Ghazal

"ghair se rasm-o-raah kyon main ne sunaa diyaa ki yuun us ne pakaD ke haath se mujh ko uThaa diyaa ki yuun mujh ko nikammaa kah diyaa main ne kahaa bhalaa ye kyon aaina le ke haath mein us ne dikhaa diyaa ki yuun murda dilon mein zindagi aati hai kaise aud kar rukh se naqaab-e-zulf ko us ne haTaa diyaa ki yuun pyaar se pesh aa ke jo vajh-e-malaal puchh li mahshar-e-shor se jahaan sar par uThaa diyaa ki yuun dil ko lagi hai Thes gar mujh ko bataa de maajraa qatra-e-ashk aankh se us ne giraa diyaa ki yuun puchhaa hamaaraa haal-e-dil jis ne 'iraaqi' pyaar se apnaa kalaam ek baar paDh ke sunaa diyaa ki yuun"

"mujhe be-rukhi pe teri agar ikhtiyaar hotaa to main bazm se na uThtaa na main sharmsaar hotaa yahi aarzu thi meri tire dar pe jaan de duun tiri rahguzar mein zaalim miraa ik mazaar hotaa dil-e-naa-subur mein bas yahi ik havas hai baaqi miri ziist kaa fasaana kahin yaadgaar hotaa jo qafas mein aa gae ham karein ghair chaarasaazi ai nasib koi apnaa miraa gham-gusaar hotaa main na kheltaa 'iraaqi' kabhi zindagi se apni tiri is vafaa pe mujh ko agar eatibaar hotaa"

"nuur teraa hi jaa-ba-jaa paayaa kahin chhup kar kahin khulaa paayaa zakhm-e-dil mil gayaa zahe qismat saari mehnat kaa ye sila paayaa saada dil saadgi tabiat mein dard siine kaa man-chalaa paayaa aadamiyyat hui hai duur ab to sab kaa imaan milaa-julaa paayaa jaan kyaa chiiz hai karun qurbaan dil mein teraa hi naqsh-e-paa paayaa"

"kafan baandhe hue sar par yahaan ahraar baiThe hain jalaa kar apne haathon se ye sab ghar-baar baiThe hain sabaa to chheDti hai be-sabab is dil-shikasta ko ki ji mein ishq kaa ham to liye aazaar baiThe hain anaa maadum hai un ki jo zillat mol lete hain ki le kar apni ismat ko sar-e-baazaar baiThe hain zamaana ho gayaa shaatir 'iraaqi' paas apnaa rakh jinhein bachne kaa fan aataa hai vo hushyaar baiThe hain"

"shiddat-e-dard-e-nihaani aur hai un ki mujh se khinchaa-taani aur hai ham subuk-sar bhi jo ho kar rah gae us pe un ki sargiraani aur hai kuchh bhi ho apnaa banaa leinge tujhe ham ne apne dil mein Thaani aur hai aur hai un kaa taqaazaa dekhiye baat qaasid ki zabaani aur hai hai 'iraaqi' tujh ko kis kaa intizaar chand ghaDiyon ki kahaani aur hai"

"taskin-e-dil jo paae to phir iztiraab kyaa mujh ko pata nahin ki gunah kyaa savaab kyaa taqdis-e-ishq par na koi harf aa sake bhaTke jo raah se to phir aisaa shabaab kyaa ham jaam ke asiir nahin ghaur se ye sun aankhon se pi na jaae to phir vo sharaab kyaa vo saamne hain aur zabaan hai miri khamosh nichi nigaah mein hain savaal-o-javaab kyaa aatish se josh-e-ishq ki ho sokhta-jigar lazzat mile na ghair ko aisaa kabaab kyaa"

"dard-e-dil ke saath hai zakhm-e-jigar kis se kahun ban gai hai aashiqi bhi dard-e-sar kis se kahun mar rahaa huun jaa rahaa huun maut ki aaghosh mein uf khudaa hoti nahin un ko khabar kis se kahun aashiyaan ahbaab ne chhinaa kiyaa be-ghar mujhe haae phir kaaTe hain mere baal-o-par kis se kahun zakhm-e-dil mein phuul hain go rang-o-nikhat kuchh nahin jaise hai jashn-e-charaaghaan be-sharar kis se kahun paa sukun tum ko 'iraaqi' aarzu meri rahi phir rahaa huun ku-ba-ku main dar-ba-dar kis se kahun"