Ghazal

"kai aavaazon ki aavaaz huun main ghazal ke vaaste eazaaz huun main kai harfon se mil kar ban rahaa huun bajaae lafz ke alfaaz huun main miri aavaaz mein surat hai meri ki apne saaz ki aavaaz huun main bahut fitri thaa teraa harf-e-inkaar tiraa gham-khvaar huun dam-saaz huun main kahin to harf-e-aakhir huun main 'akbar' kisi kaa nuqta-e-aaghaaz huun main"

"harif-e-gardish-e-ayyaam to bane hue hain vo aaeinge nahin aaeinge ham saje hue hain baDaa hi khushiyon bharaa hanstaa-bastaa ghar hai miraa isi liye to sabhi qumqume jale hue hain vo khud-pasand hai khud ko hi dekhnaa chaahe so us ke chaaron taraf aaine lage hue hain ye kis hasin ki savaari guzarne vaali hai jo kaaenaat ke sab raaste saje hue hain mahak rahi hai fazaa us badan ki khushbu se chaman haraa-bharaa hai phuul bhi khile hue hain main us ki samt mein khud raasta banaaungaa vagarna us ki taraf raaste bane hue hain"

"ik lamhe ne jivan-dhaaraa rok liyaa jaise kisi qatre ne dariyaa rok liyaa kitnaa maan gumaan hai dene vaale ko dard diyaa hai aur mudaavaa rok liyaa donon aalam mil ke jis ko rokte hain main ne us tufaan ko tanhaa rok liyaa kabhi kabhi to mujh ko yuun mahsus huaa jaise kisi ne meraa hissa rok liyaa vo to sab kaa dost hai meraa kyaa hogaa us ko to bas jis ne rokaa rok liyaa ek si saari subhein ek si shaamein hain kis ne 'akbar' bahtaa dariyaa rok liyaa"

"abhi zamin ko haft aasmaan banaanaa hai isi jahaan ko mujhe do-jahaan banaanaa hai bhaTak rahaa hai akelaa jo koh-o-sahraa mein us ek aadmi ko kaarvaan banaanaa hai ye shaakh-e-gul jo ghiri hai hazaar kaanTon mein mujhe isi se nayaa gulsitaan banaanaa hai main jaantaa huun mujhe kyaa banaanaa hai lekin vahaan banaane se pahle yahaan banaanaa hai charaagh le ke use shahr shahr DhunDhtaa huun bas ek shakhs mujhe raaz-daan banaanaa hai hamein bhi umr-guzaari to karni hai 'akbar' unhein bhi mashghala-e-dil-baraan banaanaa hai"

"mujhe likkho vahaan kyaa ho rahaa hai yahaan to phir tamaashaa ho rahaa hai havaa ke dosh par hai aashiyaana parinda tinkaa tinkaa ho rahaa hai abhi parvaaz ki fursat hai kis ko abhi to daana-dunkaa ho rahaa hai koi naadida ungli uTh rahi hai miri jaanib ishaara ho rahaa hai vo apne haath sidhe kar rahe hain hamaaraa shahr ulTaa ho rahaa hai na jaane kis taraf se likkhaa jaae chaman divaar-e-fardaa ho rahaa hai"

"dil ki girhein kahaan vo kholtaa hai chaahaton mein bhi jhuuT boltaa hai sang-rezon ko apne haathon se motiyon ki tarah vo roltaa hai kaisaa mizaan-e-adl hai us kaa phuul kaanTon ke saath taultaa hai aisaa vo diplomat hai 'akbar' zahr amrit ke saath gholtaa hai"

"vo jab nazrein milaa kar bolte hain to but allaahu-akbar bolte hain kabhi khaamosh jo hone lagaa huun to vo khvaabon mein aa kar bolte hain unhein dekhun to kaise kaise jazbe miri aankhon ke andar bolte hain havaaein naachti hain mere sar par mire khuun mein samundar bolte hain main sadiyon ke tafaakhur ki zabaan huun zamaane mere andar bolte hain ye kaisaa shahr hai mazlum chup hain magar zaalim baraabar bolte hain taqaddus mahr ban jaae to 'akbar' phir aise mein abuzar bolte hain"

"tiraa aanchal ishaare de rahaa hai falak raushan sitaare de rahaa hai havaa sahlaa rahi hai us ke tan ko vo shoala ab sharaare de rahaa hai khule hain phuul har-su jaise koi tiraa sadqa utaare de rahaa hai guzarne vaale kab the hijr ke din magar aashiq guzaare de rahaa hai junubi asia ko jaise 'akbar' ye din koi udhaare de rahaa hai"

"gai guzri kahaani lag rahi hai mujhe har shai puraani lag rahi hai vo kahtaa hai ki faani hai ye duniyaa mujhe to jaavedaani lag rahi hai ye zikr-e-aasmaan kaisaa ki mujh ko zamin bhi aasmaani lag rahi hai vo is husn-e-tavajjoh se mile hain ye duniyaa pur-maaani lag rahi hai ghazal duniyaa mein rahtaa huun main 'akbar' ye meri raajdhaani lag rahi hai"

"kahaa thaa us ne mohabbat ki aabru rakhnaa chubhe hon kitne bhi kaanTe gulon ki khu rakhnaa dilon ko toD na Daale tumhaari haq-goi bajaae harf ke aaina ru-ba-ru rakhnaa jo vaqt ahl-e-vafaa se kabhi lahu maange to sab se pahle lab-e-tegh par gulu rakhnaa khizaan se haar na jaanaa kisi bhi haalat mein numu mile na mile khvaahish-e-numu rakhnaa buraa na kahnaa zamaane ko ham zamaana hain hamaare baad zamaane se guftugu rakhnaa faqih-e-shahr ke fatve ki haisiyat kyaa hai to khud ko apni nigaahon mein surkh-ru rakhnaa visaal-e-dost ki saaat bhi aane vaali hai sahar qarib hai 'akbar' abhi vazu rakhnaa"

"rah-e-gumaan se ajab kaarvaan guzarte hain miri zamin se kai aasmaan guzarte hain jo raat hoti hai kaisi mahakti hain galiyaan jo din nikaltaa hai kyaa kyaa butaan guzarte hain kabhi jo vaqt zamaane ko detaa hai gardish mire makaan se bhi kuchh laa-makaan guzarte hain kabhi jo dekhte hain muskuraa ke aap idhar dil-o-nigaah mein kyaa kyaa gumaan guzarte hain"

"hansi mein saaghar-e-zarrin khanak khanak jaae shabaab us ki sadaa kaa chhalak chhalak jaae dil-o-nazar mein basi hai vo chaand si surat vo dil-kashi hai ki baalak humak humak jaae libaas mein hai vo tarz-e-tapaak-e-aaraaish jo ang chaahe chhupaanaa jhalak jhalak jaae qadam qadam tiri raanaaiyon ke dar vaa hon ravish ravish tiraa aanchal Dhalak Dhalak jaae nafas nafas ho sabaa ki tarah bahaar-angez ufuq ufuq gul-e-hasti mahak mahak jaae nashaat-e-qurb ke lamhon mein us ki angDaai ubhar ke khaak-e-badan se dhanak dhanak jaae baqaa ke raaz hain sab us pe munkashif 'akbar' vo shaakh-e-sabz havaa se lachak lachak jaae"

"dekhne ko koi tayyaar nahin hai bhaai dasht bhi be-dar-o-divaar nahin hai bhaai aisaa bhi sidq-o-safaa kaa nahin daavaa ham ko zindagi shaikh ki dastaar nahin hai bhaai paak-baazon ki ye basti hai farishton kaa nagar koi is shahr mein mai-khvaar nahin hai bhaai ishq karnaa hai to chhuTTi nahin karni koi ishq mein ek bhi itvaar nahin hai bhaai"

"raat aai hai bachchon ko paDhaane mein lagaa huun khud jo na banaa un ko banaane mein lagaa huun vo shakhs to rag rag mein miri guunj rahaa hai barson se galaa jis kaa dabaane mein lagaa huun utraa huun diyaa le ke nihaan-khaana-e-jaan mein soe soe aaseb jagaane mein lagaa huun patthar huun to shishe se mujhe kaam paDaa hai shisha huun to patthar ke zamaane mein lagaa huun fankaar ba-zid hai ki lagaaegaa numaaish main huun ki har ik zakhm chhupaane mein lagaa huun kuchh paDhnaa hai kuchh likhnaa hai kuchh ronaa hai shab ko main kaam sar-e-shaam chukaane mein lagaa huun aise mein to ab sabr bhi mushkil huaa 'akbar' sab kahte hain main us ko bhulaane mein lagaa huun"

"hu-ba-hu aap hi ki murat hai zindagi kitni khub-surat hai jis tarah phuul ki gulistaan ko zindagi ko miri zarurat hai khaas mehmaan hain aadam o havvaa ik nai duniyaa ki mahurat hai kahti hai kuchh zabaan se kah 'akbar' is tarah kaahe mujh ko ghurat hai"

"kahte hain ham udhar hain sitaaraa hai jis taraf main jaantaa huun un kaa ishaaraa hai jis taraf sab chaahte hain sath-e-samandar pe likkhe jaaein par jaate hain udhar ko kinaaraa hai jis taraf ye kyaa zarur hai yahaan umrein guzaar dein ik haadse ne ham ko utaaraa hai jis taraf ye aasmaan aaine ki shakl hai koi ham us taraf hain us kaa nazaaraa hai jis taraf"

"zor-o-zar kaa hi silsila hai yahaan lafz ko kaun puchhtaa hai yahaan pahlaa to ab kisi jagah bhi nahin jis taraf dekho dusraa hai yahaan raat din phir rahaa huun galiyon mein meraa ik shakhs kho gayaa hai yahaan sehr hai yaa tilism hai kyaa hai har koi raah bhultaa hai yahaan har kahin sach hi bolnaa chaahe shaayad 'akbar' nayaa nayaa hai yahaan"

"kaafir thaa main khudaa kaa na munkir duaa kaa thaa lekin yahaan savaal shikast-e-anaa kaa thaa kuchh ishq-o-aashiqi pe nahin meraa e'tiqaad main jis ko chaahtaa thaa hasin intihaa kaa thaa jal kar giraa huun sukhe shajar se uDaa nahin main ne vahi kiyaa jo taqaazaa vafaa kaa thaa taarik raat mausam-e-barsaat jaan-e-zaar girdaab pichhe saamne tufaan havaa kaa thaa ik umr baad bhi na shifaa ho sake to kyaa rag rag mein zahr sadiyon ki aab-o-havaa kaa thaa go raahzan kaa vaar bhi kuchh kam na thaa magar jo vaar kaargar huaa vo rahnumaa kaa thaa 'akbar' jahaan mein kaar-kushaai buton ki thi achchhaa rahaa jo maanne vaalaa khudaa kaa thaa"

"tamaam aalam-e-imkaan mire gumaan mein hai vo tiir huun jo abhi vaqt ki kamaan mein hai abhi vo subh nahin hai ki meraa kashf khule vo harf-e-shaam huun jo ajnabi zabaan mein hai in aanganon mein hain barson se ek se din raat yahi rukaa huaa lamha har ik makaan mein hai ye aks-e-aab hai yaa is kaa daaman-e-rangin ajiib tarah ki surkhi si baadbaan mein hai jahaan dalil ko patthar se toDnaa Thahre vo shahr-e-sang-dilaan sakht imtihaan mein hai mujhe adu ki baqaa bhi aziiz hai 'akbar' ki ek phuul si divaar darmiyaan mein hai"

"naam 'akbar' to miraa maan ki duaa ne rakkhaa haan bharam us kaa magar mere khudaa ne rakkhaa vo bhi din thaa ki tire aane kaa paighaam aayaa tab mire ghar mein qadam baad-e-sabaa ne rakkhaa kis tarah logon ne maangin thiin duaaein us ki kuchh lihaaz is kaa na be-mehr havaa ne rakkhaa aise haalaat mein ik roz na ji sakte the ham ko zinda tire paimaan-e-vafaa ne rakkhaa ittifaaqaat ke pichhe bhi hain asbaab-o-ilal ik na ik apnaa sabab dast-e-qazaa ne rakkhaa jis ne rakkhaa tiri miTti hui qadron kaa lihaaz kuchh khayaal is kaa nahin tu ne zamaane rakkhaa sirf 'akbar' hi nahin dekh ke tasvir huaa sab ko hairaan tire naqsh-e-kaf-e-paa ne rakkhaa"

"sharaar-e-sang jo is shor-o-shar se niklegaa jalus-e-laala-o-nasrin kidhar se niklegaa main jaantaa huun ki us ki khabar na aaegi tanaazur us kaa magar har khabar se niklegaa sabhi asiir hue apni apni subhon ke vo koi hogaa jo qaid-e-sahar se niklegaa kisi ko apne sivaa kuchh nazar nahin aataa jo dida-var hai tilism-e-nazar se niklegaa jalaal-e-husn dikhaa mere maahtaab-e-jamaal tu raushni hai shabon ke asar se niklegaa shabon ko jaagte ho jis ke khvaab mein 'akbar' vo shaahkaar kamaal-e-hunar se niklegaa"