Ghazal

"milaa jo dhuup kaa sahraa badan shajar na banaa main vo huun khud jo kabhi apnaa ham-safar na banaa nagar nagar mein nai bastiyaan basaai gaiin hazaar chaahaa magar phir bhi apnaa ghar na banaa ye baat baat hai dil ki to phir jhijak kaisi ye naqsh naqsh-e-vafaa hai tu soch kar na banaa chamakte din ke ujaalon se aashnaa ho kar andheri raat mein saae ko ham-safar na banaa"

"har qadam par mere armaanon kaa khuun zindagi teraa kahaan tak saath duun aandhiyon ki zad mein hai meraa vajud aur main divaar ki tasvir huun kaun ho tum aur kahaan se aae ho sochtaa huun apne saae se kahun rang ki duniyaa se main uktaa gayaa phul-rut mein zahr pi kar so rahun chaahtaa huun tum ko khushbu ki tarah ab ki main aavaaz hi aavaaz huun ab koi meraa nahin mere sivaa aaj apne-aap dil ko toD luun main ki paighambar nahin 'ahmad-ziyaa' kaun saa paighaam is duniyaa ko duun"

"fikr ke saare dhaage TuuTe zehn bhi ab maazur huaa ab ke bahaar ye kaisi aai kaisaa ye dastur huaa kal-purzon kaa ruh-e-ravaan ye aur vo sarmaae ki jonk lekin us ki nazron mein ye dharti kaa naasur huaa din ki safedi teri nazar mein raat ki kaali chaadar hai raat kaa khuni andhiyaaraa bhi teri nazar mein nuur huaa jab se dekhaa hai kheton mein main ne zaalim dhuup kaa ruup tab se teri zulf kaa saaya duur bahut hi duur huaa zulm ko us ne zulm kahaa hai jabr ko us ne jabr kahaa yaani 'ziyaa' ab 'ziyaa' nahin hai vaqt kaa vo mansur huaa"

"ehsaas ki manzil se guzar jaaegaa aakhir mujh mein hai jo insaan vo mar jaaegaa aakhir ik din to tiri raah mein pathraaeingi aankhein ye jism bhi rezon mein bikhar jaaegaa aakhir ai dost yahaan arz-e-hunar jaan kaa ziyaan hai tu gahre samundar mein utar jaaegaa aakhir main rang-e-sahar tere liye DhunD ke laaun tu shaam ke mele mein kidhar jaaegaa aakhir"

"vo khvaab saa paikar hai gul-e-tar ki tarah hai aankhon mein gai shaam ke manzar ki tarah hai ehsaas dilaati hai ye phaili hui khushbu us ghar ki mohabbat bhi mire ghar ki tarah hai main aaina jaisaa huun koi toD na Daale har shakhs miri raah mein patthar ki tarah hai ik main huun ki lahron ki tarah chain nahin hai ik vo hai ki khaamosh samundar ki tarah hai vo jis ne 'ziyaa' harf bhi dil mein na utaaraa vo aaj sar-e-bazm sukhan-var ki tarah hai"

"zaraa sukun bhi sahraa ke pyaar ne na diyaa musaafiron ko havaa ne pukaarne na diyaa tujhe bhi de na sake chain vo gulaab ke phuul mujhe bhi izn-e-tabassum bahaar ne na diyaa na jaane kitne maraahil ke baad paayaa thaa vo ek lamha jo tu ne guzaarne na diyaa kahaan gae vo jo aabaad the kharaabe mein pataa kisi kaa dil-e-be-qaraar ne na diyaa main aap-apne liye dushmanon se baDh kar thaa 'ziyaa' ye dil thaa miraa jis ne haarne na diyaa"

"pyaar kiyaa thaa tum se main ne ab ehsaan jataanaa kyaa khvaab huiin vo pyaar ki baatein baaton ko dohraanaa kyaa raah-e-vafaa hai ham-safro pur-azm raho haan tez chalo chaar qadam pe manzil hai ab raah se vaapas jaanaa kyaa sang-zani o taana-zani is daur kaa sheva hai yaaro apne dil mein khoT nahin jab duniyaa se ghabraanaa kyaa mai-khaane mein daur chale main ik ik buund ko tarsaa huun saaqi bhi hai meri nazar mein shisha kyaa paimaana kyaa mere dil ko toD ke aakhir kyaa khoyaa kyaa paayaa hai shahr-e-sanam mein rahne vaalo shishe se Takraanaa kyaa basti basti parbat parbat vahshat ki hai dhuup 'ziyaa' chaaron jaanib viraani hai dil kaa ik viraana kyaa"

"mahsus kar rahaa huun tujhe khushbuon se main aavaaz de rahaa huun baDe faaslon se main mujh ko mire vajud se koi nikaal de tang aa chukaa huun roz ke in haadson se main ye aur baat tujh ko nahin paa sakaa magar aayaa tire qarib kai raaston se main tai ho sakegaa mujh se na ye zaat kaa safar maanus ho na paaungaa tanhaaiyon se main hai meraa chehra saikaDon chehron kaa aaina bezaar ho gayaa huun tamaashaaiyon se main"

"jalti bujhti si rahguzar jaise zindagi duur kaa safar jaise is qadar pur-khulus lahja hai us se milnaa hai umr bhar jaise is mohalle mein ik javaan laDki biich akhbaar mein khabar jaise ek maanus si sadaa gunji duur yaadon kaa ik nagar jaise"