rut ke labon par koi du'aa bhi nahin hai — Vikas Sharma Raaz

"dasht-e-tanhaai se guzarne kaa tajraba likh rahaa huun Darne kaa us ki raftaar se to lagtaa hai vo kahin bhi nahin Thaharne kaa niind TuuTi to mujh ko chain paDaa khvaab dekhaa thaa apne marne kaa chakh liyaa hai mujhe udaasi ne zakhm-e-shirin nahin ye bharne kaa tan se patthar bandhe hue hain mire main nahin sath par ubharne kaa"

"saare dukh is dukh mein zam karte rahte hain apne hone kaa maatam karte rahte hain aane vaali rut ki paziraai ke badle jaane vaali rut kaa gham karte rahte hain yakjaa ho jaaein to vahshat ghaT jaati hai so khud ko darham-barham karte rahte hain kaam baDe hote hain ham ko tanhaai mein khaddar lafzon ko resham karte rahte hain muhlik hote hain ye chhoTe-moTe gham bhi jivan ki lau ko maddham karte rahte hain palkein muund ke pahle dasht banaate hain ham aur phir baiThe-baiThe ram karte rahte hain"

"fasil-e-shab pe taaron ne likhaa kyaa main mahv-e-khvaab thaa tum ne paDhaa kyaa fazaa mein ghul gae hain rang kitne zaraa si dhuup se baadal khulaa kyaa havaaon ko ulajhne se hai matlab miri zanjir kyaa teri ridaa kyaa badan mein qaid ho kar rah gai hai hamaari ruuh kaa thaa mudda'aa kyaa shajar ki be-libaasi puchhti hai har ik pattaa giraa thaa be-sadaa kyaa jise bhi dekhiye vo niind mein hai hamaare shahr ko aakhir huaa kyaa charaagh ik dusre se puchhte hain sabhi ho jaaeinge rizq-e-havaa kyaa abhi to raakh honaa hai bahut kuchh abhi se 'raaz' chhaati piTnaa kyaa"

"barg-rezon se rifaaqat hai miri kitni aasaan vazaahat hai miri kyaa vahi ghar jahaan likkhaa hai 'ishq kyaa usi ghar mein sukunat hai miri harf thaa aur sukhan tak pahunchaa qaabil-e-rashk masaafat hai miri dasht-zaadon ko nahin bhaati hai kuchh alag tarh ki vahshat hai miri ek tum hi nahin 'aari mujh se in dinon mujh ko bhi qillat hai miri ab ke vo ranj bahut dukh degaa ab ke jis ranj mein shirkat hai miri"

"phir vahi shab vahi sitaara hai phir vahi aasmaan hamaaraa hai vo jo taamir thi tumhaari thi ye jo malba hai sab hamaaraa hai vo jazira hi kuchh kushaada thaa ham ne samjhaa yahi kinaara hai chaahtaa hai ki kahkashaan mein rahe mere andar jo ik sitaara hai"

"dard-aalud saaz ki aavaaz ye khizaan aur ye hari aavaaz ek nuqte pe jab huaa markuz mujh ko aane lagi miri aavaaz is liye to khalaa mein aayaa huun mujh ko sunni hai lafz ki aavaaz dekh mehraab-e-shab chamak uTThi nur-naqqaash hai miri aavaaz tajraba khaamushi pe thaa meraa aur ijaad ho gai aavaaz shor-e-baazaar se bhi guzraa huun DhunDhne apne kaam ki aavaaz is qadar naqs hai samaa'at mein subh suntaa huun shaam ki aavaaz ab mukammal huaa hai sannaaTaa ab nahin aa rahi koi aavaaz"

"zahe nasib ki imkaan-e-zist ab tak hai tumhaaraa hijr hi unvaan-e-zist ab tak hai kise paDi hai jo aa kar sune kahaani miri mire vujud pe bohtaan-e-zist ab tak hai bahut hi didani manzar thaa meri vahshat kaa tabhi se chaak garebaan-e-zist ab tak hai mohabbaton mein azal se sabhi ne gham hi sahaa mohabbaton mein to nuqsaan-e-zist ab tak hai nikaalaa jis ko baghaavat pe thaa qabile ne nahin maraa vo to mehmaan-e-zist ab tak hai kahaan mileinge sanvaareinge ek duuje ko tiri talab mujhe dauraan-e-zist ab tak hai abhi qalam bhi hai baaqi mire ye misre bhi miri to kuTiyaa mein saamaan-e-zist ab tak hai kabhi bhi yaad musibat mein ghair ko na kiyaa miraa khudaa hi nigahbaan-e-zist ab tak hai"

"vafaa ke daavon pe hans rahaa thaa mujhe nayaa hijr ho gayaa thaa bahut hi bad-shakl nikli duniyaa main pahle parde pe dekhtaa thaa use bataataa thaa meri baatein khudaa miri kaal sun rahaa thaa samajh mein kyaa aataa meraa lahja kisi ki baaton mein aa gayaa thaa utaar pheinki thi shaam sar se abhi to paaraa nahin chaDhaa thaa tum aaj tak ro rahe ho jo gham vo do dinon se ziyaada kaa thaa gharib beva kaa haath thaamaa madine jaane kaa raasta thaa aur us ki haryaanvi zabaan thi aur us ke haathon mein ik ghaDaa thaa ye jumla jo pahle kah diyaa hai ye vasl ke ain baad kaa thaa"

"kisi maqaam se guzre nahin phisaltaa hai jo haq-paraston ke naqsh-e-qadam pe chaltaa hai sunaa hai karne lagaa hai vo raushni taqsim mire charaagh se jis kaa charaagh jaltaa hai fazaa-e-zist pe chhaai hui hai taariki bahut dinon se ye manzar nahin badaltaa hai bisaat itni kahaan hai jo chheDein suraj ko in aandhiyon kaa diyon par hi zor chaltaa hai tumhaare zulm pe chup huun ye zarf hai meraa ubalne ko to miraa bhi lahu ubaltaa hai hamein na kijiye majbur hijraton ke liye darakht apnaa Thikaana nahin badaltaa hai khudaa hi haami-o-naasir hai us kaa ai 'aalam' jo khaa ke baarhaa Thokar nahin sanbhaltaa hai"

"tumhaare vasl kaa lamha bhi yuun guzaaraa thaa zabaan pe she'r thaa siine mein ek aaraa thaa nahin zamin pe akele nahin rahe ham log khudaa ke baa'd koi aur bhi hamaaraa thaa havaa ye puchhti phirti hai har musaafir se utaaq-e-hijr se kis ne diyaa utaaraa thaa tumhaare naam pe hote the din ke hangaame tumhaari yaad ne subhon kaa ruup dhaaraa thaa main ek khvaab mein pahunchaa thaa us kinaare tak vahaan pe chaak thaa kuuze the aur gaaraa thaa vagarna main kahaan aataa ajal ki baaton mein mujhe to teri mohabbat ne aa ke maaraa thaa isi liye to bulandi nahin mili mujh ko falak se duur mire bakht kaa sitaara thaa main ashk ashk giraataa rahaa nagin 'aarib' magar ye haar pironaa kise gavaaraa thaa"

"kyaa ravish ikhtiyaar kar baiThe be-vafaaon se pyaar kar baiThe jo samajhte nahin hain dil ki zabaan un pe ham dil-nisaar kar baiThe hijr ki raat kaaTe kaTti nahin ek pal ko hazaar kar baiThe taab-e-nazzaara kab thi aankhon mein phir bhi zid baar baar kar baiThe un kaa vaada to sirf vaada thaa jis pe ham eatibaar kar baiThe jaane vaale na aaeinge hargiz log kyon intizaar kar baiThe kar ke izhaar-e-haal un se 'majid' khud ko ham sharmsaar kar baiThe"

"kaun kahtaa hai ki vahshat mire kaam aai hai ye koi aur aziyyat mire kaam aai hai yunhi main tairtaa phirtaa nahin sahraaon mein ek dariyaa ki nasihat mire kaam aai hai log divaana samajhte hi nahin the mujh ko miri bigDi hui haalat mire kaam aai hai varna jannat se kahaan mujh ko nikaalaa jaataa jo nahin ki vo ibaadat mire kaam aai hai aakhir-e-kaar tiraa hijr mayassar aayaa ab kahin jaa ke mohabbat mire kaam aai hai"