Ghazal

"har samt gunjtaa huaa aavaaza hai miraa khush huun bahut ki zakhm abhi taaza hai miraa Thokar lagaataa huun to nikalte hain raaste divaar jis ko kahte ho darvaaza hai miraa kuchh bhi nahin hai mere liye teri kaaenaat aur hai bhi kuchh agar to bas andaaza hai miraa aage nikal gayaa huun main apne vujud se bikhraa huaa fazaaon mein shiraaza hai miraa nashsha utar rahaa hai to ab sochtaa huun main ye zindagi nahin hai ye khamyaaza hai miraa"

"kanaar-e-khvaab se dil ko nikaal kar le jaae vo lahr aae kabhi aur uchhaal kar le jaae bharaa huaa hai piyaala mai-e-mohabbat se kaniz-e-dahr se kahiye sanbhaal kar le jaae hamaare dil mein jo kuchh hai faqat hamaaraa nahin jo jis ke kaam kaa ho dekh-bhaal kar le jaae vo chaal vo hai ki chakkar mein Daal de sab ko aur aankh aisi ki dil ko nikaal kar le jaae ham apne rang mein us ko na rang paae to kyaa hamein vo apne hi saanche mein Dhaal kar le jaae"

"duur hi se nazar aa jaaegaa juutaa meraa mujh se bhi aage nikaltaa huaa juutaa meraa harza-gardi ki khalish thi to mire paanv mein thi kyon mire saath ghisaTtaa rahaa juutaa meraa dil pe jo gard-e-masaafat hai koi kyaa jaane nazar aataa hai chamaktaa huaa juutaa meraa main ki huun apne kisi dhyaan ke banbaas mein gum hai mire takht pe rakkhaa huaa juutaa meraa manzil-e-dahr thi daldal thi ki thaa meraa dil paanv rakkhaa thaa ki dhanstaa gayaa juutaa meraa niind ke dasht mein kuchh moD the bedaari ke bhi pair sote rahe jaagaa kiyaa juutaa meraa munh lapeTe hue pagDi mein paDaa rah gayaa main aur juute pe chaDhaa rah gayaa juutaa meraa"

"isi tarah ke shab-o-roz hain vahi duniyaa puraani khaak pe taamir hai nai duniyaa main apne aap mein gum thaa mujhe khabar na hui guzar rahi thi mujhe raundti hui duniyaa har aadmi ko ye duniyaa badal ke rakh degi badal sakaa na agar ab bhi aadmi duniyaa nai havaa ko madad ke liye pukaarti hai khud apni aag mein jalti hui nai duniyaa main jis havaale se duniyaa pe ghaur kartaa huun usi tarah se kabhi kaash sochti duniyaa main apne asl ki jaanib ravaan davaan huun aur bulaa rahi hai musalsal mujhe miri duniyaa ajiib khvaab thaa jis ne mujhe kharaab kiyaa miri giraft mein aa kar nikal gai duniyaa"

"manzil haath nahin aa paati khvaab adhuraa rah jaataa hai raah-e-talab par chalte chalte aadmi aadhaa rah jaataa hai kabhi kabhi to dil ki dhaDkan band bhi ho jaati hai saahab kabhi kabhi to siine mein bas dard dhaDaktaa rah jaataa hai tujh ko bhuul chuke hain ham bhi lekin aisi baat nahin kuchh suraj Duub bhi jaae agar to ek dhundalkaa rah jaataa hai chalne vaale chalte chalte apni manzil paa lete hain raah dikhaane vaalaa buDhaa raah dikhaataa rah jaataa hai vaqt kaa pahiya chale to phir kab chal saktaa hai zor kisi kaa aadmi apne aap ko kyaa kyaa chiiz samajhtaa rah jaataa hai"

"kahin kahin jo zaraa haashiya chaDhaa huaa hai bayaan meraa hai lekin baDhaa-chaDhaa huaa hai yunhi nahin hai lahu mein ye lahr masti ki kisi ke haath pe rang-e-hinaa chaDhaa huaa hai yunhi nahin hai ye lafzon mein laDkhaDaahaT si kisi ke dhyaan mein huun aur nasha chaDhaa huaa hai vahi ab aan ke tiryaaq kuchh kare to kare vo saanp jis kaa mujhe zahr saa chaDhaa huaa hai vahi hain ham vahi bistar hai apne khvaabon kaa ghilaaf hi hai faqat jo nayaa chaDhaa huaa hai du'aaein ham ne to maangi thiin abr-e-rahmat ki ye kyaa ki shahr pe sail-e-balaa chaDhaa huaa hai main niche vaale pe chaDh dauDtaa huun sochtaa huun ki mere sar pe bhi mujh se baDaa chaDhaa huaa hai ye qaum hai ki savaari kaa jaanvar hai koi ki ek utar gayaa hai dusraa chaDhaa huaa hai zamin par hi paTakh duun na aasmaan ko main ki ye sharir mire sar pe kyaa chaDhaa huaa hai bahak rahaa huun agar main mai-e-mohabbat se faqih-e-shahr ko khauf-e-khudaa chaDhaa huaa hai utaar par hi samajhiye rafaaqaton kaa nasha ki dekhte hain jise bhi chaDhaa chaDhaa huaa hai ab apni mauj mein huun main khabar nahin mujh ko utar gayaa hai vo dariyaa saa yaa chaDhaa huaa hai"

"hamaare dil mein koi yaad hai to kis liye hai ye dil jo yaad se aabaad hai to kis liye hai hamaare sar pe hi kyon aasmaan TuTtaa hai zamin ki koi buniyaad hai to kis liye hai vahi pahaaD si raatein vahi pahaaD se din agar kahin koi fariyaad hai to kis liye hai main apne sar pe giraa huun 'azaab ke maanind mire liye koi uftaad hai to kis liye hai vo saamne thaa to har ik ko chup lagi hui thi chalaa gayaa hai to fariyaad hai to kis liye hai mire vujud pe bedaad karne vaalon ki mire kalaam pe ye daad hai to kis liye hai"

"shafaq hai sho'la-fishaan shaam hone vaali hai nazar nazar hai dhuaan shaam hone vaali hai ye vaqt vo hai parinde gharon ko lauTte hain bhaTak rahaa huun kahaan shaam hone vaali hai tire ufuq pe sadaa subh jagmagaati rahe main jis jagah huun vahaan shaam hone vaali hai ye kaarobaar-e-mohabbat sahi magar saahab baDhaaiye bhi dukaan shaam hone vaali hai vo 'aaftaab' ki nisfunnahaar par hai abhi to kis liye hai gumaan shaam hone vaali hai"

"ye aur baat mukarrar sunaa gayaa ham se khud apnaa haal sunaa kar sunaa gayaa ham se ham us mein apni kahaani bhi Daal dete the vo ik fasaana ki aksar sunaa gayaa ham se hamaare giton mein ashkon ki aab-daari thi so jal-tarang bajaa kar sunaa gayaa ham se tamaam raat sitaare the gosh-bar-aavaaz tamaam raat baraabar sunaa gayaa ham se nazar mein rakkhi thi vo aankh bolti hui aankh nadi mein shor thaa ghar par sunaa gayaa ham se hamaare zakhm likhe the zamin ke zarron mein hamaaraa dard falak par sunaa gayaa ham se lahu mein ab bhi talaatum machaae rakhti hai vo ik sadaa jise kam-tar sunaa gayaa ham se yahi nahin unhein ham khud sunaane jaate the hamaare paas bhi aa kar sunaa gayaa ham se nazar mein uDti thi an-dekhe manzaron ki gard vo rah-guzar thi magar ghar sunaa gayaa ham se kabhi kabhi koi aavaaz dekhne mein aai kahin kahin koi manzar sunaa gayaa ham se hamaare paas bhi ik zakhm hai dikhaane ko agar kabhi sar-e-mahshar sunaa gayaa ham se"

"charaagh-e-khvaab jalaataa huaa chalaa gayaa huun khud apni raah banaataa huaa chalaa gayaa huun dam-e-vidaa' koi bhi nahin thaa mere paas magar main haath hilaataa huaa chalaa gayaa huun vahi hadein mujhe taqsim karti jaati thiin main jin hadon ko milaataa huaa chalaa gayaa huun main apni mauj mein thaa aur biphar rahi thi vo lahr so us ko saath bahaataa huaa chalaa gayaa huun kisi khayaal ki khushbu thi aur kuchh bhi na thaa jahaan main rang uDaataa huaa chalaa gayaa huun mujhe na DhunDh mire dasht-e-naa-muraad na DhunDh main aur hi kahin aataa huaa chalaa gayaa huun palaT bhi saktaa huun har-chand 'aaftaab-husain' khud apne naqsh miTaataa huaa chalaa gayaa huun"

"us kaj-dimaagh se nahin milne kaa thaa dimaagh dil dil se mil gayaa na magar mil sakaa dimaagh haft aasmaan ki sair thi us ik nigaah mein ik baar to hamaaraa bhi chakraa gayaa dimaagh apni to kuchh samajh mein na aayaa ye her-pher ai bhaai is hisaab mein tu hi laDaa dimaagh sifla-saron ki chalti hai varna to shahr mein kyaa kyaa paDaa huaa hai baDe se baDaa dimaagh rahte zamin par hain nazar aasmaan pe hai paaya hai sar-phiron ne tire dekh kyaa dimaagh aisaa nasha kahaan hai sharaabon-varaabon mein dekhe se ik nazar use tar ho gayaa dimaagh kyaa kaan dhariye naaseh-e-naadaan ki baat par hai us ki khopDi mein kisi bail kaa dimaagh ye kaam sirf ‘mir’-e-sar-e-sokhta kaa hai ai dil na is zamin mein naahaq jalaa dimaagh"

"chaTakhtaa rahtaa hai raat din jo dimaagh meraa mire lahu se bharaa na ho ye ayaagh meraa ye baat us par khulegi kuchh der baa'd jaa kar ki duur jaa kar milegaa mujh se suraagh meraa chalo kahin to khilaa huaa hai vo phuul aakhir ye soch kar ho rahaa hai dil baagh-baagh meraa ulajh rahaa thaa lahu se nashsha khumaar ban kar kisi ne phir laa ke bhar diyaa hai ayaagh meraa havaa jahaan saaein saaein kar ke bikhar rahi hai kabhi bujhaa thaa yahin kahin ik charaagh meraa zarur koi na koi chakkar hai is jahaan mein nazar uThaaun to ghumtaa hai dimaagh meraa"

"ab to yuun khvaab ke raston pe qadam rakhtaa huun jis tarah apni hi aankhon pe qadam rakhtaa huun dekhtaa huun to dahakte hue angaare hain aur chaltaa huun to phulon pe qadam rakhtaa huun nashsha aisaa hai ki hai laghzish-e-paa aankhon mein laDkhaDaataa huun to shishon pe qadam rakhtaa huun andar andar hi koi raah nikalti hui hai ye jo main apne hi qadmon pe qadam rakhtaa huun thartharaa uThti hai paani ki tarah dil ki zamin yaad ke Dolte rasson pe qadam rakhtaa huun dil mein chalti hai kisi guzre zamaane ki havaa raakh hoti hui yaadon pe qadam rakhtaa huun mujh mein rah rah ke ubharti hai chaTakhne ki sadaa jaise TuuTi hui qabron pe qadam rakhtaa huun haath aae bhi to kyaa kaar-kushaai kaa siraa main ki khud apne iraadon pe qadam rakhtaa huun qaafiya tang kiye rahtaa huun din raat apnaa kis qadar sakht zaminon pe qadam rakhtaa huun"

"ghurur ye bhi hunar se nikaltaa jaataa hai koi nasha hai ki sir se nikaltaa jaataa hai ravaan rahungaa usi yaad ke ta'aaqub mein ki khvaab koi nazar se nikaltaa jaataa hai nazar usi ke nazaare mein mahv rahti hai jo shakhs meri khabar se nikaltaa jaataa hai main laDkhaDaa ke phir aayaa huun apne raste par jo dil mein Dar thaa safar se nikaltaa jaataa hai bujhi nahin mire dil mein jab us 'azaab ki aag dhuaan saa kyon mire sir se nikaltaa jaataa hai fazaa-e-tira mein vo aag kaa parinda huun ki raasta mire par se nikaltaa jaataa hai yahaan to kuchh bhi na thaa gard-e-aarzu ke sivaa ye raasta saa kidhar se nikaltaa jaataa hai"

"mire sukhan mein jo harf-o-bayaan kaa zaaiqa hai ye saaraa zauq kisi ki zabaan kaa zaaiqa hai bahut maze ke manaazir hain meri aankhon mein magar kuchh aur hamaare yahaan kaa zaaiqa hai utar gai jo gale se ye zindagi to khulaa haqiqaton mein bhi kuchh daastaan kaa zaaiqa hai uDaae phirti hai phir khaak-e-khvaab ki khushbu abhi to munh mein mire raaegaan kaa zaaiqa hai jo sach kahun to isi mein hai lutf hone kaa kahin kahin jo ye zahr-e-ziyaan kaa zaaiqa hai"

"is khanDar par nai buniyaad uThaanaa hai mujhe 'aaftaab' ek nayaa shahr basaanaa hai mujhe DhunDhtaa rahtaa huun har samt mafar ki raahein aur har raah bhaTakne kaa bahaana hai mujhe ik miraa dil hai ki qaabu mein nahin hai mere aur us shokh ko bhi raah pe laanaa hai mujhe mujh se hotaa nahin jo kaam kiye jaataa huun mujh se banti nahin jo baat banaanaa hai mujhe main jo is kaar-e-shab-o-roz se katraataa huun mujhe maa'lum hai sab chhoD ke jaanaa hai mujhe"

"nazar mein koi bahr-e-be-karaan rakkhaa huaa hai aur apne aap ko main ne ravaan rakkhaa huaa hai jahaan main huun faqat meri sadaaein gunjti hain mujhe kin gumbadon ke darmiyaan rakkhaa huaa hai miri tezi to ab meri zarurat ban gai hai mire sar par koi baar-e-giraan rakkhaa huaa hai main apne aap se ho kar guzartaa jaa rahaa huun ki mere raaste mein ik jahaan rakkhaa huaa hai main apne aap mein hotaa to khud tak lauT aataa kisi khushbu ne mujh ko be-amaan rakkhaa huaa hai kabhi ehsaas hi us aankh ko jaa kar dilaaun kahaan honaa thaa mujh ko aur kahaan rakkhaa huaa hai jo sach puchho isi mein lutf hai saare kaa saaraa haqiqat mein jo rang-e-daastaan rakkhaa huaa hai bahut hi mutmain phirtaa huun lekin jaantaa huun mire andar koi aatish-fishaan rakkhaa huaa hai"

"qadam-qadam yahaan darpesh taaza masala hai so kis se jaa ke kahein kyaa hamaaraa masala hai gila nahin hai taghaaful kaa us nazar se magar tavajjoh utni nahin ham pe jitnaa masala hai karegaa kyaa koi hal zindagi ke masalon kaa are ye zindagi khud ik tarah kaa masala hai kabhi jo puchhaa hamaaraa bhi hal nikal sakegaa to muskuraa ke kahaa ik zaraa saa masala hai samajh mein apni jo aae to kuchh bataayaa bhi jaae ki kyaa mu'aamla hai aur kaisaa masala hai kabhi idhar ko bhi niklo to mil ke puuraa karein bahut dinon se ik aadhaa-adhuraa masala hai yahaan bhi TuTte hain sar pe aasmaan kyaa kyaa nai zamin hai lekin puraanaa masala hai"

"shifaa ki khaak thi yaa phir hunar ki miTTi thi safar mein bhi mire hamraah ghar ki miTTi thi ye dhuul baiThe kisi din to baiTh kar sochein kahaan uDi hui thi kis nagar ki miTTi thi kahin vujud ke andar bhi koi rasta thaa darun-e-khaana bhi kuchh rah-guzar ki miTTi thi sapida-e-sahari thaa ki meri aankhon mein ghubaar-e-khvaab thaa aur raat bhar ki miTTi thi jo gard rukh pe thi ashkon ne saaf ki lekin paDi rahi yunhi sar par jo sar ki miTTi thi ye main jo dhuup mein jaltaa thaa aur phaltaa thaa miri sarisht mein shaayad shajar ki miTTi thi 'ajab nahin jo nahin mujh mein inkisaar ki khu miTi miTi si mire baam-o-dar ki miTTi thi vo shor jaise samaa'at mein koi shorish ho vo gard-baad ki lagtaa thaa shar ki miTTi thi miri uDaan ki thi saat aasmaanon tak miri nazar mein mire mustaqar ki miTTi thi jo gard uDi bhi to makhfi thi chashm-e-bad-bin se hamaare 'aib mein aisi hunar ki miTTi thi"

"koi saudaa bhi mire sar mein na rakkhaa huaa ho dil ne mujh ko yunhi chakkar mein na rakkhaa huaa ho nazar aataa hai jo ye aankh kaa dhokaa to nahin manzar ik aur hi manzar mein na rakkhaa huaa ho dekh vo husn-e-dil-afroz magar duur se dekh koi sho'la hi ghul-e-tar mein na rakkhaa huaa ho puchhtaa phirtaa huun main jis ko zamaane bhar se khvaab saa vo mire bistar mein na rakkhaa huaa ho dekh ai rang-e-zamaana mire raste mein na aa kal tujhe bhi kahin Thokar mein na rakkhaa huaa ho ye bhi mumkin hai ki gauhar mire haath aa jaae aur imkaan mire jauhar mein na rakkhaa huaa ho"

"yaqin se duur bahut duur aur gumaan se baahar 'ajib vaaqi'a thaa koi daastaan se baahar vahi fazaa ki jahaan main ne gard uDaai nahin thi vahi falak ki thaa ab tak miri uDaan se baahar main us jagah huun jahaan par miraa gumaan bhi nahin hai so DhunDhiye mujhe jaa kar mire nishaan se baahar chamak uThaa thaa koi khvaab-e-sabz sang ke sar mein nikal rahaa thaa koi phuul saa chaTaan se baahar sitaara saa ki tire dhyaan se ulajhne lagaa thaa uThaa ke pheink diyaa ham ne aasmaan se baahar umidvaaron mein ik main hi thaa ki ahl thaa us kaa so kar diyaa hai mujhe us ne imtihaan se baahar kisi ko aanaa nahin koi bhi nahin hai jo aataa nikal ke dekhte rahte ho kyaa makaan se baahar main apni dhuup mein jaltaa thaa aur dekh rahaa thaa sulag rahe the kai saae saaebaan se baahar hamaari jaan ruki hai usi ke dam se labon par vo zaaiqa jo paDaa rah gayaa zabaan se baahar"

"talaash kartaa hai har shai mein koi dusri chiiz jo ghaur kijiye to aadmi bhi hai baDi chiiz mire bhi kaam to aayaa ye 'aalam-e-ashyaa agarche thi mujhe darkaar aur hi koi chiiz agar zamin ki ye gardish Thahar bhi jaae to kyaa mire dimaagh mein hai koi ghumti hui chiiz kharid paaein na paaein nazar to Daalte jaaein dukaan-e-dahr mein rakkhi hai kaisi kaisi chiiz hamaare dil mein hai jo kuchh tumhaare saamne hai dikhaao ab hamein tum bhi to koi apni chiiz ham apne nashshe mein hain aur bahakte jaaeinge paDi rahegi yunhi taaq par dhari hui chiiz khamir-e-khvaab se duniyaa banaataa rahtaa huun mire bhi haath lagi hai ye kyaa kamaal ki chiiz chipak ke rah gai taalu se talkhi-e-ayyaam kahaan se DhunDh ke laaun main koi miThi chiiz ye zindagi kabhi aa kar vasul kar liije bahut dinon se amaanat paDi hai aap ki chiiz"

"abhi vo zad mein nahin hai magar nishaane pe hai ki tiir haath mein hai aur nazar nishaane pe hai vo maa'raka hai ki kuchh bhi samajh mein aataa nahin kahaan hai maar pe dil aur kidhar nishaane pe hai nishaan lagaa ke jo rakhtaa hai apne ghar ke gird use khabar ho ki ab us kaa ghar nishaane pe hai khulaa ki ab hai faqat gumrahi mein 'aafiyyat ki jo koi hai yahaan raah par nishaane pe hai nazar mein ghumti rahti hai koi qaatil aankh so jis taraf bhi ho dil sar-basar nishaane pe hai nikaal tu bhi koi 'aib 'aaftaab-husain' ki ye vo shahr hai jis mein hunar nishaane pe hai"

"doshiza zaminein hain mamnu'a 'ilaaqa hai us baagh-e-tamannaa se kyaa apnaa 'ilaaqa hai har saans mein shaamil hai khushbu-e-nafas us ki us baagh-e-tamannaa se kyaa apnaa 'ilaaqa hai dil haath mein le kar ham duniyaa se nikal aae ab dil ke tasarruf mein duniyaa kaa 'ilaaqa hai baDhtaa huun agar aage vaapas bhi palaTtaa huun mulhaq kahin khvaabon se yaadon kaa 'ilaaqa hai ai baanu-e-be-parvaa aa dil ki taraf bhi aa ye meri mohabbat hai ye teraa 'ilaaqa hai"