Ghazal

aankhon mein hain haqir jis-tis ke

nazron se gir gae hain ham kis ke

dil kaa hamdam ilaaj mat kar ab

zakhm marham-pazir hain is ke

· · ·

aankhon se khuun apne ye kahtaa nahin na jaae

par saath us ke lipTaa huaa dil kahin na jaae

itni to chaahiye tujhe paas-e-shikasta-dil

jo aave tere yaan so vo andohgin na jaae

· · ·

dariyaa mein Duub jaave ki yaa chaah mein paDe

ai ishq par na koi tiri raah mein paDe

mat puchh jaur-e-gham se dil-e-naa-tavaan kaa haal

bijli to dekhi hogi kabhi kaah mein paDe

· · ·

aaj dil be-qaraar hai kyaa hai

dard hai intizaar hai kyaa hai

jis se jaltaa hai dil jigar vo aah

shoala hai yaa sharaar hai kyaa hai

· · ·

nigah se chashm se naaz-o-adaa se

khudaa mahfuz rakkhe har balaa se

kisi ki bevafaai se mujhe kyaa

main apne kaam rakhtaa huun vafaa se

· · ·

jald husn-o-jamaal jaataa hai

nahin rahtaa ye haal jaataa hai

jab talak dekhtaa nahin us ko

dil mein kyaa kyaa khayaal jaataa hai

· · ·

nazar karo vahdat o kasrat baham shaamil hain shishe mein

agar shisha hai mahfil mein to ye mahfil hai shishe mein

dil-e-naazuk mein aashiq ke nahin hai sakht-jaani ye

fusun-e-fikr se utri hui ik sil hai shishe mein

· · ·

ham na tanhaa us gali se jaan ko kho kar uTh gae

saikDon yaan zindagi se haath dho kar uTh gae

dekhne paae na ham ashkon kaa apne kuchh samar

tukhm goyaa yaas ke ye the jo bo kar uTh gae

· · ·

duur se baagh-e-jahaan dikhlaa ke divaana kiyaa

muttasil jaane na paayaa main ki viraana kiyaa

dekhte hi mai ko saaghar kaa na kheinchaa intizaar

maare jaldi ke main apnaa haath paimaana kiyaa

· · ·

sab ko hai manzur us rukhsaar-e-gul-gun ki taraf

dekhtaa hai kaun meri chashm-e-pur-khun ki taraf

saath naaqa ke khudaa jaane kidhar ram kar gai

gard-e-mahmil bhi na pahunchi aah majnun ki taraf

· · ·

us ke kuche se sabaa gar idhar aa jaati hai

dil ke naalon ki mufassal khabar aa jaati hai

garche us zulf se kuchh kaam nahin ab to vale

saanp ke kaaTe ki si ik lahr aa jaati hai

· · ·

dil bichhaD kar jo chalaa us but-e-maghrur talak

dekhtaa main bhi gayaa us ke taiin duur talak

jaan jaave ki na jaave rahe sar yaa na rahe

chhoDne ke nahin ham tujh ko to maqdur talak

· · ·

diid ki sadd-e-raah hai ye mizha

khaar-e-paa-e-nigaah hai ye mizha

nit taqaatur hi us se rahtaa hai

rag-e-abr-e-siyaah hai ye mizha

· · ·

ai gard-baad tarf-e-chaman Tuk guzaar kar

bulbul ke par paDe hain gulon par nisaar kar

aae the aish ke liye so tu na yaan milaa

phir gham-kada ko uTh chale ham apne haar kar

· · ·

mil gae apne yaar se ab ki

haz uThaayaa bahaar se ab ki

lakht-e-dil barg-e-dil ki tarz jhaDe

mizha ki shaakh-saar se ab ki

· · ·

na milaa vo nifaaq ke maare

kyaa karein ham vifaaq ke maare

jab tak aave hai aave tu ham to

mar chuke ishtiyaaq ke maare

· · ·

kaun kartaa hai sar-e-zulf ki baatein dil mein

ji pe kaTti hain ajab tarah ki raatein dil mein

koi tarkib mulaaqaat ki banti nahin aur

vasl ke roz kiyaa karte hain ghaatein dil mein

· · ·

vasl kaa aish kahaan par gham-e-hijraan to hai

lab-e-khandaan to nahin dida-e-giryaan to hai

aarzu aur to kuchh ham ko nahin duniyaa mein

haan magar ek tire milne kaa armaan to hai

· · ·

na rahaa gul na khaar hi aakhir

ik rahaa husn-e-yaar hi aakhir

ab jo chhuTe bhi ham qafas se to kyaa

ho chuki vaan bahaar hi aakhir

· · ·

ne fiqh na mantiq ne hikmat kaa risaala hai

is fann-e-mohabbat kaa nuskha hi niraalaa hai

khatra hai mujhe ab to chup rahne se bhi apne

kyaa hai ki na sozish hai vo aah na naala hai

· · ·

jab talak tiir tiraa aave hai nakhchir talak

le ye nakhchir hi aa pahunchaa tire tiir talak

dast-o-paa maare bahut chaah-e-zanakh mein dil ne

haath lekin na gayaa zulf ki zanjir talak

· · ·

chashm-e-tar raat mujh ko yaad aai

apni auqaat mujh ko yaad aai

naala-e-dil par aah ki main ne

baat par baat mujh ko yaad aai

· · ·

mazaa be-hoshi-e-ulfat kaa hoshyaaron se mat puchho

azizaan khvaab ki lazzat ko be-daaron se mat puchho

hamein kuchh dakhl in baaton mein sunte ho nahin mutlaq

haqiqat bevafaai ki vafaadaaron se mat puchho

· · ·

is Dar se main ne zulf ki us ki na baat ki

jaati hai duur duur tak aavaaz raat ki

dekhaa jab aankh khol ke misl-e-habaab tab

maalum kaaenaat hui kaaenaat ki

· · ·