraahim nahin ho sakti"

"'amaan' apni tarah aashnaa-e-fan to nahin nashist-e-jaan mein koi apnaa ham-sukhan to nahin nikal ke hujra-e-tanhaai se kisi se 'ishq tumhaare kahne pe karte hain apnaa man to nahin buraa na maan magar puchhnaa to paDtaa hai ki bevafaai kahin tujh mein fitratan to nahin ye tu ne 'ishq jataayaa to main ne maan liyaa hamaare biich magar aisaa ghaaliban to nahin qasam sabaa ki ye khushbu hai jaani-pahchaani gulon ke jism pe teraa hi pairahan to nahin kyon aaj manzar-e-shab itnaa sahmaa-sahmaa hai kisi charaagh ki zad par havaa kaa tan to nahin hai Tuut jaane ke khadshe mein yaad ki kashti furaat-e-furqat-e-jaan aaj maujzan to nahin sadaaein aati hain jangal se aah-o-zaari ki pata karo ki parindon ki anjuman to nahin"

"kaam anjaam diye sab se niraale ham ne mom se haathon mein angaare uchhaale ham ne ek din bhuuk ne ghurbat kaa tamaasha dekhaa ek din paani mein patthar jo ubaale ham ne ham ne khud se bhi ghulaamon saa ravayya rakhaa shaahzaadi tire ahkaam na Taale ham ne dil ko mahfuz kiyaa vahshat-o-viraani se khud haTaae hain tiri yaad ke jaale ham ne ham se saail ki musibat nahin dekhi jaati bhiik mein de diye suraj ko ujaale ham ne baanT di un ke tavassul se hi khaaron ko ghizaa kaam mein le hi liye paanv ke chhaale ham ne haath phailaae nahin ghair ke darvaaze par tujh se ummid rakhi paalne vaale ham ne"

"miThe hain be-hisaab rasile hain sun ke log le jaaeinge darakhton se shahtut chun ke log saabit huaa ki bhabke se zaae' huaa anaaj pichhe paDe hue hain magar phir bhi ghun ke log parvardigaar tu ne banaa to di kaaenaat maanaa samajh na paae agar harf-e-kun ke log jangal ki sair kar ke vo ghar bhi chalaa gayaa aur saaf karte reh gae aankhon se bhunke log logon kaa ik hujum saa rahtaa hai aas-paas zulfon se kham nikaalte rahte hain un ke log sardi baDhi to jaaegaa meri taraf ko dhyaan sanduq mein rakheinge abhi mujh ko bun ke log shahr-e-sukhan mein hogaa na lahja 'amaan' saa hargiz nahin mileinge tumhein meri dhun ke log"

"'uryaan talvaaron kaa be-sud fusun hai yuun hai jalva-gar aaj bhi mazlum kaa khuun hai yuun hai sar qalam kar ke bhi khanjar ko hai bechaini si ham ko neze ki bulandi pe sukun hai yuun hai baat karte hain sar-e-daar zabaan kaTne par 'ishq mein apnaa bhi andaaz-e-junun hai yuun hai jis kaa jibril nigahbaan hai us chaukhaT par sirf ye sar hi nahin dil bhi nigun hai yuun hai us ki marzi pe hai mauquf nizaam-e-duniyaa tu ne puchhaa thaa 'ali laazmi kyon hai yuun hai bech dete ho hukumat ko amaame apne aur mimbar se kahaa karte ho yuun hai yuun hai jaan bhi lete zaraa tabsira karne vaale shaa'iri shauq hai taskin-e-darun hai yuun hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"