sharik-e-haal-e-dil-e-be-qaraar aaj bhi hai — Aleem Akhtar Muzaffarnagri

"sabab-e-tark-e-mulaaqaat koi hai to sahi na sahi baat magar baat koi hai to sahi khu-e-taslim-o-razaa ho ki mohabbat kaa fareb gham-e-jaanaan ki mukaafaat koi hai to sahi kuchh ta'alluq na sahi phir bhi ba-majburi-e-shauq maail-e-pursish-e-haalaat koi hai to sahi munfa'il apni jafaaon pe koi hai shaayad chashm pur-nam hai nai baat koi hai to sahi haae vo be-rukhi-e-husn ki jis mein pinhaan pahlu-e-husn-e-muraa’aat koi hai to sahi rukh-e-raushan se numaayaan hain sahar ke aasaar shaam-e-gesu mein nihaan raat koi hai to sahi pir-e-mai-khaana kahin hazrat-e-'akhtar' to nahin dekhnaa rind-e-kharaabaat koi hai to sahi"

"zindagi manzil-e-mauhum ko paane ki lagan maut kahte hain jise jehd-e-musalsal ki thakan kyaa hai ye kaifiyat-e-mausam-e-gul-pairaahan na kahin baad-e-bahaari na kahin bu-e-sukhan yuun farozaan nazar aati hai mohabbat ki kiran jaise ik ghor andhere mein charaagh-e-raushan ham jo aae hain gulistaan se jhaTak kar daaman kyaa pareshaan nazar aati hai nasim-e-gulshan jism-e-aadam pe hai zartaar libaas-e-ikhlaas aadmiyyat hai magar laasha-e-be-gor-o-kafan ab mire naqsh-e-kaf-e-paa hain nishaan-e-manzil kaam kuchh aa hi gayaa shauq kaa divaana-pan khalvat-e-dil mein ab apnaa bhi guzar mushkil hai Daal di tere tasavvur ne ye kaisi chilman kyaa kisi aarzu-e-shauq ne dam toD diyaa aaj mahsus-e-rag-e-jaan hai jo halki si chubhan nigah-e-dost ki begaana-ravi ke sadqe in dinon meri vafaa ko hai talaash-e-dushman ham saa barbaad-e-bahaaraan bhi na hogaa koi na koi shaakh-e-nasheman na qafas hai na chaman kyaa tamaashaa-e-nazar hain ye tere divaane kabhi namnaak-nigaahi kabhi abru pe shikan ham se kuchh rasm-e-ta’alluq hi nahin hai na sahi phir bhi begaana-e-ehsaas-e-ta’alluq to na ban ham ki begaana-e-arbaab-e-jahaan hain 'akhtar' na koi dost zamaane mein na koi dushman"

"dil gudaaz shisha bhi sang bhi hai aahan bhi paikar-e-mohabbat bhi dost bhi hai dushman bhi ham bhare gulistaan se phuul hi nahin laae jab uThe to kaanTon se bhar liye hain daaman bhi gesuon ki chhaaon mein dhuup si hai bhaadon ki zulf ki ghaTaaon mein jhumtaa hai saavan bhi justuju-e-be-paayaan kaamgaar-e-manzil hai justuju-e-behad hi raahbar bhi rahzan bhi"

"gham de ke apnaa phir koi bahlaa gayaa hai dil kyaa baat thi ki dil ko jo samjhaa gayaa hai dil baaton mein phir kisi ki miraa aa gayaa hai dil kitnaa baDaa fareb magar khaa gayaa hai dil un ki adaa-e-khaas pe kyaa aa gayaa hai dil khud jalva-e-jamaal ko taDpaa gayaa hai dil khalvat-nashin hai koi ba-sad-husn-e-ehtiyaat yaa shauq-e-aarzu se basaayaa gayaa hai dil ye kyaa maqaam-e-gham hai na jaane ki in dinon aksar tire khayaal se ghabraa gayaa hai dil gham se bhi be-niyaaz khushi se bhi be-niyaaz kyaa kushtagaan-e-gham kaa banaayaa gayaa hai dil ab intihaa-e-dard-e-mohabbat hai zindagi un ke khayaal-e-shauq pe kyaa chhaa gayaa hai dil teri jafaa ne hausla-e-gham baDhaa diyaa zulm-o-sitam se daad-e-vafaa paa gayaa hai dil vo yaad ban gai hai miri gham-gusaar-e-shauq jab bhi gham-e-hayaat se uktaa gayaa hai dil kyon ho gayaa hai 'aalam-e-imkaan udaas udaas 'akhtar' kabhi malul jo paayaa gayaa hai dil"

"vo kyaa gae payaam-e-safar de gae mujhe ik jazba-e-junun-e-asar de gae mujhe har samt dekhti hai jo un ke jamaal ko vo ik nigaah-e-jalva-nagar de gae mujhe har-chand karb-e-marg hai mahsus har nafas lutf-e-hayaat-e-ishq magar de gae mujhe tasvir-e-huzn-o-yaas banaa kar chale gae lab-haa-e-khushk o dida-e-tar de gae mujhe bedaar kar gae sahar-o-shaam-e-zindagi aah-o-fughaan-e-shaam-o-sahar de gae mujhe jamti nahin nigaah kisi chiiz par bhi ab ik khiragi-e-taab-e-nazar de gae mujhe arz-e-hadis-e-shauq pe sharmaa ke rah gae kitnaa hasin javaab magar de gae mujhe mere sukun-e-qalb ko le kar chale gae aur iztiraab-e-dard-e-jigar de gae mujhe mahrum-e-shash-jahaat nigaahon ko kar gae bas ik nigaah-e-jaanib-e-dar de gae mujhe 'akhtar' vo aae aur chale bhi gae magar ik lutf-e-iztiraab-e-asar de gae mujhe"

"dil ko shaaista-e-ehsaas-e-tamannaa na karein aap is andaaz-e-nazar se mujhe dekhaa na karein yak-ba-yak lutf o inaayat kaa iraadaa na karein aap yuun apni jafaaon ko tamaashaa na karein un ko ye fikr hai ab tark-e-taalluq kar ke ki ham ab pursish-e-ahvaal karein yaa na karein haan mire haal pe hanste hain zamaane vaale aap to vaaqif-e-haalaat hain aisaa na karein un ki duz-dida-nigaahi kaa taqaazaa hai ki ab ham kisi aur ko kyaa khud ko bhi dekhaa na karein vo taalluq hai tire gham se ki allaah allaah ham ko haasil ho khushi bhi to gavaaraa na karein is mein poshida hai pindaar-e-mohabbat ki shikast aap mujh se bhi mire haal ko puchhaa na karein na rahaa teri mohabbat se taalluq na sahi nisbat-e-gham se bhi kyaa khud ko pukaaraa na karein main ki khud apni vafaaon pe khajil huun 'akhtar' vo to lekin sitam o jaur se taubaa na karein"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"murattab aur bhi ik goshvaara ho rahaa hai to kyaa hai gar abhi ham ko khasaara ho rahaa hai hamaare paas to ham se ziyaada tu nahin thaa so tu kyaa ab to khud se bhi kinaara ho rahaa hai hamaare khvaab mein ahmiyat-e-shab thi ziyaada so ab vo khvaab aankhon mein sitaara ho rahaa hai tumhaari aarzu hone se pahle bhi to ham the guzaara ho rahaa thaa so guzaara ho rahaa hai hayaa-aalud aankhein hain na aanchal hai na chilman ye kis viraan duniyaa kaa nazaara ho rahaa hai abhi ham faisla karne ki ujlat mein nahin hain magar lagtaa hai jiine se khasaara ho rahaa hai khalaa se is zamin par sang-rezo ki ye baarish kisi jaanib se kyaa koi ishaara ho rahaa hai"