Ghazal

"hazaaron saal mein utri tiri tasvir kaaghaz par vahy kaa silsila jaise huaa tahrir kaaghaz par kahaani-kaar ne mujh ko nikaalaa jab kahaani se nikal aai thi shamshirein chale the tiir kaaghaz par hamein mazmun likhnaa thaa mohabbat aur vahshat pe so likh aae the ham bhi phir kalaam-e-'mir' kaaghaz par miraa mahbub shaair hai kare hai vaar ghazlon se qalam ki dhaar se apne rakhe dil chiir kaaghaz par"

"khol ke zulf-e-siyah-faam chalo raqs karein ho rahi baarish-e-ilhaam chalo raqs karein ab to inkaar bhi karnaa hai miri jaan fuzul ab jo haathon ko liyaa thaam chalo raqs karein un ki makhmur nigaahon mein nasha aisaa thaa chhoD ke sab ne kahaa jaam chalo raqs karein hazrat-e-shaikh ne mimbar se ye elaan kiyaa chaand aaya hai lab-e-baam chalo raqs karein"

"phisal na jaae ye khvaab duniyaa so apni palkon mein daab duniyaa main kis laqab se pukaaron tujh ko vo jhaT se bolaa janaab duniyaa use bhi haasil main kar hi lungaa ho jaae gar dastiyaab duniyaa koi musalsal ye kah rahaa hai kharaab duniyaa kharaab duniyaa savaal ye thaa ki nashsha kyaa hai diyaa gayaa hai javaab duniyaa"

"dil to viraan hai viraan bhi aisaa-vaisaa un kaa ehsaan hai ehsaan bhi aisaa-vaisaa ishq ki aakhiri manzil pe khaDe ham donon ab bichhaDne kaa hai imkaan bhi aisaa-vaisaa ham bhi hon saahab-e-divaan yahi khvaahish hai ik hi divaan ho divaan bhi aisaa-vaisaa tu samajhtaa hai use yaar farishta kyunkar vo to insaan hai insaan bhi aisaa-vaisaa shahr kaa shahr mire haal se vaaqif hai 'arib' tu hi anjaan hai anjaan bhi aisaa-vaisaa"

"ek ik sher sunaayaa use tafsir ke saath kal bahut baat hui thi tiri tasvir ke saath muddaton baad jo aaya hai mire khat kaa javaab us ne bhejaa hai mujhe phuul bhi tahrir ke saath ek hi ishq kiyaa aur kiyaa aisaa ishq jaise 'ghaalib' ne kiyaa mir-taqi-'mir' ke saath itnaa khaamosh mire dil kaa makaan hai mat puchh guftugu karti hai tasvir bhi tasvir ke saath is qadar nek gunahgaar miraa dost 'arib' jis ko jannat bhi mayassar hui zanjir ke saath"

"muflisi husn ko baazaar mein le aati hai 'mir' jaison ko bhi darbaar mein le aati hai ishq baaton mein tiri ham nahin aane vaale ik khataa khuld se sansaar mein le aati hai shaah-zaadi tire didaar ki khvaahish ham ko dafatan khinch ke yalghaar mein le aati hai mujh ko kirdaar se nafrat hai kahaani se nahin par kahaani mujhe kirdaar mein le aati hai"

"tamaam hotaa nahin hai koi kisi ke liye na zindagi ke liye hi na aashiqi ke liye main chaahtaa huun zaraa der khud ke saath rahun main chaahtaa huun chale jaao tum abhi ke liye unhein andheron mein dekhaa to dukh huaa mujh ko mujhe jo chhoD gae log raushni ke liye hamaare paas bachaa kuchh nahin hai khone ko hai intikhaab ghalat teraa dushmani ke liye ye bol kar vo tazabzub mein mujh ko Daal gayaa main jaa rahaa huun faqat teri behtari ke liye"