Ghazal

"mujh pe itnaa karam kare koi kuchh sukun bhi baham kare koi apni aankhon ko nam kare koi mere marne kaa gham kare koi dard siine kaa kam kare koi apni saanson se dam kare koi dil mein jalti hai aatish-e-ehsaas sukh ki shabnam baham kare koi"

"aarzuein sabhi shabaab ke saath saari raunaq dil-e-kharaab ke saath kis ko hai taab husn-e-jaanaan ki kaun chaltaa hai aaftaab ke saath us ko ummid-e-sim-o-zar hai aur main faqat sheron ki kitaab ke saath mujh se bichhDo to sochnaa ye bhi khaar bhi hote hain gulaab ke saath ruuh ke saath ziist kaa rishta jaise tufaan rahe habaab ke saath kuchh na puchho shabaab kaa aalam muddaton ham chale saraab ke saath mujh ko dil se nahin gila koi khuub guzri dil-e-kharaab ke saath"

"maail-e-raqs-e-sharar baiThe hain kar ke tufaan pe nazar baiThe hain vo jo baa-dida-e-tar baiThe hain ranj-o-aalaam se Dar baiThe hain ab to jal jaanaa hi hogaa behtar dosti shama se kar baiThe hain dard ki raat kaThin hai lekin le ke ummid-e-sahar baiThe hain gham ke tufaan ko sadaf mein tan kar ham ba-andaaz-e-guhar baiThe hain zindagi Dhaal bane yaa na bane maut se sina-sipar baiThe hain"

"jurat hai to tufaan se guzar kyon nahin jaate zinda nahin ehsaas to mar kyon nahin jaate gesu tire lahraa ke bikhar kyon nahin jaate dil mein tire andaaz utar kyon nahin jaate main gosha-e-tanhaai mein sustaa luun zaraa saa kuchh der ko aalaam Thahar kyon nahin jaate siine mein machalte hue jazbaat ke dhaare ashaar ke qaalib mein utar kyon nahin jaate kis soch mein gum baiThe ho raahon mein 'tabassum' viraan sahi apnaa to hai ghar kyon nahin jaate"

"koi na samjhe chaah kaa matlab koi na jaane priit kaun kisi ke dard ko jaane kaun kisi kaa miit koi nahin hai dil kaa mahram koi nahin gham-khvaar aaj sunaaein kis ko ai dil dard bhare ye giit aankh se aansu bahein hamaare dil mein aag jale ik anjaan ko kar baiThe hain jis din se ham miit main huun bhulaa bhaTkaa raahi manzil meri duur jaane is tufaani khel mein haar mile yaa jiit aag mohabbat ki jis dil mein jal uTThe ik baar saari umr 'tabassum' us ki ro ro jaae biit"

"dil mein hazaar hasratein pinhaan kiye hue jiite hain taar taar garebaan kiye hue ai rifat-e-hayaat tiri justuju mein ham phirte hain zakhm zakhm charaaghaan kiye hue ai dost ham ne dard ki raatein guzaar diin palkon pe aansuon kaa charaaghaan kiye hue ham vo hain rif'aton ki tamannaa mein 'umr bhar rahte hain haadsaat ko mehmaan kiye hue kah do kali kali se khile ab chaman chaman ham aa gae hain azm-e-bahaaraan kiye hue"

"rukhsat hui bahaar nazaare chale gae daaman tiraa chhinaa ki sahaare chale gae aaya na lab pe harf-e-shikaayat bhi bhuul ke jaise bhi apni guzri guzaare chale gae sab kuchh luTaayaa phir bhi tujhe paa sake na ham baazi har ek gaam pe haare chale gae siine mein soz aankh mein aansu liye hue mahfil se teri dard ke maare chale gae hans hans ke ham ne zulm sahe hain tire liye mar mar ke bhi tujhi ko pukaare chale gae maujon se ai 'tabassum' abhi aur khel le kashti se teri duur kinaare chale gae"

"maayus andheron se na a dida-e-tar ho aakhir to kabhi is shab-e-gham ki bhi sahar ho ab shauq kaa izhaar ba-andaaz-e-digar ho dil TuuT bhi jaae to kisi ko na khabar ho shaayad ki kabhi us ko bhi ho jaae mohabbat shaayad ki kabhi us ki bhi aankhon mein basar ho ho dil mein bapaa hashr to ho lab pe khamoshi yuun kijiye ulfat ki unhein bhi na khabar ho vaada to huaa hai ki vo aaeinge sar-e-shaam ab dekhiye kis rang mein is shab ki sahar ho kab tak main rahun mahv-e-sukut-e-shab-e-hijraan ai qalb-e-hazin naala bapaa kar ki sahar ho ik umr kaTi khaana-badoshi mein hamaari hasrat hai ki duniyaa mein koi apnaa bhi ghar ho tum vaaris-e-jamshed-o-sikandar sahi lekin ai kaash tumhein apne vatan ki bhi khabar ho sejon pe kaTe umr ki kaanTon pe 'tabassum' bas ek tamanna hai mohabbat mein basar ho"