Ghazal

"na jaaegaa kisi ke gesuon kaa kham-ba-kham honaa bahut mushkil hai mere shauq ki uljhan kaa kam honaa sanam-khaana ho yaa kaaba jhukaa dungaa jabin apni agar saabit huaa mujh par tiraa naqsh-e-qadam honaa bhalaa kyunkar vo bachtaa aap ke daam-e-mohabbat se muqaddar hi mein thaa jis ke asir-e-ranj-o-gham honaa na itni de ki main bahkun na tishna-lab rahun saaqi ba-qadr-e-zarf saaghar de buraa hai besh-o-kam honaa nazar vaalon se puchho tum bulandi ku-e-jaanaan ki taajjub kyaa hai us kaa ghairat-e-baagh-e-iram honaa faqat ye soch kar aansu bahaataa huun shab-e-furqat kabhi to rang laaegaa miraa ye chashm-e-nam honaa chaman ke gosha gosha mein faqat bijli kaa charchaa hai kuchh aisaa rang laayaa hai miraa jal kar bhasam honaa tah-e-khanjar bhi honTon par mire aaya to ye aaya mubaarak ho sitam-ijaad ko ahl-e-sitam honaa khayaal-e-hur mein din-raat vo badmast rahtaa hai nahin kuchh kaam aaya shaikh kaa ahl-e-haram honaa tavaqqo rahm ki us se na rakh tu ai dil-e-naadaan kabhi mumkin nahin jallaad kaa ahl-e-karam honaa adaa karke rahungaa ek din main is farize ko agar taqdir mein hi likh gayaa hai sar qalam honaa hazaaron ranj-o-gham sah kar bhi main hanstaa huun ai 'ahmar' bashar ke vaaste hai laazmi saabit-qadam honaa"

"teri khaatir ai dil-e-betaab hain barbaad ham phir rahe hain maare maare chaar-su naashaad ham jaa ke bazm-e-yaar mein khud hi hue hain jab asiir kis tarah laaein zabaan par shikva-e-bedaad ham jis ki khaatir ahl-e-duniyaa ki nigaahon se gire khun-e-dil se likh rahe hain aaj vo rudaad ham aaj tak jis ne kisi par rahm khaayaa hi nahin us pe hotaa kyaa asar karte bhi jo fariyaad ham ik na ik din panja-e-sayyaad mein aanaa hi thaa rahte kaise gulsitaan mein is tarah aazaad ham har taraf phailaa huaa hai jab tiraa daam-e-fareb taa-ba-kai bachte tire phandon se ai sayyaad ham gulsitaan bhar thaa magar us shaakh par bijli giri rakh rahe the aashiyaan ki jis jagah buniyaad ham ban gayaa hai bante bante ik mizaaj-e-mustaqil dil dhaDaktaa hai tujhe karte hain jab bhi yaad ham qatl-gah mein puchhtaa hai ai sitamgar haal-e-dil zabh kar de ki kaheinge kuchh na ab jallaad ham bevafaa bedaad-gar se milne ki ab zid na kar us ki mahfil mein na jaaeinge dil-e-naashaad ham kuchh samajh hi mein nahin aataa hai 'ahmar' is kaa bhed ek zaalim ke liye kyon ho gae barbaad ham"

"dil kisi se lagaa ke dekh liyaa choT par choT khaa ke dekh liyaa rahm kis khush-nasib par aayaa kis ko chilman uThaa ke dekh liyaa chain aataa nahin kisi pahlu tum ne mujh ko sataa ke dekh liyaa tere armaan ke sivaa kyaa hai dil ki duniyaa mein aa ke dekh liyaa bevafaa kaun baa-vafaa hai kaun aap ne aazmaa ke dekh liyaa umr-e-rafta ki yaad aa hi gai aaina jab uThaa ke dekh liyaa hil gayaa arsh hai are zaalim kaaba-e-dil ko Dhaa ke dekh liyaa ye bhi ik chaal hai sataane ki jab mile muskuraa ke dekh liyaa be-vafaa hai zamaana ai 'ahmar' har tarah aazmaa ke dekh liyaa"

"kyaa kahun kis se kahun kahne kaa kuchh haasil nahin jab se dekhaa hai unhein qaabu mein meraa dil nahin lutf kyaa piine kaa aaegaa bhalaa ai mai-kasho mai to hai maujud lekin saaqi-e-mahfil nahin tere aane se vo kyaa mahfuz ho ai fasl-e-gul jis ko duniyaa mein mayassar hi sukun-e-dil nahin meri gardan par chhuri ye kah kar us ne pher di mujrim-e-ulfat kabhi bhi rahm ke qaabil nahin main ne kis kis se nahin puchhaa pataa teraa ai dost umr bhar DhunDaa magar mujh ko mili manzil nahin hur-e-jannat ki tamanna dil mein rakhte hain magar shaikh ji kaa qaul hai ulfat kaa main qaail nahin jitnaa tum chaaho karo zulm-o-sitam mujh par magar munharif ho jaae tum se aisaa meraa dil nahin mujh ko bhi saaghar mile ai saaqi-e-rangin-adaa mujh pe bhi chashm-e-karam ho kyaa main is qaabil nahin bhulne vaale faqat itnaa bataanaa hai tujhe teraa 'ahmar' yaad se teri kabhi ghaafil nahin"

"shoala miri aankhon se ayaan kyon nahin hotaa aisaa abhi ai soz-e-nihaan kyon nahin hotaa aayaa huun sanam-khaane mein kaabe se nikal kar haasil mujhe didaar-e-butaan kyon nahin hotaa jab pursish-e-ahvaal pe maail hain vo khud hi haal-e-dil-e-betaab bayaan kyon nahin hotaa har-vaqt tasavvur mein rahaa kartaa huun phir bhi aabaad mire dil kaa jahaan kyon nahin hotaa jab laal pari shishe mein maujud hai saaqi phir bazm kaa rangin samaan kyon nahin hotaa barbaad jo ik aan mein ho jaataa hai ghuncha har khaar magar nazr-e-khizaan kyon nahin hotaa chubh jaataa hai jab tir-e-sitam dil hi mein jaa kar siine pe ayaan koi nishaan kyon nahin hotaa gulshan mein nasheman to miraa phunk chuki phir ThanDaa tiraa dil barq-e-tapaan kyon nahin hotaa"

"yahi armaan yahi shauq hai divaane kaa rang phikaa na paDe ishq ke afsaane kaa baada-khvaaron ko tire hosh abhi baaqi hai daur chaltaa rahe saaqi yunhi paimaane kaa bahr-e-ulfat se huaa paar safina meraa qasd jab kar liyaa tufaan se Takraane kaa bijliyaan gham ki girin khirman-e-dil par mere silsila khatm huaa aap se yaaraane kaa manzar-e-baada-kashi yuun to bahut dekhaa hai rang kuchh aur hai saaqi tire maikhaane kaa meri ulfat kaa yaqin un ko na aae lekin shikva hargiz na karungaa kabhi jhuTlaane kaa ek sajde mein mohabbat ke jabin par apni khinch laayaa huun main naqsha tire kaashaane kaa us ke raste mein raqibon ne bichhaae kaanTe vaada us but ne kiyaa jab bhi kabhi aane kaa qais-o-farhaad ke qisse bhi sune hain lekin Dhang kuchh aur hai 'ahmar' tere afsaane kaa"

"na meri baat hi samjhaa na meraa mudda'aa samjhaa sunaa qissa magar kyaa jaane us zaalim ne kyaa samjhaa safina paar us kaa ho gayaa bahr-e-mohabbat se har ik mauj-e-talaatum-khez ko jo naakhudaa samjhaa ye alhaD-pan hai zaalim kaa ki hai ye be-rukhi us ki abhi tak mudda'aa meraa na vo jaan-e-vafaa samjhaa na jannat ki tamanna hai na us ko huur kaa laalach ghalat matlab are naadaan tu ne shaikh kaa samjhaa firaaq-e-yaar mein bhi niind si kuchh aa gai mujh ko shab-e-gham ye sukun paa kar karam be-dard kaa samjhaa tabi'at hi to hai zaalim ne matlab meri baaton kaa bhalaa chaahaa bhalaa samjhaa buraa chaahaa buraa samjhaa dobaara kucha-e-mahbub mein jaane ki zahmat kar payaam-e-ishq bittafsil un ko ai sabaa samjhaa jise dekho vo Thukraa kar guzar jaataa hai turbat ko na duniyaa ne shahidaan-e-vafaa kaa martaba samjhaa haqiqat mein ye kaa'ba hai jahaan kartaa huun main sajde ye teri bhuul hai zaahid jo is ko but-kada samjhaa but-e-kaafir ke mahfil mein achaanak chaDh gae tevar hamaare arz-e-maqsad ko khudaa jaane vo kyaa samjhaa kaTaataa hai galaa hans hans ke us ke ik ishaare par usi ko be-muravvat ne hamesha bevafaa samjhaa hazaaron qaafile luuTe hain jis ne raah-e-ulfat ke dil-e-maa'sum ne 'ahmar' usi ko rahnumaa samjhaa"