Ghazal

"aashiqon ko ai falak devegaa tu aazaar kyaa dushman-e-jaan un kaa thoDaa hai dil-e-bimaar kyaa rashk aave kyuun na mujh ko dekhnaa us ki taraf TakTaki baandhe hue hai rauzan-e-divaar kyaa aah ne to khema-e-gardun ko phunkaa dekhein ab rang laate hain hamaare dida-e-khun-baar kyaa murgh-e-dil ke vaaste ai ham-safiro kam hai kyuun kuchh qazaa ke tiir se tir-e-nigaah-e-yaar kyaa chal ke mai-khaane hi mein ab dil ko bahlaao zaraa 'aish' yaan baiThe hue karte ho tum begaar kyaa"

"tu hi insaaf se kah jis kaa khafaa yaar rahe apne jiine se na kis tarah vo be-zaar rahe zakhm-e-dil chhile kabhi aur kabhi zakhm-e-jigar naakhun-e-dast-e-junun kab mire be-kaar rahe in jafaaon kaa maza tum ko chakhaa deveinge haan agar zinda ham ai charkh-e-jafaakaar rahe mai-kade mein hai baDi ye hi mughaan ki piiri ki bas us chashm-e-siyah-mast se hushyaar rahe jalte bhunte rahe ham bazm-e-butaan mein lekin shama saan us pe bhi sar dene ko tayyaar rahe yuun to kyaa khvaab mein bhi yaar kaa milnaa maalum apne gar aah yahi taala-e-bedaar rahe ek jaa siine mein un donon kaa rahnaa hai muhaal yaa ye dil hi rahe yaa aah-e-sharar-baar rahe us se dil khaak ho ummid-e-husul-e-matlab jis se ik bose pe sau tarah ki takraar rahe le ke paikaan se tire tiir bataa to qaatil khuun mein Duube nahin kab taa lab-e-sofaar rahe jins-e-dil aatish-e-ulfat mein jale jo chaahe par kisi tarah tiri garmi-e-baazaar rahe baazi-e-ishq mein chipke raho kyaa khaak kahein ek dil rakhte the paas apne so baar rahe aisaa dam naak mein aayaa hai ki ham raazi hain 'aish' gar siine mein is dil ke evaz khaar rahe"

"jo hotaa aah tiri aah-e-be-asar mein asar to kuchh to hotaa dil-e-shokh-e-fitnagar mein asar bas ik nigaah mein maa'shuq chhin lein hain dil khudaa ne un ki diyaa hai 'ajab nazar mein asar na chhoDi gham ne mire ik jigar mein khuun ki buund kahaan se ashk kaa ho kahiye chashm-e-tar mein asar ho us ke saath ye be-iltifaati-e-gul kyuun jo 'andalib ke ho naala-e-sahar mein asar kisi kaa qaul hai sach sang ko kare hai mom rakhaa hai khaas khudaa ne ye sim-o-zar mein asar jo aah ne falak-e-pir ko hilaa Daalaa to aap hi kahiye ki hegaa ye kis asar mein asar jo dekh le to jahannam ki phere bandh jaae hai meri aah ke vo ek ik sharar mein asar bigaaDein charkh se ham 'aish' kis bharose par na aah mein hai na soz-e-dil-o-jigar mein asar"

"meraa shikva tiri mahfil mein adu karte hain us pe bhi sabr ham ai arbada-ju karte hain mashq-e-bedaad-o-sitam karte hain gar vo to yahaan ham bhi bedaad o sitam sahne ki khu karte hain jaan hui hai nigah-e-naam pe un ki aashiq chaak dil taar-e-nazar se jo rafu karte hain be-sabaati chaman-e-dahr ki hai jin pe khuli havas-e-rang na vo khvaahish-e-bu karte hain aaj shamshir ba-kaf nikle hain vo dekhiye tar aab-e-shamshir se kis kis ke gulu karte hain hai rachi jin ke dimaaghon mein tiri zulf ki bu ambar o mushk ki kab bu ko vo bu karte hain mushk o ambar kaa unhein naam bhi lenaa hai nang yaar ki zulf-e-moambar ko jo bu karte hain chaak karte hain garebaan ko vahshat mein kabhi chaak-e-dil mein kabhu naakhun ko faru karte hain dekh saudaa-zada-e-ulfat-e-khubaan ai 'aish' vaadi-e-ishq mein kyaa kyaa tag-o-pu karte hain"

"kisi ki nek ho yaa bad jahaan mein khu nahin chhupti chhupaae laakh khushbu yaa koi badbu nahin chhupti zabaan par jab talak aati nahin albatta chhupti hai zabaan par jab ki aai baat ai gul-ru nahin chhupti yahaan to tujh ko sau parde lage hain ahl-e-taqvaa se bhalaa rindon se kyuun ai dukhtar-e-raz tu nahin chhupti saliqa kyaa kare is mein koi betaabi-e-jaan ko chhupaao sau tarah jab dil ho be-qaabu nahin chhupti hijaab us mein kahaan hai be-hijaabi jis ki aadat ho chhupaa kar laakh piive gar koi daaru nahin chhupti rukh-e-raushan ko tum kyuun chhoD kar zulfein chhupaate ho chamak rukh ki chhupaae se tah-e-gesu nahin chhupti ye riish o jubba o dastaar zaahid ki banaavaT hai tabiat be-takalluf jis ki ho yaksu nahin chhupti kalaam apnaa abas tu ahl-e-daanish se chhupaataa hai jahaan mein 'aish' tarz-e-shaair-e-khush-go nahin chhupti"

"dost jab dil saa aashnaa hi nahin ab hamein ghair kaa gila hi nahin jis kaa dil dard-aashnaa hi nahin us ke jiine kaa kuchh mazaa hi nahin ek dam ham se vo judaa hi nahin gar judaa ho to vo khudaa hi nahin aashnaai pe us ki mat jaanaa le ke dil phir vo aashnaa hi nahin khaak chhaani jahaan ki lekin dil-e-gum-gashta kaa pataa hi nahin laakh maashuq hain jahaan mein magar aah vo naaz vo adaa hi nahin sai-e-be-faaeda hai chaaragaro maraz-e-ishq ki davaa hi nahin dard-e-dil un se ham kahaa hi kiye par unhon ne kabhi sunaa hi nahin sar phiraataa hai kyuun abas naaseh meraa kahne mein dil rahaa hi nahin ab vo aae to aaein kyaa haasil taaqat-e-arz-e-muddaaa hi nahin main to kyaa gosh-e-charkh ne bhi 'aish' aisaa bedaad-gar sunaa hi nahin"

"jis dil mein tiri zulf kaa saudaa nahin hotaa vo dil nahin hotaa nahin hotaa nahin hotaa aashiq jise kahte hain vo paidaa nahin hotaa aur hoe bhi bil-farz to mujh saa nahin hotaa jo kushta-e-tegh-e-nigah-e-yaar hain un par kuchh kaargar ejaaz-e-masihaa nahin hotaa maanaa ki sitam karte hain maashuq magar aap jo mujh pe ravaa rakhte hain aisaa nahin hotaa jo mast hai saaqi nigah-e-mast kaa vo tu minnat-kash-e-jaam-o-mai-o-minaa nahin hotaa kahtaa hai koi shoala-e-javvaala koi barq is dil pe gumaan logon ko kyaa kyaa nahin hotaa zaahid ho do-chaar-e-nigah-e-mast to dekhein aaluda ba-mai kyunki musallaa nahin hotaa haan kuchh to bayaan-e-havas-e-dil mein hai lazzat jo lab se judaa harf-e-tamannaa nahin hotaa taskin-e-dil-e-sokhta-e-shamma ki khaatir kis shab par-e-parvaana se pankhaa nahin hotaa dil ishq ne itnaa bhi na chhoDaa ki jo kahvein taqsim juz-e-laa-yatajazzaa nahin hotaa de baiThe ho dil 'aish' tum un logon ko jin ki bedaad kaa vaan bhi koi shunvaa nahin hotaa"

"shor ab aalam mein hai us shobada-pardaaz kaa charkh bhi ik shobada hai jis saraapaa naaz kaa saada-rui qahr thi aur us pe ab aayaa hai khat dekhiye anjaam kyaa hotaa hai is aaghaaz kaa tiir hove jis ki mizhgaan aur ho abru kamaan dil na ho qurbaan kyuun kar aise tir-andaaz kaa us ke shaahin-e-nigah ko taair-e-dil ke liye panja-e-mizhgaan nahin goyaa hai chungul-baaz kaa 'aish' mujh ko be-par-o-baali par-e-parvaaz hai main nahin mohtaaj kuchh baal-o-par-e-parvaaz kaa"

"jurat ai dil mai o miinaa hai vo khud-kaam bhi hai bazm aghyaar se khaali bhi hai aur shaam bhi hai zulf ke niche khat-e-sabz to dekhaa hi na thaa ai lo ek aur nayaa daam tah-e-daam bhi hai chaaraagar jaane de taklif-e-mudaavaa hai abas maraz-e-ishq se hotaa kahin aaraam bhi hai ho gayaa aaj shab-e-hijr mein ye qaul ghalat thaa jo mashhur ki aaghaaz ko anjaam bhi hai kaam-e-jaanaan meraa lab-e-yaar ke bose se sivaa khugar-e-chaashni-e-lazzat-e-dushnaam bhi hai shaikh ji aap hi insaaf se farmaaein bhalaa aur aalam mein koi aisaa bhi badnaam bhi hai zulf o rukh dair o haram shaam o sahar 'aish' in mein zulmat-e-kufr bhi hai jalva-e-islaam bhi hai"

"kyaa hue aashiq us shakar-lab ke taane sahne paDe hamein sab ke bhulnaa mat buton ki yaari par hain ye bad-kesh apne matlab ke qais o farhaad chal base afsos the vo kam-bakht apne mashrab ke shaikhiyaan shaikh ji ki deinge dikhaa mil gae vo agar kahin ab ke yaad rakhnaa kabhi na bachiyegaa mil gae aap vaqt gar shab ke us mein khush hovein aap yaa naa-khush yaar to hain sunaa usi Dhab ke yaar bin 'aish' mai-kashi tauba hai ye apne khilaaf mazhab ke"

"main buraa hi sahi bhalaa na sahi par tiri kaun si jafaa na sahi dard-e-dil ham to un se kah guzre gar unhon ne nahin sunaa na sahi shab-e-gham mein balaa se shaghl to hai naala-e-dil miraa rasaa na sahi dil bhi apnaa nahin rahaa na rahe ye bhi ai charkh-e-fitna-zaa na sahi dekh to leinge vo agar aae taaqat-e-arz-e-muddaaa na sahi kuchh to aashiq se chheD-chhaaD rahi kaj-adaai sahi adaa na sahi kyuun buraa maante ho shikva miraa chalo bejaa sahi ba-jaa na sahi uqda-e-dil hamaaraa yaa qismat na khulaa tujh se ai sabaa na sahi vaaizo banda-e-khudaa to hai 'aish' ham ne maanaa vo paarsaa na sahi"

"phuul allaah ne banaae hain mahakne ke liye aur bulbul ko banaayaa hai chahakne ke liye aatish-e-gham se banaayaa hai mire siine mein dil ko angaare ki maanind dahakne ke liye bache kam-bakht vo dil kyunki bhalaa jis dil ke mustaid ho nigah-e-shokh uchakne ke liye rind kahte hain ki khaaliq ne kiyaa hai paidaa raat din naaseh-e-behuda ko bakne ke liye rahm ai chashm banaayaa hai kahin kyaa dil ko qatra-e-ashk ho mizhgaan se Tapakne ke liye shaikh ko rindon se kah do ki nazar mein rakkhein kyunki ab DhunDe hai qaabu vo khisakne ke liye 'aish' batlaa to banaa hai dil-e-hairaan teraa misl-e-aaina ye kis shakl ke takne ke liye"

"phiraa kisi kaa ilaahi kisi se yaar na ho koi jahaan mein bargashta-e-rozgaar na ho ham us ki chashm-e-siyah-mast ke hain mastaane ye vo nashe hain ki jis kaa kabhi utaar na ho jahaan mein koi kahtaa nahin khudaa-lagti vo kyaa kare jise dil par bhi ikhtiyaar na ho na phaaDe daaman-e-sahraa ko kyuun ki dast-e-junun rahaa jab apne garebaan mein ek taar na ho na khel jaan par apni tu ai dil-e-naadaan khudaa ko yaad kar itnaa tu be-qaraar na ho na bhuul zohd pe lazzat se bakhshish-e-haq ki vo be-nasib hai jab tak gunaahgaar na ho tumhaare sar ki qasam khaa ke dard dil kaa kahun jo mere likhne kaa yuun tum ko e'tibaar na ho janaab-e-shaikh ji saahib main ek arz karun agar mizaaj-e-muqaddas pe naagavaar na ho janaab rindon se milte to hain pe Dar hai mujhe ki dushmanon kaa kisi din vahaan achaar na ho bahut hai khema-e-gardun ke phunkne ko to 'aish' is aah-e-tufta jigar mein asar hazaar na ho"

"baatein na kis ne ham ko kahin tere vaaste aur ham ne bhi na kis ki sahin tere vaaste hairaan dar-ba-dar paDe phirte hain raat din khurshid o maah zohra-jabin tere vaaste simaab o barq o shola-e-javvaala aur ye dil betaab un mein kaun nahin tere vaaste ham ne tiri talaash mein ai barq-vash kiyaa yaan ek aasmaan o zamin tere vaaste shab soz-e-gham se shama-sifat be-qaraariyaan kyaa kyaa na mere dil ko rahin tere vaaste tu zeb-e-bazm-e-ghair rahaa aur main yahaan bhaTkaa phiraa kahin kaa kahin tere vaaste ye naale vo hain yaad rahe tu na gar milaa pahuncheinge taa-ba arsh-e-barin tere vaaste kuchh aur ikhtilaaf kaa baais nahin faqat aalam mein hai chunaan-o-chunin tere vaaste fazl-e-khudaa se yaad rahe 'aish' nematein maujud hongi dekh yahin tere vaaste"

"na chhoDi gham ne mire ik jigar mein khuun ki buund kahaan se ashk kaa ho kahiye chashm-e-tar mein asar ho us ke saath ye be-iltifaati-e-gul kyuun jo 'andalib ke ho naala-e-sahar mein asar kisi kaa qaul hai sach sang ko kare hai mom rakhaa hai khaas khudaa ne ye siim o zar mein asar jo aah ne falak-e-pir ko hilaa Daalaa to aap hi kahiye ki hegaa ye kis asar mein asar jo dekh le to jahannam ki phere bandh jaae hai meri aah ke vo ek ik sharar mein asar bigaaDein charkh se ham 'aish' kis bharose par na aah mein hai na soz-e-dil-o-jigar mein asar"

"kuchh kam nahin hain shama se dil ki lagan mein ham faanus mein vo jalti hai yaan pairahan mein ham hain tufta-jaan mufaaraqat-e-gul-badan mein ham aisaa na ho ki aag lagaa dein chaman mein ham gum honge bu-e-zulf-e-shikan-dar-shikan mein ham qabza kareinge chiin ko le kar khutan mein ham gar ye hi chheD dast-e-junun ki rahi to bas mar kar bhi siina chaak kareinge kafan mein ham mahv-e-khayaal-e-zulf-e-butaan umr bhar rahe mashhur kyuun na hon kaho divaana-pan mein ham honge aziiz khalq ki nazron mein dekhnaa gir kar bhi apne yaar ke chaah-e-zaqan mein ham chhakke hi chhuT jaaeinge ghairon ke dekhnaa aa nikle haan kabhi jo tiri anjuman mein ham ai andalib daava-e-behuda par kahin ek aadh gul kaa munh na masal dein chaman mein ham aashiq hue hain parda-nashin par bas is liye rakhte hain soz-e-ishq nihaan jaan o tan mein ham zaalim ki sach masal hai ki rassi daraaz hai misdaaq us kaa paate hain charkh-e-kuhan mein ham anqaa kaa 'aish' naam to hai go nishaan nahin yaan vo bhi kho chuke hain talaash-e-dahan mein ham"