Ghazal

"baadbaan ko gila havaaon se aur mujh ko hai naa-khudaaon se dushmanon se bhi ab nahin laDtaa pahle laDtaa thaa main havaaon se gaanv mein lag rahaa hai phir melaa bachche bichhDeinge kitne maaon se log mehnat ke beach boeinge jab bhi fursat mili duaaon se habs se bujh gayaa diyaa ghar kaa main bachaataa rahaa havaaon se mere kheton ko is dafa 'aarif' kitni ummid thi ghaTaaon se"

"andhe adam vajud ke girdaab se nikal ye zindagi bhi khvaab hai tu khvaab se nikal suraj se apne bichhDi hui ik kiran hai tu teraa nasib jism ke barfaab se nikal tu miTTi paani aag havaa mein hai qaid kyuun hone kaa de javaaz tab-o-taab se nikal phulon mein chaand taaron mein suraj mein us ko dekh in pattharon ke mimbar o mehraab se nikal murjhaa na jaae dekh kahin ruuh kaa gulaab faani jahaan ki vaadi-e-shaadaab se nikal ban ke jazira ubhregaa kirdaar khud tiraa khush-rang khvaahishon ke tu sailaab se nikal kahti hain mujh se soch samundar ki vusatein 'aarif' tu apni zaat ke taalaab se nikal"

"ghar se chikhein uTh rahi thiin aur main jaagaa na thaa itni gahri niind to pahle kabhi soyaa na thaa nashsha-e-aavaargi jab kam huaa to ye khulaa koi bhi rasta mire ghar ki taraf jaataa na thaa kyaa gila ik dusre se bevafaai kaa karein ham ne hi ik dusre ko Thiik se samjhaa na thaa gul na the jis mein vo gulshan bhi thaa jangal ki tarah ghar vo qabristaan thaa jis mein koi bachcha na thaa aasmaan par thaa khudaa tanhaa magar 'aarif-shafiq' is zamin par koi bhi meri tarah tanhaa na thaa"

"kaisaa maatam kaisaa ronaa miTTi kaa TuuT gayaa hai ek khilaunaa miTTi kaa utrungaa aafaaq se jab main dharti par bhar lungaa daaman mein sonaa miTTi kaa ik din miTTi oDh ke mujh ko sonaa hai kyaa gham jo hai aaj bichhaunaa miTTi kaa unchaa uDne ki khvaahish mein tum 'aarif' maaon jaisaa pyaar na khonaa miTTi kaa"

"jo justuju karun har raaz paa bhi saktaa huun main kaaenaat se parda uThaa bhi saktaa huun mire buzurgon ne bakhshi hai ik duaa aisi bichhaD gae hain jo un ko milaa bhi saktaa huun na koi zaaicha khinchun na dekhun haath tiraa main tere baare mein sab kuchh bataa bhi saktaa huun bas ek raat main sajde mein gir ke royaa thaa ab aasmaan ko zamin par jhukaa bhi saktaa huun abhi to soch safar hai azal ki samt magar palaT ke su-e-abad phir se jaa bhi saktaa huun mujhe khudaa ne vo bakhshaa hai shaairi kaa hunar jo khvaab dekhtaa huun vo dikhaa bhi saktaa huun ye maantaa huun ki aarif huun karbalaa se duur magar main hur ki tarah sar kaTaa bhi saktaa huun"

"jab bhi dushman ban ke is ne vaar kiyaa main ne apne lahje ko talvaar kiyaa main ne apne phuul se bachchon ki khaatir kaaghaz ke phulon kaa kaarobaar kiyaa meri mehnat ki qimat kyaa degaa tu main ne dasht-o-sahraa ko gulzaar kiyaa main 'farhaad' yaa majnun kaise ban jaataa main shaair thaa main ne sab se pyaar kiyaa us ki aankhein khvaab se banne lagti hain jab bhi main ne chaahat kaa izhaar kiyaa apne pichhe aane vaalon ki khaatir main ne har ik raste ko hamvaar kiyaa us ke ghar ke saare log mukhaalif the phir bhi 'aarif' us ne mujh se pyaar kiyaa"

"hamein nazdik kab dil ki mohabbat khinch laati hai tujhe teri mujhe meri zarurat khinch laati hai chhupaa hai jo khazaana tah mein in banjar zaminon ki use baahar zamin se meri mehnat khinch laati hai main maazi ko bhulaa kar apne mustaqbil mein zinda huun nigaahon se hai jo ojhal bashaarat khinch laati hai miraa dushman miri aankhon se ojhal ho nahin saktaa mire nazdik us ko dil ki nafrat khinch laati hai samundar paar jaane vaale ik dan lauT aaeinge miraa imaan hai miTTi ki mohabbat khinch laati hai jo apnaa ghar kisi ke ishq mein barbaad karte hain unhein sahraa mein un ke dil ki vahshat khinch laati hai kabhi hotaa hai jo viraan mere shahr kaa maqtal kisi mansur ko 'aarif' sadaaqat khinch laati hai"

"dozakh bhi kyaa gumaan hai jannat bhi hai fareb in vasvason mein meri ibaadat bhi hai fareb dariyaa o dasht aur samundar bhi hain saraab din kaa ujaalaa raat ki zulmat bhi hai fareb teraa har ik khayaal bhi ik khushnumaa gumaan duniyaa hi kyaa khud apni haqiqat bhi hai fareb parchhaain ke sivaa to nahin hain ham aur kuchh ye rang-o-nur aur ye nikhat bhi hai fareb roz-e-azal kaa lamha-e-maujud bhi hai aks yaani guzarte vaqt ki saaat bhi hai fareb vahm-o-gumaan ke saae hain suraj bhi chaand bhi andhi hai soch aur basaarat bhi hai fareb hai ye nigaar-khaana jo khvaab-o-khayaal saa is aaine mein meri ye surat bhi hai fareb 'aarif'-husain dhokaa sahi apni zindagi is zindagi ke baa'd ki haalat bhi hai fareb"

"tu zamin par hai kahkashaan jaisaa main kisi qabr ke nishaan jaisaa main ne har haal mein kiyaa hai shukr us ne rakkhaa mujhe jahaan jaisaa ho gai vo bahan bhi ab rukhsat pyaar jis ne diyaa thaa maan jaisaa faasla kyuun dilon mein aayaa hai ghar ke aangan ke darmiyaan jaisaa mere dil ko milaa na lafz koi mere ashkon ke tarjumaan jaisaa mere ik sher mein samaayaa hai karb sadiyon ki daastaan jaisaa shahr mein ek mujh ko dikhlaa do tum mire gaanv ke javaan jaisaa jhiil si in udaas aankhon mein aks thaa niile aasmaan jaisaa mujh ko vaisaa khudaa milaa bilkul main ne 'aarif' kiyaa gumaan jaisaa"

"jo apni khvaahishon mein tu ne kuchh kami kar li to phir ye jaan ki tu ne payambari kar li tujhe main zindagi apni samajh rahaa thaa magar tire baghair basar main ne zindagi kar li pahunch gayaa huun main manzil pe gardish-e-dauraan Thahar bhi jaa ki bahut tu ne rahbari kar li jo mere gaanv ke kheton mein bhuuk ugne lagi mire kisaanon ne shahron mein naukri kar li jo sachchi baat thi vo main ne barmalaa kah di yuun apne doston se main ne dushmani kar li mashini ahd mein ehsaas-e-zindagi ban kar dukhi dilon ke liye main ne shaaeri kar li gharib-e-shahr to faaqe se mar gayaa 'aarif' amir-e-shahr ne hiire se khud-kushi kar li"