Ghazal

"in aankhon se yuun raah-e-sukhan vaa nahin karte khaamosh rahaa karte hain bolaa nahin karte andesha-e-tufaan-e-balaa-khez bahut hai is vaaste ham qatre ko dariyaa nahin karte parvaa nahin kuchh un ko hamaari to hamein kyaa rukh un ki taraf ham bhi ziyaada nahin karte gharqaabi kaa itnaa hi agar Dar hai to ye log kyon saahil-e-dariyaa se kinaara nahin karte bas qatra-e-khun se ubhar aate hain kai rang ham siine pe khud baagh lagaayaa nahin karte"

"shikva karte hain jo ik baar kahin milte hain ek hi shahr mein kyon rah ke nahin milte hain ham ne ik umr uThaai hai aziyyat kyaa kyaa phir khudaa khair kare vahm-o-yaqin milte hain nahin milte to khazaf bhi nahin milte ham ko aur milte hain to kyaa durr-e-samin milte hain aise milne se to behtar hai mile dil ko najaat jahaan milnaa nahin hotaa vo vahin milte hain"

"ajab balaa kaa tasarruf thaa khvaab par us kaa khuli jo aankh to pahron rahaa asar us kaa ham apni taab-e-tamaashaa pe itne khush kyon hain abhi in aankhon ne dekhaa kahaan hunar us kaa ajab nahin rag-e-gardan jo aap hi TuuTe udhar kashida bahut ho gayaa hai sar us kaa vo raat jis ke liye kaise kaise din kaaTe vo raat aai to aalam hi thaa digar us kaa zaminiyon ki kahaan hamsari nasib use ki hai sadaa se dimaagh aasmaan par us kaa"

"kyaa hijr mein taskin ki surat nahin rahti rahti hai magar teri badaulat nahin rahti ab jaise koi kaam hi ruktaa nahin apnaa ab jaise kisi shai ki zarurat nahin rahti duniyaa se guzar jaate hain duniyaa ki talab mein duniyaa se hamein koi shikaayat nahin rahti vo mauj-e-sad-aavaaz bulaati to hai ab bhi mujh ko hi udhar jaane ki fursat nahin rahti naagin ki tarah raat simaT aati hai dil mein jab saamne ik chaand si surat nahin rahti kahte the bahut dil na lagaa kaar-e-havas mein le dekh ki is shauq mein izzat nahin rahti"

"bhalaa kin aankhon se ab ye rang-e-bahaar dekhun nazar uThaate hi baagh ko shoala-zaar dekhun kabhi vo aalam ki us taraf aankh hi na uTThe kabhi ye haalat ki us ko divaana-vaar dekhun ye saari be-manzari savaad-e-sukut se hai sadaa vo chamke to dhund ke aar-paar dekhun ye kaisaa khuun hai ki bah rahaa hai na jam rahaa hai ye rang dekhun ki dil jigar kaa fishaar dekhun tire sivaa bhi hazaar manzar hain dekhne ko tujhe na dekhun to kyon tiraa intizaar dekhun"

"koi savaal sitaara saa aasmaan mein thaa tamaam raat ye dil sakht imtihaan mein thaa sukun-saraab zamin mein jhulas gayaa thaa badan na jaane kaun dhanak-rang saaebaan mein thaa zaraa saa dam na liyaa thaa ki mund gaiin aankhein main us safar se palaT kar ajab takaan mein thaa vo jaate jaate achaanak muDaa jo meri taraf main dam-ba-khud thaa ki phir kuchh na darmiyaan mein thaa use bhulaayaa to apnaa vajud bhi na rahaa ki meraa saaraa asaasa usi makaan mein thaa"

"past-o-buland saaraa hamvaar kar ke lauTe is baar ham use hi sarshaar kar ke lauTe ab manzil-e-junun ko sar kar ke dekhnaa kyaa nikle to the hazaaron do-chaar kar ke lauTe us arsa-e-havaa kaa ab tak hai bojh dil par achchhaa huaa jo khud ko bezaar karke lauTe kab tak na saaf karte un se hisaab-e-hijraan us baar thaa jo baaqi is baar kar ke lauTe kyaa muft hai ye saudaa jo chaahe us gali mein jaan naqd le ke jaae didaar kar ke lauTe jaate hain log aise thak-haar kar jahaan se ghar apne jaise koi baazaar kar ke lauTe"

"vahi dil ko hai yaar-e-jaani ke saath jo rishta hai dariyaa kaa paani ke saath hamin rah gae be-zabaani ke saath hue khatm sab us kahaani ke saath baDhaa aur girye se soz-e-darun bhaDakti gai aag paani ke saath kahin ye zamaane ki rau to nahin subuk-sair kyaa hai giraani ke saath har ik aan us kaa alag rang hai use dekhiye kis nishaani ke saath chalo mauj vo bhi kinaare lagi ulajhti bahut thi ravaani ke saath bhiDaa kar to dekho maza aaegaa kisi din nai ko puraani ke saath"

"raat to biit chuki phir bhi nasha taari hai kyaa koi kashmakash-e-khvaab-o-khabar jaari hai kyon na sarshaar kare saaz-e-khamoshi mujh ko mast huun jis se vo nashsha miri naadaari hai baagh-e-imkaan koi parda hai ki jis ke ojhal ek hi gul hai yahaan jis ki mahak saari hai ik ziyaan jaan kaa hotaa to koi baat na thi us se milne mein kai tarah ki dushvaari hai"

"khabar sunte to hain us sang-dil ke dil mein aane ki khudaa maalum kyaa surat bane aaina-khaane ki na jaane khaak ho jaane ki lazzat kab mayassar ho abhi to ek muddat se hai khidmat khaak uDaane ki zamin-o-aasmaan kuchh hon to ho pasti bulandi bhi yahaan to roz kaifiyyat badalti hai zamaane ki sahaaraa ishq-e-zor-aavar ne khud hi de diyaa varna kahaan ham aur kahaan taaqat ye koh-e-gham uThaane ki fanaa-aahang shaayad saaz-e-hasti se baraamad ho ki aati hai sadaa taar-e-nafas se jhanjhanaane ki"

"ab ye dhun chhoD bhi do us ko kahaan paaoge ghar chalo varna kahin aur nikal jaaoge ab isi zakhm se gul-posh badan hai saaraa aao dekho to sahi phuul se khil jaaoge ham bhi ab tak usi manzar ke fusun mein gum hain tum bhi us khvaab ki taabir na sun paaoge aab-e-aaina ko yuun dekhtaa rahtaa huun ki bas surat-e-aks tumhin jaise ubhar aaoge naakhun-e-aql se kab uqda-e-dil khultaa hai chhoD do varna tumhin is mein ulajh jaaoge"

"kisi ko kyaa bataaiye ki bas do-chaar ho gae hamin havaa ke munh pe the hamin shikaar ho gae yahaan jo dil mein daagh thaa vahi to ik charaagh thaa vo raat aisaa gul huaa ki sharmsaar ho gae mujhe to ek umr se paDi hai apni jaan ki abhi jo saahilon pe the kidhar se paar ho gae aziim kyon na jaan se ho shikast-e-aaina mujhe vahaan to ek aks thaa yahaan hazaar ho gae"

"yaqinan aap ko dhokaa huaa hai vagarna kyaa kabhi aisaa huaa hai ye kis ke husn kaa charchaa huaa hai ki saaraa shahr divaana huaa hai charaagh-e-dard raushan ho udhar bhi idhar hi zakhm kyon taaza huaa hai hamein bhi khaak honaa hai vahaan tak jahaan tak aasmaan phailaa huaa hai main jis se khud kinaara kar chukaa thaa muqaabil phir vahi dariyaa huaa hai kaji hai khud hamaare dekhne mein ki rukh us kaa hi kuchh badlaa huaa hai abhi kyaa jaan ki baazi lagaaein abhi nuqsaan hi kitnaa huaa hai"

"ham log is ummid mein ghar se nikal aae surat koi mumkin hai safar se nikal aae ik raushni aaseb si phirti hai sar-e-dasht saaya saa koi phir na shajar se nikal aae kuchh der yahaan dekh hi lete hain Thahar kar shaayad vo isi raahguzar se nikal aae"

"un aankhon mein rang-e-mai nahin hai kuchh aur hai ye vo shai nahin hai kashti to ravaan hai kab se shab ki kis ghaaT lagegi tai nahin hai kyaa dil mein basaaun teri surat aaine mein aks hai nahin hai daaman ko zaraa jhaTak to dekho duniyaa hai kuchh aur shai nahin hai aahang-e-sukut dam-ba-dam sun ye saaz-e-nafas hai nai nahin hai"

"vo jaan ke mujh se hi anjaan huaa kitnaa main shahr-e-tamannaa mein halkaan huaa kitnaa tufaan ke guzarne ki tum ko bhi khabar kuchh hai jaan bach to gai lekin nuqsaan huaa kitnaa 'mahfuz' safar yuun to aasaan hai bahut lekin ye bhi to zaraa dekho saamaan huaa kitnaa"

"rah gai thi yahi ik baat bataane ke liye ham to aae the yahaan lauT ke jaane ke liye shauq ne din vo dikhaae hain ki dil jaantaa hai kah diyaa thaa kabhi didaar dikhaane ke liye ab to itnaa bhi nahin yaad ki vo surat-e-khvaab yaad rakhne ke liye thi ki bhulaane ke liye dam-e-khun-rez bhi jaati nahin shokhi un ki mujh se hi kahte hain talvaar uThaane ke liye roz ik rang ubhartaa hai sar-e-safha-e-dard roz ik naqsh banaataa huun miTaane ke liye bahr-e-pur-shor mein ab khush huun ki ik mauj-e-sukut aane vaali hai mujhe paar lagaane ke liye"

"main band aankhon se kab talak ye ghubaar dekhun koi to manzar siyaah dariyaa ke paar dekhun kabhi vo aalam ki us taraf aankh hi na uTThe kabhi ye haalat ki us ko divaana-vaar dekhun ye kaisaa khuun hai ki bah rahaa hai na jam rahaa hai ye rang dekhun ki dil jigar kaa fishaar dekhun ye saari be-manzari savaad-e-sukut se hai sadaa vo chamke to dhund ke aar-paar dekhun tire sivaa bhi hazaar manzar hain dekhne ko tujhe na dekhun to kyuun tiraa intizaar dekhun"

"kyaa karte kahin aur Thikaana hi nahin thaa varna hamein is kuche mein aanaa hi nahin thaa hangaama-e-vahshat thaa jahaan jashn-e-junun mein dekhaa to vahaan koi divaana hi nahin thaa vo dil ki lagi hai ki bujhaae nahin bujhti kal raat gale us ko lagaanaa hi nahin thaa miltaa hai to ab aankh milaa bhi nahin paataa vo khvaab use yaad dilaanaa hi nahin thaa jab dekho usi yaad ke narghe mein paDe ho ye haal agar hai to bhulaanaa hi nahin thaa taariki-e-sahraa mein Daraati hai ik aavaaz yuun dil ko sar-e-shaam bujhaanaa hi nahin thaa vo shakhs jise soch ke aankhon mein gai raat 'mahfuz' use dhyaan mein laanaa hi nahin thaa"

"vo ik savaal-e-sitaara ki aasmaan mein thaa tamaam raat ye dil sakht imtihaan mein thaa sukun saraab zamin mein jhulas gayaa thaa badan na jaane kaun dhanak-rang saaebaan mein thaa zaraa saa dam na liyaa thaa ki mund gaiin aankhein main is safar se nikal kar ajab takaan mein thaa vo jaate jaate achaanak muDaa thaa meri taraf mujhe yaqin hai ki vo phir kisi gumaan mein thaa use bhulaayaa to apnaa khayaal bhi na rahaa ki meraa saaraa asaasa isi makaan mein thaa"

"kyaa dil kaa ye ilaaqa khaali paDaa rahegaa ham tum na honge to bhi mela lagaa rahegaa zakhmon ko ashk-e-khun se sairaab kar rahaa huun ab aur bhi tumhaaraa chehra khilaa rahegaa band-e-qabaa kaa khulnaa mushkil bahut hai lekin lekin khulaa to phir ye uqda khulaa rahegaa sargarmi-e-havaa ko dekhaa hai paas dil ke is aag se ye jangal kab tak bachaa rahegaa khulti nahin hai yaa rab kyuun niind raftagaan ki kyaa hashr tak ye aalam soyaa paDaa rahegaa yaksar hamaare baazu shal ho gae hain yaa-rab aakhir daraaz kab tak dast-e-duaa rahegaa"

"zakhm khaanaa hi jab muqaddar ho phir koi phuul ho ki patthar ho main huun khvaab-e-giraan ke narghe mein raat guzre to maarka sar ho phir ghanimon se be-khabar hai sipaah phir aqab se numud lashkar ho kyaa ajab hai ki khud hi maaraa jaaun aur ilzaam bhi mire sar ho hain zamin par jo gard-baad se ham ye bhi shaayad falak kaa chakkar ho us ko taabir ham karein kis se vo jo hadd-e-bayaan se baahar ho dekhnaa hi jo shart Thahri hai phir to aankhon mein koi manzar ho"

"apnaa sochaa huaa agar ho jaae ek aalam hamaare sar ho jaae shor dasht-e-sukut mein kam hai ai havaa tu hi tez-tar ho jaae na kareinge vo rukh idhar apnaa chaahe duniyaa idhar-udhar ho jaae dard aavaaz rafta rafta bane aah-e-shab naala-e-sahar ho jaae kitni raahein khuli hain apne liye dekhiye kab kidhar safar ho jaae is liye hoshiyaar rahtaa huun kyaa khabar kab vo be-khabar ho jaae"

"ho hi jaataa hai kisi tarah guzaaraa apnaa varna ab shahr mein hai kaun hamaaraa apnaa dil ke dariyaa mein huiin gharq tamannaaein to kyaa mauja-e-khun se hai gul-rang kinaara apnaa kis qadar sang-e-malaamat hai mire chaaron taraf main ne us dar pe yunhi sar nahin maaraa apnaa ik tamaashaa hi sahi aaj havaa dein is ko aur kis din ke liye thaa ye sharaara apnaa naam unchaa rahe ai pasti-e-duniyaa teraa hai tire dam se bulandi pe sitaara apnaa"