Ghazal

"jahaan dar thaa vahaan divaar kyuun hai alag naqshe se ye meamaar kyuun hai khudaa aazaad thaa haakim ki had se khudaa ke shahr mein sarkaar kyuun hai bahut aasaan hai mil-jul ke bahnaa nadi aur dhaar mein paikaar kyuun hai hazaaron rang ke phulon se khinch kar banaa hai shahd to bekaar kyuun hai kisi bhi samt se aa kar parinde sajaaein jhiil to aazaar kyuun hai tiri mahfil mein sab baiThe hain aa kar hamaaraa baiThnaa dushvaar kyuun hai banaa kar rakh tu ghar achchhaa rahegaa tu maalik ban kiraae-daar kyuun hai tumhaare saath ham aage baDhe the hamaari piiTh par talvaar kyuun hai khudaa se kyaa raqaabat hai sanam ki rah-e-masjid nazar mein khaar kyuun hai ibaarat mein na kar tahrif bejaa hamaare naam se bezaar kyuun hai parinde ko jo mauqa do dikhaa de bandhe par kaa safar laachaar kyuun hai paDosi ho to phal yaa phuul laate tumhaare haath mein hathiyaar kyuun hai zamin phaili hui hai aasmaan tak bas ik TukDe pe yuun takraar kyuun hai"

"tumhaare shahr mein itne makaan gire kaise mire aziiz Thikaane dhuaan hue kaise main shahr-e-jabr se guzraa to surakh-ru ho kar unhein ye fikr lahu kaa nishaan miTe kaise sunaa rahaa huun kahaani hazaar raaton ki ki shaahzaade ke sar se sinaan haTe kaise hisaab khuub rakhaa tum ne apni laagat kaa mire nisaab mein sud-o-ziyaan chale kaise har ek shakhs tumhaari tarah nahin hotaa koi kisi se mohabbat kahaan kare kaise jahaan bhi shaam hui ghar banaa liyaa apnaa makaan bahut the magar be-makaan rahe kaise 'anis' tum to bahut tez chaal chalte the zaraa hamein bhi bataao miyaan gire kaise"

"miraa har tiir nishaane pe na pahunchaa aakhir dar-safar mein bhi Thikaane pe na pahunchaa aakhir totli umr mein jo bachcha zaraa mushfiq thaa kuchh baDaa ho ke dahaane pe na pahunchaa aakhir ji ko samjhaataa huun qismat mein likhaa thaa so huaa kuchh sambhal kar bhi bahaane pe na pahunchaa aakhir ek gham hotaa to siine se lagaa letaa koi gham kaa ambaar uThaane pe na pahunchaa aakhir phal katarne ke liye Daar utar aati thi be-samar koi bulaane pe na pahunchaa aakhir shahr kuchh chhuT gae gard-e-safar lipTi rahi koi rudaad sunaane pe na pahunchaa aakhir"

"is shahr ke log ajiib se hain ab sab hi tumhaare asiir hue jab jaan pe baraste the patthar us vaqt hamin dil-gir hue kuchh log tumhaari aankhon se karte hain talab hiire moti ham sahraa sahraa Duub gae ik aan mein jogi faqir hue tum dard ki lazzat kyaa jaano kab tum ne chakhe hain zahr-e-subu ham apne vajud ke shaahid hain sangsaar hue shamshir hue ye pahron pahron soch-nagar raaton raaton be-khvaab lahar phir kaise kaTegaa dhup-safar jab piir luTi jaagir hue ik umr guzaari hai yuun hi saayon ke taaaqub mein ham ne Tuk baiTh gae phir chal nikle hans bol liye dil-gir hue kuchh shahr tumhaaraa tang bhi thaa kuchh tum bhi the kamzor zaraa patthar ki nigaahon ke Dar se tum apne hi ghar mein asiir hue"

"baDaa aazaar-e-jaan hai vo agarche mehrbaan hai vo agarche mehrbaan hai vo baDaa aazaar-e-jaan hai vo misaal-e-aasmaan hai vo mujhe zarkhez kartaa hai mujhe zarkhez kartaa hai misaal-e-aasmaan hai vo karim-o-saaebaan hai vo mujhe mahfuz rakhtaa hai mujhe mahfuz rakhtaa hai karim-o-saaebaan hai vo agarche be-makaan hai vo panaahein mujh ko detaa hai panaahein mujh ko detaa hai agarche be-makaan hai vo baDaa aaraam-e-jaan hai vo liye phirtaa hai siine mein liye phirtaa hai siine mein baDaa aaraam-e-jaan hai vo agarche be-zabaan hai vo nazar se baat kartaa hai nazar se baat kartaa hai agarche be-zabaan hai vo ik aisaa zahr-e-jaan hai vo main jis ko pi ke zinda huun main jis ko pi ke zinda huun ik aisaa zahr-e-jaan hai vo ki bahr-e-be-karaan hai vo tabhi saahil nahin miltaa tabhi saahil nahin miltaa ki bahr-e-be-karaan hai vo mizaaj-e-dushmanaan hai vo paraayaa bhi hai apnaa bhi paraayaa bhi hai apnaa bhi mizaaj-e-dushmanaan hai vo kamaal-e-dostaan hai vo vahi avval vahi aakhir vahi avval vahi aakhir kamaal-e-dostaan hai vo amir-e-kaarvaan hai vo main us ki raah chaltaa huun main us ki raah chaltaa huun amir-e-kaarvaan hai vo baDaa gauhar-fishaan hai vo mujhe bhi kuchh guhar degaa mujhe bhi kuchh guhar degaa baDaa gauhar-fishaan hai vo sunahri kahkashaan hai vo dahakte hain kai suraj dahakte hain kai suraj sunahri kahkashaan hai vo sunaa hai mehrbaan hai vo 'anis' itraate phirte hain 'anis' itraate phirte hain sunaa hai mehrbaan hai vo"

"naam teraa bhi rahegaa na sitamgar baaqi jab hai firaun na changez kaa lashkar baaqi apne chehron ko siyaahi mein chhupaane vaalo nok-e-neza pe hai suraj saa koi sar baaqi tere virse pe hain ghaasib ki uqaabi nazrein ghaflaton se nahin rahte ye javaahar baaqi ik sadaf sath-e-samandar pe bahaa jaataa hai aur saahil pe nahin ek shanaavar baaqi ek saf hon to banein siisa pilaai divaar hon adu ke liye raahein na kahin dar baaqi qadr kam hoti hai taqsim jo hotaa hai adu haasil-e-jama mein barakat hai baraabar baaqi jaal phir laayaa hai sayyaad phansaane ke liye mil ke uD jaaein parinde na rahe Dar baaqi zulm se sar ko na Takraaein to phir sajda karein haan pata hai ki dar hogaa na kahin sar baaqi ham shahidon ko kabhi murda nahin kahte 'anis' rizq jannat mein mile shaan yahaan par baaqi"

"dil par yunhi choT lagi to kuchh din khuub malaal kiyaa pukhta umr ko bachchon jaise ro ro kar behaal kiyaa hijr ke chhoTe gaanv se ham ne shahr-e-vasl ko hijrat ki shahr-e-vasl ne niind uDaa kar khvaabon ko paamaal kiyaa uthle kuein bhi kal tak paani ki daulat se jal-thal the ab ke baadal aise sukhe naddi ko kangaal kiyaa suraj jab tak Dhaal rahaa thaa sonaa chaandi aankhon mein bhiiD mein sikke khuub uchhaale sab ko maalaa-maal kiyaa lekin jab se suraj Duubaa aisaa ghor andheraa hai saae sab maadum hue aur aankhon ko kangaal kiyaa sakht zamin mein phuul ugaate to kahte kuchh baat hui hijr mein tum ne aansu bo kar aisaa kaun kamaal kiyaa aakhir mein 'ansaari'-saahab apne rang mein Duub gae us ko duaa di us ko chheDaa shahr abiir gulaal kiyaa"

"main sahraa thaa jazira ho gayaa huun samundar dekh teraa ho gayaa huun ba-juz ik naam kahtaa huun na suntaa main aisaa gungaa bahraa ho gayaa huun tiri aankhon ne dhoyaa hai mujhe yuun main bilkul saaf-suthraa ho gayaa huun tu suraj hai main aaine kaa TukDaa kiran chhu kar sunahraa ho gayaa huun mujhe raushan kiye hai aks teraa main teraa shokh chehra ho gayaa huun baDi lazzat hai teri qurbaton mein tar-o-taaza saveraa ho gayaa huun"

"pathrili si shaam mein tum ne aise yaad kiyaa jaanam saari raat tumhaari khaatir main ne zahr piyaa jaanam suraj ki maanind banaa huun reza reza bikhraa huun ab jivan kaa sar-chashma huun vaise khuub jilaa jaanam tum ne mujh mein jo kuchh khoyaa us ki qimat tum jaano main ne tum se jo kuchh paayaa hai vo besh-bahaa jaanam tum ko bhi pahchaan nahin hai shaayad meri uljhan ki lekin ham milte rahte to achchhaa hi rahtaa jaanam ye saahab jin se mil kar sab kaa ji khush ho jaataa hai raat gae tak un ke kamre mein jaltaa hai kyaa jaanam rakh paao to rok lo ham ko gahraai ke baasi hain bahte paani ke qatron mein hotaa hai dariyaa jaanam dard-e-judaai mein likkhe hain sher tumhaare naam bahut tum mere ghar mein rahtin to kyaa aisaa hotaa jaanam"

"mujh pe har zulm ravaa rakh ki main jo huun so huun mujh ko apne se judaa rakh ki main jo huun so huun main ki maslub huun de mujh ko bhi zaalim kaa khitaab sunnat-e-isaa jilaa rakh ki main jo huun so huun mere ghar mein hai jo ghaasib to nikaalun ki nahin mujh pe ilzaam-e-jafaa rakh ki main jo huun so huun tere maqtul pe sargarm hain saare munsif meri laashon ko uThaa rakh ki main jo huun so huun garm aahon pe hai ilzaam ki huun shoala-nafas mujh ko phunkon se bujhaa rakh ki main jo huun so huun kyuun sahifon mein likhaa hai ki milegaa insaaf lafz-o-maani na judaa rakh ki main jo huun so huun teri zambil mein har chaal puraani hai raqib mujh ko apnon se laDaa rakh ki main jo huun so huun apne virse se tiraa qabza haTaanaa hai haris naam dahshat ki balaa rakh ki main jo huun so huun main ne aankhon mein jalaa rakhaa hai aazaadi kaa tel mat andheron se Daraa rakh ki main jo huun so huun gar miraa haq na milegaa to bigaD jaaegi baat apne pahlu se lagaa rakh ki main jo huun so huun karbalaa rakh ke hatheli pe chalaa huun ghar se baiat-e-zulm haTaa rakh ki main jo huun so huun jab zaminon mein jaDein hain to kidhar jaaungaa meri shaakhein na kaTaa rakh ki main jo huun so huun adl ki miTTi mein ugte nahin dahshat ke babul apni miTTi ko safaa rakh ki main jo huun so huun band aankhon se siyah-ru nazar aaegaa 'anis' chashm-e-binaa ko khulaa rakh ki main jo huun so huun"

"jis ko samjhe the tavangar vo gadaagar niklaa zarf mein kaasa-e-darvesh samundar niklaa kabhi darvesh ke takiya mein bhi aa kar dekho tang-dasti mein bhi aaraam mayassar niklaa mushkilein aati hain aane do guzar jaaeingi log ye dekhein ki kamzor dilaavar niklaa jab girafton se bhi aage ho pahunch muTThi ki tab lagegaa ki samundar mein shanaavar niklaa koi mauhum saa chehra jo bulaataa hai hamein baadalon ki tarah shaklein vo badal kar niklaa dil ajab chiiz hai kis miTTi mein jaa kar boein jaD yuun pakDe ki lage peD tanaavar niklaa laash qaatil ne khuli pheink di chauraahe par dekhne vaalaa koi ghar se na baahar niklaa dekhne mein to dhanak chand hi lamhe thi 'anis' saat rangon kaa magar didani manzar niklaa"