Ghazal

"hidaayat-kaar bhi sahme hue hain idhar kirdaar bhi sahme hue hain karein ab khatm kaise ye kahaani kahaani-kaar bhi sahme hue hain 'ajab vahshat musallat hai vatan mein dar-o-divaar bhi sahme hue hain yahaan sochon pe bhi pahra lagaa hai yahaan afkaar bhi sahme hue hain havaaein rukh badalti jaa rahi hain ghane ashjaar bhi sahme hue hain chaman mein phuul hi khaaif nahin hain yahaan to khaar bhi sahme hue hain musallat khauf 'arshad' har taraf hai mire sab yaar bhi sahme hue hain"

"tumhaare baankpan ki sab adaaein raqs karti hain tumhaaraa naam letaa huun sadaaein raqs karti hain ye kaisi dushmani ashjaar se paali havaaon ne shajar jab koi girtaa hai havaaein raqs karti hain tire insaaf par hairaan hai chashm-e-falak munsif ki tu jab bhi sunaataa hai sazaaein raqs karti hain zaraa phulon ko dekho to qabaa ki aaD lete hain magar jab titliyaan chhu lein qabaaein raqs karti hain utaaraa jab se tere naam kaa taa'viz hai dar se bilaa-khauf-o-khatar ghar mein balaaein raqs karti hain ye kaisaa daur-e-jiddat hai ki bahnein beTiyaan is mein saron se khinch kar apni ridaaein raqs karti hain tire tarz-e-taghaaful kaa asar hai ye ki ab mujh par vafaaein khanda-zan hain aur jafaaein raqs karti hain tire gesu khile jab se fazaa hai mushkbu tab se bajaataa saaz hai saavan ghaTaaein raqs karti hain hamaare des mein hain putliyaan masnad-nashin 'arshad' inhein parda-nashin jab bhi hilaaein raqs karti hain"

"baDaa dilchasp yaaro haadisa hai madaari khud tamaashaa ban gayaa hai sabhi dam saadh kar baiThe hue hain kahaani ko kahaan rokaa huaa hai kiyaa 'ujlat mein jo tark-e-ta'alluq baDaa hi naa-munaasib faisla hai jahaan vahshat nisaab-e-zindagi ho vahaan dars-e-mohabbat mo'jiza hai main apne khvaab rakkhun to kahaan par miri aankhon mein Thahraa rat-jagaa hai vahaan par ras bhare hain phuul shaayad jahaan par titliyon kaa jamghaTaa hai agarche log baDhte jaa rahe hain magar insaan tanhaa ho rahaa hai jise ik chikh samjhe log 'arshad' ghuTan ke baa'd kaa vo qahqaha hai"

"'ishq thaa main thaa shabistaan thaa junun se pahle yuun kahaan chaak garebaan thaa junun se pahle ab mujhe shahr-e-nigaaraan ki tarah lagtaa hai main to is dasht se naalaan thaa junun se pahle surkh-ru ho gae 'ushshaaq kaTaa kar sar ko varna har ek pashemaan thaa junun se pahle haq ke 'irfaan se aabaad huaa hai varna dil miraa shahr-e-khamoshaan thaa junun se pahle vo mire saath kaa 'arshad' hai tamannaai ab qais bhi mujh se gurezaan thaa junun se pahle"

"is se pahle ki tiri mujh pe 'ataa ho jaae ye bhi mumkin hai koi mujh se khataa ho jaae mujh ko is vasl ke laalach se bachaa kar rakhnaa ho na aisaa ki miraa 'ishq fanaa ho jaae baat aisi na kaho talkh ki mere dil kaa mundamil zakhm koi phir se haraa ho jaae gar tiraa dast-e-masihaai mayassar ho mujhe dam-e-aakhir hi sahi mujh ko shifaa ho jaae us jagah haar yazidon kaa muqaddar hoti main ne dekhaa hai jahaan karb-o-balaa ho jaae ek muddat se main chup-chaap paDaa huun ab to ai hasin shakhs mujhe izn-e-navaa ho jaae khauf aataa hai baDaa habs ki shiddat se mujhe ho na aisaa koi tufaan khaDaa ho jaae jitni shiddat se use chaahaa hai main ne 'arshad' 'ain mumkin hai ki vo shakhs khudaa ho jaae"

"khatm ho jaaein na ye saari rivaayaat kahin shahr khaa jaaein na saare hi mazaafaat kahin log sote hi nahin khvaab bhalaa kyaa dekhein kyunki ab shahr mein hoti hi nahin raat kahin Diary sukhe hue phuul kitaabein aansu ghar mein rakkhi hain sabhi hijr ki saughaat kahin jhaank kar dekh kabhi dil ke bhi aangan mein jahaan muntazir aankhein to rakkhi hain shikaayaat kahin 'ain mumkin hai lage phir se koi zakhm nayaa yaar baiThe hain lagaae hue phir ghaat kahin chhoD aayaa thaa tiraa shahr junun se pahle phir na le aaein vahin par mire haalaat kahin"

"apne andar panaah mushkil hai yaa'ni khud se nibaah mushkil hai tere jhaanse mein phir se aaein ham ab to 'aalam-panaah mushkil hai ek to aable hain paanv mein ik tire ghar ki raah mushkil hai thak chukaa huun main ab ghanim mire ab tiri vaah vaah mushkil hai ek to be-gharaz mohabbat ho aur ho be-panaah mushkil hai vo jo palte hain aastinon mein hon kabhi khair-khvaah mushkil hai us ki zulfon kaa rang hai varna shab ho itni siyaah mushkil hai saaf baatin na ho to murshid ki ham pe koi nigaah mushkil hai husn-e-be-parda dekh kar 'arshad' na ho phir bhi gunaah mushkil hai"

"ham vahaan 'arz-e-haal kyaa karte chup na rahte kamaal kyaa karte apnaa ronaa na ro sake ham to aur kisi kaa khayaal kyaa karte shauq-e-vaslat hi miT gayaa dil se raabton ko bahaal kyaa karte 'ishq vahshat pahan ke niklaa thaa teraa husn-o-jamaal kyaa karte sunne vaalaa hi jab na thaa koi phir vahaan qil-o-qaal kyaa karte raqs jaari thaa naazninon kaa ye qalandar dhamaal kyaa karte khvaahishein ikhtiyaar mein kab thiin khvaahishon kaa malaal kyaa karte chor saadhu mein gaaDhi chhanti thi phir vahaan kotvaal kyaa karte jab muqaddar hi ghaat mein thaa phir nim-bismil ghazaal kyaa karte teri tasvir naqsh thi dil mein ham tire khadd-o-khaal kyaa karte raah takte guzar gae maan baap tere bheje riyaal kyaa karte jin ko roTi se fursatein na milin haq ki khaatir jidaal kyaa karte zindagi raas kab rahi 'arshad' zindagi se savaal kyaa karte"

"na koi ranj na dil mein malaal rakhtaa huun milan ke silsile har dam bahaal rakhtaa huun miri nazar mein sabhi yaar mohtaram hain mire main khoTe sikke bhi aksar sanbhaal rakhtaa huun main bechtaa nahin afkaar zar ke badle mein rivaayaton se main rishte bahaal rakhtaa huun main chaand haath mein lene ki zid nahin kartaa main khvaahishon ko sadaa hasb-e-haal rakhtaa huun shaguftagi hai viraasat mire buzurgon ki main guftugu ke hunar mein kamaal rakhtaa huun main khaamushi ko samajhtaa nahin buraa lekin jahaan savaal ho laazim savaal rakhtaa huun miri sarisht mein shaamil hai 'aajizi lekin main saath saath khudi kaa khayaal rakhtaa huun mohabbaton ke asaase na haath se jaaein so fikr-e-fardaa ko fardaa pe Taal rakhtaa huun bajaa ki raah-e-talab hai bahut kaThin 'arshad' main hausle bhi magar be-misaal rakhtaa huun"

"vo jiit rahaa hai na mujhe haar rahaa hai is tarh vo qiston mein mujhe maar rahaa hai hai chehre badalne mein use khuub mahaarat shaayad vo gae vaqt mein fankaar rahaa hai har baar palaT jaati hai jiiti hui baazi lagtaa hai safon mein koi ghaddaar rahaa hai saahil pe pahunchte hi jise pheink rahe ho ye shakhs bhanvar mein tiri patvaar rahaa hai ik khel hai kursi kaa mire des mein jaari ik putli tamaashaa yahaan har baar rahaa hai talchhaT bhi mayassar nahin ab jaam ki jis ko sunte hain balaa kaa kabhi mai-khvaar rahaa hai sau baar dil-e-zaar ko vo raund ke guzraa dil hai ki usi kaa hi lagaataar rahaa hai ummid thi jis shakhs pe taa'mir karegaa 'arshad' vahi kartaa mujhe mismaar rahaa hai"