ye daagh-e-dil tire rukh kaa javaab ho na sakaa — Sarosh Lucknowi

"fareb-e-kasrat-e-jalva se aashnaa huun main tiri qasam tujhe tanhaa hi dekhtaa huun main qubul jo nahin hoti vo iltijaa huun main kabhi jo bar nahin aataa vo muddaaa huun main mujhe na chheD dukhe dil kaa taajiraa huun main tamaam qissa-e-naakaami-e-vafaa huun main mataaa-e-aam nahin jins-e-be-bahaa huun main parakhne vaale parakh jauhar-e-vafaa huun main rasaaiyaan miri mahdud hain mire dil tak lab-aashnaa nahin vo aah-e-naa-rasaa huun main miri hayaat-e-mohabbat hai be-kasi ki hayaat khud apne haal ko bhi ghair paa rahaa huun main vo raaz-e-faash huun jis par nazar nahin paDti junun kaa bhes hai aur ishq-e-barmalaa huun main rukh-e-hazin se numaayaan hai khastagi dil ki shikast-e-rang-e-tamannaa kaa aaina huun main na koi raah hai meri na koi manzil hai fazaa mein khoi hui duur ki sadaa huun main kahaan pe dekhiye le jaae ishq ki azmat abhi to daur-e-vafaa se guzar rahaa huun main bahaar-e-gul ki shafaq kaa ho manzar-e-rangin tiraa hi naqsh-e-tabassum hai jaantaa huun main khudaa kare ki ye lamhe abad se mil jaaein vo ashk puchhte jaate hain ro rahaa huun main jo tiir ban ke kaleje ke paar hoti hai shikast-e-saaz ki vo aakhiri sadaa huun main jagah hai mere liye khaas qalb-e-qudrat mein dil-e-gharib se nikli hui duaa huun main 'sarosh' mashq-e-gunah bhi kabhi kabhi varna khudi na baDh ke ye kahne lage khudaa huun main"

"kah rahaa thaa main zamaana gosh-bar-aavaaz thaa dil-shikan qisse kaa kitnaa dil-nashin andaaz thaa uf vo daur-husn jab har lamha jaan-e-naaz thaa kam-sini jaane pe machli thi shabaab aaghaaz thaa rukhsat-e-fariyaad par bhi main saraapaa raaz thaa girya thaa be-aab yaksar naala be-aavaaz thaa lan-taraani ki sadaa kaa garm ik andaaz thaa jis ko muusaa jalva samjhe shoala-e-aavaaz thaa husn ki roz-e-azal hangaama-aaraai na puchh raaz thaa khud khud amin-e-raaz khud ghammaaz thaa ek ik zarra mein jalva ek ik jalva hijaab faash ho jaane pe bhi raaz-e-haqiqat raaz thaa haae vo jaataa laDakpan haae vo aataa shabaab naaz mein ik saadgi thi saadgi mein naaz thaa tuur par bijli zamin par gul falak par chaandni muskuraane kaa tire har jaa nayaa andaaz thaa uD ke pahunchi ruh-e-gulshan tan qafas mein rah gayaa qaid hone par bhi main kitnaa subuk-parvaaz thaa taaqat-e-parvaaz raasha ban ke rukhsat ho gai aazim-e-parvaaz phir bhi aazim-e-parvaaz thaa"

"javaani kaar-farmaa-e-mohabbat hoti jaati hai qayaamat mein bapaa taaza qayaamat hoti jaati hai mohabbat aaina-daar-e-haqiqat hoti jaati hai miri nazron mein har shai khubsurat hoti jaati hai vahi hain roz-o-shab par tira-qismat hoti jaati hai har ik subh-e-masarrat shaam-e-hasrat hoti jaati hai har ik khvaahish har ik ummid rukhsat hoti jaati hai mohabbat ke liye un se mohabbat hoti jaati hai kabhi raaz-e-tarab ki justuju thi ab ye 'aalam hai khushi ke naam se bhi dil ko nafrat hoti jaati hai sukun to miT chukaa betaabiyaan bhi miTti jaati hain dil-e-zinda ki takmil-e-shahaadat hoti jaati hai ragein khinchti hain dil siine se baahar niklaa aataa hai gale mil mil ke un ki yaad rukhsat hoti jaati hai shikan laao jabin par yaa nigaah-e-lutf se dekho har ik surat mire miTne ki surat hoti jaati hai laDakpan aur ehsaas-e-javaani tauba hai tauba kali khilne se pahle mast-e-nikhat hoti jaati hai mubaarak husn-e-be-parvaa ko be-parvaaiyaan apni mohabbat aap gham-khvaar-e-mohabbat hoti jaati hai"

"zarf us hasti-e-maa-fauq kaa honaa chaahaa main ne qatre mein samundar ko Dubonaa chaahaa gham o 'ishrat ko baham main ne samonaa chaahaa thaam kar daaman-e-mahbub ko ronaa chaahaa gharq be-ishrat-e-paikaar na honaa chaahaa main ne tufaan ko kashti mein Dubonaa chaahaa dilkashi raah-e-mohabbat ki ilaahi tauba be-khudi ne sar-e-manzil mujhe khonaa chaahaa daaman-e-tar ki tarah ashk-e-nadaamat ne mire hashr mein naama-e-aamaal ko dhonaa chaahaa 'ishq ne husn ki aamad pe sajaa manzar-e-chashm har mizha mein guhar-e-ashk pironaa chaahaa ban gae ashk mire dost ke maathe kaa araq mahr ko rashha-e-shabnam ne bhigonaa chaahaa ishq-e-gustaakh ki allaah ri raahat-talabi rakh ke sar zaanu-e-mahbub pe sonaa chaahaa dil ne khud meri tabaahi kaa uThaayaa biiDaa naa-khudaa ne miri kashti ko Dubonaa chaahaa sai'-e-naakaam ne kyaa shaghl nikaalaa aakhir aansuon se khat-e-taqdir ko dhonaa chaahaa"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"