Ghazal

"tu shab-o-roz se halkaan nazar aataa hai chand hi roz kaa mehmaan nazar aataa hai khushk aankhon mein basaa dard kaa sahraa dekho har koi chaak-garebaan nazar aataa hai ab talak meri samajh mein nahin aaya ki ye ghar kis ke jaane pe bayaabaan nazar aataa hai Daal rakkhe hain mohabbat ke arize ham ne kyon ye dariyaa tumhein sunsaan nazar aataa hai chaahtaa huun ki kisi kaam hi aa jaaun kahin par sabhi ko safar aasaan nazar aataa hai"

"dil ko teraa gumaan saa hotaa hai ek jazba javaan saa hotaa hai shab ki tanhaaiyon mein aankhon se ek dariyaa ravaan saa hotaa hai dard kaa aaftaab Dhalne par aasmaan khun-chakaan saa hotaa hai tu nahin hai pa teraa gham meraa aadatan ham-zabaan saa hotaa hai teri parchhaaiyaan ubharti hain aankh mein jab dhuaan saa hotaa hai niind aati hai dasht mein us dam ishq jab saaebaan saa hotaa hai tu to 'amrit' hai phir bhi maut ke vaqt kyuun bhalaa raaegaan saa hotaa hai"

"aisaa nahin milegaa kahin be-qaraar dil aashuftagi kaa maaraa huaa sogvaar dil baazaar bhi hai dair-o-haram bhi hain ishq bhi jhele to jhele kitnaa gham-e-rozgaar dil kuchh roz se vo khasta-tani hai ki kyaa kahun siina rafu kiyaa to huaa taar-taar dil thaa ik khayaal us kaa so vo bhi chalaa gayaa kis se nikaale jaa ke bhalaa ab ghubaar-e-dil bas ek sang-e-dar se rahaa rishta umr-bhar aisaa nahin milegaa ibaadat-guzaar dil teri hi be-niyaaz adaa kaa asar ye hai ab khud hi DhunDhne lagaa raah-e-faraar dil is shahr-e-rang-o-nur se aage nikal gayaa ab jaa chukaa hai ishq-e-majaazi ke paar dil"

"milte hain shahr-e-yaar mein manzar gulaab ke sab saaebaan gulaab ke sab dar gulaab ke jab aaftaab khuun mein nahaayaa zavaal par baadal lahu-lahu the ki lashkar gulaab ke saayaa kisi kaa sehn-e-chaman par bikhar gayaa aur ban rahe hain baagh mein paikar gulaab ke koi to rang-e-aatish-e-lab ko badal gayaa pahle the un ke honT baraabar gulaab ke yaaqut thaa sharar the lahu thaa ki aab-e-surkh aankhein thiin un ki yaa ki the saaghar gulaab ke bhanvaron se puchhe koi bhalaa ras ko chhoD kar kyaa DhunDte hain jaane vo andar gulaab ke bulbul se koi kah de chaman mein ki in dinon 'amrit' bhi ho gae hain sukhanvar gulaab ke"

"qaraar DhunD rahaa huun magar qaraar nahin ki ik zaraa dil-e-muztar pe ikhtiyaar nahin duaaein kartaa huun didaar-e-yaar ki lekin ajab ye hai ki qayaamat kaa intizaar nahin kabhi to us ke kahe par hi maan letaa thaa aur ab ye haal ki aankhon pe eatibaar nahin kabhi use kabhi mujh ko hai Dar bichhaDne kaa shab-e-visaal kisi taur khush-gavaar nahin"

"vo sab ilzaam mere sar pe dhartaa jaa rahaa hai zamaane ki nigaahon mein sanvartaa jaa rahaa hai nai har dosti ke marhale par ek rishta ikaTThaa kartaa jaataa huun bikhartaa jaa rahaa hai kisi ko bhaa gai hai mere raste ki musibat safar hisse kaa mere koi kartaa jaa rahaa hai vo haasil ho chukaa hai jis ko paane ki thi hasrat junun jo thaa kabhi sar par utartaa jaa rahaa hai"

"lamhe-bhar mein tum ne meri har khubi ko khaam kiyaa main ne kahaa ki naam kiyaa hai tum ne kahaa badnaam kiyaa apnaa kaam thaa us tak jaanaa gardish ho yaa sozish ho us ke dar tak pahunche dastak dete hi aaraam kiyaa jis ke sar par taaj kabhi thaa fikr mein guzri us ki bhi dekhe duniyaa is ulfat ne kyaa teraa anjaam kiyaa likhni thi betaabi dil ki 'amrit' khat mein yuun likkhi kuchh kaaTaa kuchh likkhaa qaasid ke haathon paighaam kiyaa"

"use ghurur bahut ab hai paarsaai kaa koi to ho ke jo daavaa kare khudaai kaa use ye ranj ki us kaa kahaa nahin maanaa mujhe malaal huaa apni naa-rasaai kaa tu vaqt rahte mujhe kyon sadaa nahin detaa kabhi to lutf uThaa meri ham-navaai kaa qafas badan kaa jo ik aan mein idhar TuuTaa to ruuh jashn manaane lagi rihaai kaa use bhi apne kai dost mil gae 'amrit' tujhe bhi vaqt milaa khud se aashnaai kaa"

"har raaz-e-nihaan aaj nikal aaya zabaan se kyon chhuptaa nahin kuchh bhi is andaaz-e-bayaan se ik main huun jise koi tavaqqo hai na ummid ik tum ho lagaae hue dil saare jahaan se itnon ne pukaaraa ki gayaa ham se bichhaD kar dil DhunDh ke laaein bhi to ab laaein kahaan se us ko bhi bulaataa hai yahaan koi taDap kar mujh ko bhi koi khinchne lagtaa hai vahaan se ik tum hi nahin haal-e-dilaan jaanne vaale hoti hai zamaane ko khabar aah-o-fughaan se pahle to junun ne mire tayyaar kiyaa but ab phoDtaa rahtaa huun main sar sang-e-giraan se jiine ki alaamat ho na 'amrit' to bhalaa phir bekaar si ik baat pe kyon jaate ho jaan se"

"taa-hadd-e-nazar barhami-e-kaun-o-makaan hai dekhe se to lagtaa hai ki aaghaaz-e-jahaan hai ik aan hi khinchte hain nigaahon mein do manzar ye aalam-e-maujud haqiqat hai gumaan hai dekhe to bahut dair-o-haram taak kalisaa duniyaa mein magar tujh saa hasin koi kahaan hai har zarra tiraa paikar-e-partav nazar aaya ye soch rahaa huun tu nihaan hai ki ayaan hai bulbul ke ye naghme ki havaaon ki ye sarsar karte hain bhajan teraa ki aavaaz-e-azaan hai"

"kuuza jaise ki chhalak jaae hai bhar jaane par koi aansu hi bahaa de mire mar jaane par kaam aaya nahin meraa tah-e-dariyaa honaa pichhle saahil se bhi naakaam ubhar jaane par hai khabar jhuTi magar phir bhi khabar bheji jaae kyaa khabar koi yaqin kar le khabar jaane par koh-e-dil koi bhi lamha kabhi khaali na rahaa ek viraani rahi gham ke utar jaane par bujh gayaa vaqt se pahle jo diyaa vo main huun khush nahin hoti havaa mere Thahar jaane par toD kar mujh ko kisi dil ko sukun aataa hai aur simTegaa koi khaak bikhar jaane par yaa to yuun ho ke kabhi vaqt pe kaam aa jaae kaam 'amrit' kaa nahin dard guzar jaane par"

"kuchh der tak to mujh ko nihaaraa chalaa gayaa kal subh meri aankh kaa taaraa chalaa gayaa vo khush huaa ki us ko khasaaraa nahin huaa main ro rahaa thaa meraa sahaaraa chalaa gayaa vo guftugu ke vaaste aaya thaa baam par main chup rahaa to uTh ke sitaaraa chalaa gayaa karnaa thaa intikhaab maraasim mein ishq mein main ne siraa bachaayaa kinaaraa chalaa gayaa vo puchhte hain kab khudaa aayaa hai farsh par ham ne kahaa ki tum ko utaaraa chalaa gayaa ham ro rahe hain us ko jise koi gham nahin us ko to kuchh nahin thaa hamaaraa chalaa gayaa 'amrit' tumhein bhi duniyaa bari lagne lag gai koi to is jahaan se tumhaaraa chalaa gayaa"

"bahut qimti hain ye pairon ke chhaale andheron mein hain ye saraapaa ujaale chamakne ki khaatir hai betaab har shai koi raushni in andheron pe Daale tabiat se qaatil hain par lag rahe hain bahut sidhe-saade baDe bhole-bhaale jafaa karne vaale jafaa kar rahe hain vafaa kar rahe hain vafaa karne vaale in aankhon ke dipak bujhe jaa rahe hain khudaa ke liye rukh se pardaa uThaa le pari-rukh hain har-su tiri anjuman mein kahaan tak koi apne dil ko sanbhaale jinhein sun ke gulshan mein hai shaadmaani ye naghme hain 'amrit' ke bulbul ke naale"