tumhaare jaane kaa ham ko malaal thoDi hai — Nadim Nadeem

"mere kaandhon pe rahe karte rahe sunvaai par farishton ne miri baat nahin pahunchaai dauDti haanpti aai thi udaasi mujh tak mere siine se lagi aur zaraa sustaai zindagi thak nahin sakti hai ki chalnaa hai ise dar-ba-dar ghumti rahti hai miri Thukraai aaina bas vo dikhaataa hai jo ham chaahte hain aur ham kab hi dikhaate hain ise sachchaai do khalaa ek baraabar hain mire siine mein jabki mumkin hi nahin ek ki bhi bharpaai rone vaalo zaraa aavaaz ko nichaa rakkho kyaa mazaa aaegaa aavaaz agar bharraai ek ham khud ke hain ik ghar ke hain ik duniyaa ke tum agar paa bhi sakoge to hamein chauthaai"

"baiThe hain sar-e-baam-e-falak zulf bikhere jaise ki kahin Daale hon banjaaron ne Dere is darja na bad-zan ho miri jaan tu ham se ham jo bhi hain jaise bhi hain mehmaan hain tere kyuun ham se mile koi ki hote hain hamesha sar-sabz darakhton pe parindon ke basere kuchh din to phansaa kar rakhaa main ne use khud mein phir saath nahin rah saki tanhaai bhi mere ham shahr-e-tamannaa se agar kuuch karein to aa aa ke tamaashaai lagaa lete hain ghere"

"dilon ke khel mein bhi kaam le liyaa dimaagh se churaa liyaa hai phuul main ne zindagi ke baagh se vo jaantaa hai khaamushi se raaste nikaalnaa savaal kyaa karein bhalaa ham aise khush-dimaagh se tumhaari chhaaon paa ke dil kuchh itnaa mutmain hai ab na manzilon se kaam hai na raah ke suraagh se bikhertaa hai raushni ridaa-e-aasmaan se vo sitaare jaise oDhni mein paD gae hon daagh se main rang rang thaa udaasiyon kaa koi qaafila main nuur nuur huun tumhaare 'ishq ke charaagh se"

"misl-e-mahtaab khule jab vo ikahraa chehra dekhne vaalon kaa ho jaae sunahraa chehra jism ki khinchun lakirein to dhuaan uThtaa hai us kaa kaaghaz pe banaa paataa huun chehra chehra niili aankhon se dabe halqe gulaabi rukhsaar us kaa kyaa zikr karein yaar vo Thahraa chehra ahl-e-daanish ki safon mein koi ham saa bhi na thaa kaun paDh paataa bhalaa us kaa vo gahraa chehra ai mire dost mire saath tiri yaadon ki ret itni hai huaa jaataa hai sahraa chehra"

"baur aae hain peDon pe ghar ujDeinge chiDiyon ke baarudon kaa daur hai ye bam girte hain jhulon pe choT lagi thi siine par khuun bahtaa hai nathunon se jaan bachaae phirte hain log aavaara kutton se kiich mein loT ke bhi khush hain chehre dekho suaron ke jis kaa man ho le le kaam ham kolhu ke bailon se kitne haamid lauT aae kachraa biin ke melon se sayyad saahab ki yaari saqqon aur julaahon se"

"bhar bhar ke kulaanchein ye chale chaal hiran ki is man ko bhi lag jaae havaa gar tire ban ki ik raat ki devi ke parastaar hain ham log deti hai misaalein jo tire saanvle-pan ki kyaa rang thaa kyaa ruup thaa kyaa us ke khad-o-khaal khushbu bhi nahin yaad hamein ab to saman ki ik aankh jise dekhnaa achchhaa nahin lagtaa ik dil ki zarurat hi nahin jis ko badan ki ab apne gunaahon ki sazaa kaaT rahe hain aage tire har baat ugal dete the man ki mujrim hai koi paanv paTaktaa hai jigar mein siine mein jo har saans pe zanjir si khanki"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"