Ghazal

"khush-rang kis qadar khas-o-khaashaak the kabhi zarre bhi zeb-o-zinat-e-aflaak the kabhi ab DhunDte hain raah-e-takhaatub ke silsile kyaa ham vahi hain tum se jo bebaak the kabhi go de sake na soz-e-darun kaa hamaare saath ye dida-haa-e-khushk bhi namnaak the kabhi kuchh aur bhi aziiz hui hain nishaaniyaan daaman vo taar taar hain jo chaak the kabhi ham ne junun se pahle kiyaa thaa tumhein pasand achchhaa to ham bhi saahab-e-idraak the kabhi ab dhuup hai ki chhaanv mile umr ho gai mausam mizaaj-e-dost ke chaalaak the kabhi"

"tumhaare dil ki tarah ye zamin tang nahin khudaa kaa shukr ki paanv mein apne lang nahin ajiib us se taalluq hai kyaa kahaa jaae kuchh aisi sulh nahin hai kuchh aisi jang nahin koi bataao ki is aaine kaa mol hai kyaa jis aaine pe nishaan-e-ghubaar-o-zang nahin miraa junun hai kotaah yaa ye shahr-e-tabaah jo zakhm-e-sar ke liye yaan talaash-e-sang nahin hain saare qaafila-saalaar sab hain raah-numaa ye kyaa safar hai jo koi kisi ke sang nahin jo kuchh mata-e-hunar ho to saamne laao ki ye zamaana-e-izhaar-e-nasl-o-rang nahin"

"kiyaa hai main ne taaaqub vo subh-o-shaam apnaa main dasht dasht pukaaraa kiyaa huun naam apnaa main tujh ko bhuul na paaun yahi sazaa hai miri main apne-aap se letaa huun intiqaam apnaa ye nisbatein kabhi zaati kabhi sifaati hain har ek shakl mein laazim hai ehtiraam apnaa isi talaash mein pahunchaa huun ishq tak tere ki is havaale se paa jaaun main davaam apnaa na jaane khud se hai ye guftugu ki tujh se hai na jaane kis se mukhaatab hai ye kalaam apnaa"

"sannaaTaa tufaan se sivaa ho ye bhi to ho saktaa hai ye kuchh aur baDaa dhokaa ho ye bhi to ho saktaa hai zabt-e-junun se andaazon par dar to band nahin hote tu mujh se baDh kar rusvaa ho ye bhi to ho saktaa hai rahne de ye harf-e-tasalli meri himmat past na kar naakaami hi mein rastaa ho ye bhi to ho saktaa hai DhunDne vaalaa DhunD rahaa hai aur andaaz jafaaon ke mujh ko vafaa kaa zakhm lagaa ho ye bhi to ho saktaa hai laao ik lamhe ko apne-aap mein Duub ke dekh aauun khud mujh mein hi meraa khudaa ho ye bhi to ho saktaa hai mujh ko to ye eazaaz bahut hai lekin teri tamannaa ne mere labon se kaam liyaa ho ye bhi to ho saktaa hai aakhir apne qadmon ko kyuun ham mulzim Thahraate hain raahon ne munh moD liyaa ho ye bhi to ho saktaa hai mere tasavvur ne bakhshi hai tanhaai ko bhi ik mahfil tu mahfil mahfil tanhaa ho ye bhi to ho saktaa hai"

"sazaa hai kis ke liye aur jazaa hai kis ke liye pataa nahin dar-e-zindaan khulaa hai kis ke liye suraahi-e-mai-e-naab-o-safina-haa-e-ghazal ye harf-e-husn-e-muqaddar likhaa hai kis ke liye faqat shunid hai ab tak jo diid ho to bataaein bahaar-e-sabza-o-raqs-e-sabaa hai kis ke liye nahin jo apne liye baavajud zauq-e-nazar sahifa-e-rukh-o-rang-e-hinaa hai kis ke liye miTaa sake na agar tishna-kaamiyaan meri kaho ki khubi-e-aab-o-havaa hai kis ke liye tumhein nahin ho agar aaj gosh-bar-aavaaz ye meri fikr ye meri navaa hai kis ke liye ye ik savaal hai shikva nahin gila bhi nahin mire khudaa tiraa lutf-o-ataa hai kis ke liye"

"kabhi zakhm zakhm nikhar ke dekh kabhi daagh daagh sanvar ke dekh kabhi tu bhi TuuT miri tarah kabhi reza reza bikhar ke dekh sar-e-khaar se sar-e-sang se jo hai meraa jism lahu lahu kabhi tu bhi to mire sang-e-mil kabhi rang mere safar ke dekh isi khel se kabhi paaegaa tu gudaaz-e-qalb ki neamatein kabhi ruuTh jaa kabhi man ke dekh kabhi jiit jaa kabhi har ke dekh ye paDi hain sadiyon se kis liye tire mere biich judaaiyaan kabhi apne ghar tu mujhe bulaa kabhi raaste mire ghar ke dekh tujhe aaine mein na mil sakegaa tiri adaaon kaa baankpan agar apnaa husn hai dekhnaa to miri ghazal mein utar ke dekh vahi meraa dard ravaan-davaan vahi teraa husn javaan javaan kabhi 'mir'-o-'dard' ke bait paDh kabhi she'r 'daagh'-o-'jigar' ke dekh"

"aaj yuun mujh se milaa hai ki khafaa ho jaise us kaa ye husn bhi kuchh meri khataa ho jaise vahi maayusi kaa aalam vahi naumidi kaa rang zindagi bhi kisi muflis ki duaa ho jaise kabhi khaamoshi bhi yuun bolti hai pyaar ke bol koi khaamoshi mein bhi naghma-saraa ho jaise harf-e-dushnaam se yuun us ne navaazaa ham ko ye malaamat hi mohabbat kaa sila ho jaise is takalluf se sitam ham pe ravaa rakhtaa hai ye bhi minjumla-e-aadaab-e-vafaa ho jaise gham-e-ayyaam pe yuun khush hain tire divaane gham-e-ayyaam bhi ik teri adaa ho jaise bandagi ham ko to aai ki na aai lekin husn yuun ruuTh gayaa hai ki khudaa ho jaise"

"mire khvaabon mein khayaalon mein mire paas raho tum mire saare savaalon mein mire paas raho mere qaatil mire dildaar masihaa mere zakhm-o-marham ke havaalon mein mire paas raho sham-e-rukhsaar liye gesu-e-khamdaar liye sab andheron mein ujaalon mein mire paas raho kabhi khushbu kabhi saaya kabhi paikar ban kar sabhi hijron mein visaalon mein mire paas raho ho tumhin juuhi tumhin roli tumhein paarvati husn-e-khubaan ki misaalon mein mire paas raho apni palkon pe sajaae hue namnaak charaagh dam-e-aakhir ke sambhaalon mein mire paas raho"

"ye shauq saare yaqin-o-gumaan se pahle thaa main sajda-rez navaa-e-azaan se pahle thaa hain kaaenaat ki sab vusatein usi ki gavaah jo har zamin se har aasmaan se pahle thaa sitam hai us se kahun jism-o-jaan pe kyaa guzri ki jis ko ilm mire jism-o-jaan se pahle thaa usi ne di hai vahi ek din bujhaaegaa pyaas jo soz-e-sina-o-ashk-e-ravaan se pahle thaa usi se thi aur usi se rahegi apni talab jo aarzu ki har ik in-o-aan se pahle thaa vo sun rahaa hai miri be-zabaaniyon ki zabaan jo harf-o-saut-o-sadaa-o-zabaan se pahle thaa ye hamd husn-e-bayaan hai miraa ki ijz-e-sukhan har ek vasf jab us kaa bayaan se pahle thaa"

"ye tan ghiraa huaa chhoTe se ghar mein rahtaa hai par apnaa man ki jo har dam safar mein rahtaa hai dhanak ki tarah nikhartaa hai shab ko khvaabon mein vahi jo din ko miri chashm-e-tar mein rahtaa hai visaal us ko likhun main ki hijr kaa aaghaaz jo ek lamha musalsal nazar mein rahtaa hai chalo vo ham nahin koi to hai zarur ki jo sukun se saaya-e-divaar-o-dar mein rahtaa hai hai tang jis pe bahut vusat-e-zabaan-o-bayaan vo harf ik nigah-e-mukhtasar mein rahtaa hai"

"sikhaa saki na jo aadaab-e-mai vo khu kyaa thi jo ye na thaa to phir is darja haav-hu kyaa thi jo baar-e-dosh rahaa sar vo kab thaa shorida bahaa na jis se lahu vo rag-e-gulu kyaa thi phir ek zakhm-e-kushaada jo dil ko yaad aa jaae vo lazzat-o-khalish-e-sozan-o-rafu kyaa thi jo izn-e-aam na thaa vaaliyaan-e-mai-khaana ye sab numaaish-e-paimaana-o-subu kyaa thi agar nigaah-e-jahaan ke shumaar mein na the ham to phir hamaari ye shohrat bhi chaar-su kyaa thi na khun-e-shab thaa na shab-khun ye maan lein lekin shafaq tulu-e-sahar ko lahu lahu kyaa thi jab aa rahi hain bahaarein liye payaam-e-junun ye pairahan ko mire haajat-e-rafu kyaa thi tumhein shikaayat-e-ahl-e-vatan hai kyuun saahab khud apne shahr mein 'ghaalib' ki aabru kyaa thi"

"teraa khayaal jaan ke baraabar lagaa mujhe tu meri zindagi hai ye akasr lagaa mujhe dariyaa tire jamaal ke hain kitne is mein gum sochaa to apnaa dil bhi samundar lagaa mujhe luuTaa jo us ne mujh ko to aabaad bhi kiyaa ik shakhs rahzani mein bhi rahbar lagaa mujhe kyaa baat thi ki qissa-e-farhaad-e-kohkan apni hi daastaan-e-saraasar lagaa mujhe aamad ne teri kar diyaa aabaad is tarah khud apnaa pahli baar miraa ghar lagaa mujhe aayaa hai kaun meri ayaadat ke vaaste kyuun apnaa haal pahle se behtar lagaa mujhe kyaa yaad aa gayaa mujhe kyuun yaad aa gayaa ghuncha khilaa jo shaakh pe patthar lagaa mujhe"

"husn hi ke dam se hain ye kahaaniyaan saari ishq hi sikhaataa hai khush-bayaaniyaan saari khvaab aur khushbu ko chaahaton ke jaadu ko qaid kar ke dikhlaaein paasbaaniyaan saari dil ki dhaDkanon par hai inhisaar-e-afsaana ek si nahin hotin naujavaaniyaan saari ik tabassum-e-pinhaan ik nigaah-e-duzdida aur phir kahaani thiin sar-giraaniyaan saari yaad ban ke pahlu mein mausamon ke bistar par karvaTein badalti hain mehrbaaniyaan saari kyaa ginaaein ab tum ko haan sajaa ke rakkhi hain ham ne goshe goshe mein vo nishaaniyaan saari"