zindagi ke Dhab aae — Batool Mussarat

"haal dil kaa to nigaahon se bayaan hotaa hai raqs-e-bismil pe tamaashe kaa gumaan hotaa hai zinda rahti huun kisi karb ke tah-khaane main saans lenaa bhi kabhi aise giraan hotaa hai jis ki fitrat mein vafaaein nahin hotin shaamil phir asar us pe mohabbat kaa kahaan hotaa hai yuun mire dil mein mohabbat hai tumhaari hamdam siip mein jaise guhar koi nihaan hotaa hai shiddat-e-karb se main jab bhi taDap uThti huun 'azm-e-takhliq miraa aur javaan hotaa hai hasratein dil ki sabhi raakh hui jaati hain jis tarah bujhte charaaghon kaa dhuaan hotaa hai"

"jaltaa diyaa havaaon ke mahzar mein aa gayaa manzar mein ek rang thaa paikar mein aa gayaa suraj abhi to raah mein thaa jaane kis tarah dastak diye baghair mire ghar mein aa gayaa apne-paraae chhoD ke sab mujh ko jaa chuke kaisaa ye moD mere muqaddar mein aa gayaa laDne se pahle hi sabhi haare hue hain log khauf-e-shikast kaisaa ye lashkar mein aa gayaa jitne bhi khvaab the mire khvaabon mein rah gae manzar ye kaisaa khvaab ke manzar mein aa gayaa main ne hinaai paanv ko paani pe kyaa dharaa qaus-e-quzah kaa rang samundar mein aa gayaa"

"baat aisi bhi kyaa hai surat mein Duube rahte hain un ki chaahat mein haal batlaaein tum ko kyaa apnaa be-qaraari si hai tabi'at mein baat kiije Thahar Thahar ke zaraa baat hoti nahin kudurat mein dil ki basti mein chal ke aao kabhi rang bikhre hain is riyaasat mein dar pe baiThe hain tere divaane ik nigaah-e-karam ki hasrat mein bas tamannaa hai ye mire dil ki 'umr guzre nabi ki midhat mein"

"savaad-e-karb mein phaili hai tira-shab jaanaan udaasiyon ke liye chaahiye sabab jaanaan vo ek laDki yahaan dekhti thi raah tiri guzar gai hai jahaan se tum aae ab jaanaan hamesha nauha suneinge judaaiyon kaa ham kabhi sunaaein hamein naghma-e-tarab jaanaan kahin khayaal tumhaaraa jo dil mein aataa hai to DhunDhtaa hai ye dil teri ek chhab jaanaan navaazishon pe tumhaari hai chashm-e-nam hairaan jo aai yaad miri tum ko be-talab jaanaan"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"jab tak mizaaj-e-dost mein kuchh barhami rahi goyaa bujhi bujhi si miri zindagi rahi jis par nigaah-e-lutf-e-karam aap ki rahi hairat se har nigaah use dekhti rahi go main rahaa kashaakash-e-dauraan se ham-kanaar lekin mire labon pe hansi khelti rahi laayaa hai ishq ne mujhe aise maqaam par khud-aagahi rahi na khudaa-aagahi rahi josh-e-junun ne manzil-e-maqsud paa liyaa aql-e-salim dekhti hi dekhti rahi sab kuchh mujhe 'khayaal' ki duniyaa mein mil gayaa lekin tumhaare husn-e-nazar ki kami rahi"

"aaina toD de rihaa kar de bevafaa ik yahi vafaa kar de rishta-e-dard toD de dil se rang ko phuul se judaa kar de zindagi-bhar tujhi ko chaahaa hai qarz kuchh to miraa adaa kar de de rahaa hai zakaat-e-husn agar mire haq se zaraa baDhaa kar de muddatein ho gaiin tujhe dekhe ab to milne kaa silsila kar de phir koi gul khile sar-e-mizhgaan phir dar-e-khvaab koi vaa kar de ik sitaare ko bakhsh kar mire khvaab phir use meraa aaina kar de baiThtaa jaa rahaa hai jaan kaa ghubaar ab use mujh se maavaraa kar de ai faqir-e-dayaar-e-laili-jaan mire haq mein bhi kuchh duaa kar de"