Ghazal

"divaaron mein dar hotaa to achchhaa thaa apnaa koi ghar hotaa to achchhaa thaa us kaa rangin aanchal oDh ke so jaate aur aisaa aksar hotaa to achchhaa thaa rang aa jaate muTThi mein jugnu ban kar khushbu kaa paikar hotaa to achchhaa thaa baadal parbat jharne peD parinde chup vo bhi saath agar hotaa to achchhaa thaa kyuun aavaara phirte suuni galiyon mein koi agar ghar par hotaa to achchhaa thaa"

"kar bhi luun agar khvaab ki taabir koi aur siine mein utar jaaegi shamshir koi aur ab ashk tire rok nahin paaeinge mujh ko ab Daal mire paanv mein zanjir koi aur main shab se nahin din ki halaakat se Daraa huun ab mere liye bhejnaa tanvir koi aur ab teri mohabbat se bhi kuchh kaam na hogaa ab DhunD mare vaaste iksir koi aur ai mere musavvir nahin ye main to nahin huun ye tu ne banaa Daali hai tasvir koi aur is baar mujhe ishq kaa aazaar nahin hai is baar mohabbat mein hai dil-gir koi aur"

"dariche mein sitaaraa jaagtaa hai miraa kamra bhi saaraa jaagtaa hai samundar aur maanjhi so gae hain samundar kaa kinaaraa jaagtaa hai shikaari ghaat mein baiThe hue hain saraasima chikaaraa jaagtaa hai ajab bechainiyaan phaili hui hain ki shab bhar shahr saaraa jaagtaa hai tumhein mil jaae to us ko bataanaa koi qismat kaa maaraa jaagtaa hai thake haare musaafir so gae hain faqat qutbi sitaaraa jaagtaa hai"

"gham kaa mausam biit gayaa so ronaa kyaa kal ke gham ko aaj ke din mein bonaa kyaa Thiik hai ham ik-dusre ke mahbub nahin lekin mere dost to ab bhi honaa kyaa aur bahut se kaam paDe hain karne ke ashkon ke sat-range haar pironaa kyaa jis ko meri haalat kaa ehsaas nahin us ko dil kaa haal sunaa kar ronaa kyaa be-shak saari raat kaTi hai aankhon mein ab ujyaaraa phail gayaa to sonaa kyaa tum ne hanste hanste naata toD liyaa lekin sach sach batlaao khush honaa kyaa"

"Duub gayaa hai ek sitaara aankhon mein Thahar gayaa hai naqsh tumhaaraa aankhon mein pathraai hain aankhein gham ki shiddat se rukaa huaa hai mausam saaraa aankhon mein vo logon ke saath hansi mein shaamil thi phail gayaa lekin maskaaraa aankhon mein main ne us ki aankhon mein chehra dekhaa us ne apnaa ruup sanvaaraa aankhon mein bahut dinon se ham ko niind nahin aai tum ne kaisaa khvaab utaaraa aankhon mein chaaron jaanib paani ki pahnaai hai kahin nahin hai koi kinaaraa aankhon mein liye hue phirtaa huun ek zamaane se tere chehre kaa lashkaaraa aankhon mein"

"main khaak mein mile hue gulaab dekhtaa rahaa aur aane vaale mausamon ke khvaab dekhtaa rahaa kisi ne mujh se kah diyaa thaa zindagi pe ghaur kar main shaakh par khilaa huaa gulaab dekhtaa rahaa khaDaa thaa main samundaron ko ok mein liye hue magar ye shakhs ajiib thaa saraab dekhtaa rahaa vo us kaa mujh ko dekhnaa bhi ik tilism thaa magar main aur ik jahaan pas-e-naqaab dekhtaa rahaa vo gahri niind soi thi main niind se laDaa huaa so raat bhar sahaab o maahtaab dekhtaa rahaa siyaah raat mein rafiq dushmanon se jaa mile main hauslon ki TuTti tanaab dekhtaa rahaa"

"jab apnon se duur paraae des mein rahnaa paDtaa hai saan-gumaan na hon jis kaa vo dukh bhi sahnaa paDtaa hai khud ko maarnaa paDtaa hai is aaTe daal ke chakkar mein do kauDi ke aadmi ko bhi saahab kahnaa paDtaa hai banjar hoti jaati ho jab pal pal yaadon ki vaadi dariyaa ban kar apni hi aaankhon se bahnaa paDtaa hai mahrumi ki chaadar oDhe tanhaa qaidi ki maanind khaalam-khaali divaaron ke andar rahnaa paDtaa hai baatein karni paDti hain divaar pe baiThe kavve se is chiDiyaa se saare din kaa qissa kahnaa paDtaa hai"

"is tarah sataayaa hai pareshaan kiyaa hai goyaa ki mohabbat nahin ehsaan kiyaa hai tujh ko hi nahin mujh ko bhi hairaan kiyaa hai is dil ne baDaa ham ko pareshaan kiyaa hai sochaa thaa ki tum dusron jaise nahin hoge tum ne bhi vahi kaam miri jaan kiyaa hai har roz sajaate hain tiri yaad ke ghunche aankhon ko tire hijr mein gul-daan kiyaa hai mushkil thaa bahut mere liye tark-e-taalluq ye kaam bhi tum ne miraa aasaan kiyaa hai ye dil kaa nagar aise to viraan thaa kab se laa-raib ise aap ne sunsaan kiyaa hai ye izzat-o-naamus sabhi us ki ataa hai vo jis ne gaDariye ko bhi sultaan kiyaa hai"