Ghazal

"chalaa un kaa jaadu magar rafta rafta huaa ham pe un kaa asar rafta rafta pareshaan hue vo udhar rafta rafta taDapte rahe ham idhar rafta rafta kiyaa 'ishq ne un ke phir mujh ko ghaayal huaa meraa chhalni jigar rafta rafta taDap kar hi guzri hain furqat ki raatein hui 'ishq ki phir sahar rafta rafta taDap uTh rahi hai yahaan donon jaanib idhar rafta rafta udhar rafta rafta miraa kaam hai biij bonaa to bo luun yaqinan lageinge samar rafta rafta nayaa raastaa 'ishq kaa hai ye 'aatif' chalo is pe tum bhi magar rafta rafta"

"shaikh saahib jo dar-e-pir-e-mughaan se nikle phir asar un ki du'aaon mein kahaan se nikle jaise sho'la saa koi un ki zabaan se nikle lafz nikle ki koi tiir kamaan se nikle vo yahaan se ki vahaan se ki vahaan se nikle dekhne vaale ye kahte the kahaan se nikle vo jo baste the mire dil mein baDi muddat se utre nazron se vo aur dil ke makaan se nikle muddaton se the jo khaamosh vahi bol paDe saikDon lafz achaanak se zabaan se nikle saath kuchh bhi na gayaa daulat-o-‘izzat shohrat haath khaali hi vo 'aatif' ye jahaan se nikle"

"thaa nisf un kaa aur vo puuraa liye hue baiThe hain mere hisse kaa hissa liye hue aankhon mein apni saaghar-o-minaa liye hue chaDh jaae bin piye hi vo nashsha liye hue tanhaaiyaan sameT ke baiThe hain ham khamosh jaise ki koi kuuze mein dariyaa liye hue mohsin hain mere yaa ki hain dushman nahin khabar vo ghumte hain chehre pe chehra liye hue gardish hamaare saamne aati hai din-ba-din vo hi puraanaa roz kaa qissa liye hue karne ko qatl meraa hain bechain kis qadar naagin ho jaise aankh mein badlaa liye hue ik roz maut ko hi lagaa leinge ham gale jiine ki dil mein yunhi tamanna liye hue 'aatif' se pyaar hai unhein shaayad isi liye baiThe hain us kaa bazm mein charchaa liye hue"

"chhoDiye daaghon ko aaina badal kar dekhein aao ab aur nayaa chehra badal kar dekhein aap batlaaiye ki kitnaa badal kar dekhein kho dein pahchaan hi kyaa itnaa badal kar dekhein vo ye kahtaa hai ki qismat mein tiri pyaar nahin dil ye kahtaa hai ki ab totaa badal kar dekhein narm lahje mein use dekh liyaa samjhaa kar aao ab ham bhi zaraa lahja badal kar dekhein kitnaa badle hain tujhe paane ki ummid mein ham kyaa kami rah gai aur kitnaa badal kar dekhein dost ahbaab nazar ab nahin aate mere aisaa lagtaa hai unhein chashma badal kar dekhein Thokarein khaa liye ab thoDaa sanbhal jaate hain aao 'aatif' ki chalo rastaa badal kar dekhein"

"thiin ghazaal si aankhein morni si laDki thi khushbuon ki saudaai sandali si laDki thi dil ke sehn-e-gulshan mein ik kali si laDki thi par zaraa si naadaan thi baavli si laDki thi chaand main kahun us ko yaa ke chaandni kah duun khvaab mein jo aati thi chaandni si laDki thi phuul bhi kahun us ko raushni bhi likh duun main pankhuDi si laDki thi phuljhaDi si laDki thi paas se vo guzri to dil hi le gai meraa mujh ko kar gai paagal saanvli si laDki thi tiir us ne nazron ke aise mujh pe pheinke ki kar gai mujhe ghaayal vo chhuri si laDki thi chaashni si ghulti thi jab vo gungunaati thi raagni si laDki thi baansuri si laDki thi us ko dekhaa mahfil mein aur dil hi de baiThaa phir nazar na aai vo ajnabi si laDki thi jaa rahaa thaa raste se to mujhe nazar aai haal main ne puchhaa vo ik Dari si laDki thi vo zaraa si naT-khaT thi khuub tang karti thi man-chali si laDki thi chulbuli si laDki thi khuub ghazlein likhte ho us ke baare mein 'aatif' kyaa koi pari thi vo yaa pari si laDki thi"

"zulf ke sanvarne mein der kitni lagti hai aur phir bikharne mein der kitni lagti hai aadmi bulandi pe dhire dhire jaataa hai haan magar utarne mein der kitni lagti hai maantaa huun ye baatein us ne hi kahin lekin baat se mukarne mein der kitni lagti hai us kaa dil jo TuuTaa to phir use samajh aayaa dil ke zakhm bharne mein der kitni lagti hai baat ke banaane mein vaqt kitnaa lagtaa hai baat ko katarne mein der kitni lagti hai ik zamaana lagtaa hai dil talak pahunchne mein dil se par utarne mein der kitni lagti hai vaqt sab kaa aataa hai achchhaa yaa buraa 'aatif' vaqt ke guzarne mein der kitni lagti hai"

"khun-e-jigar ko ghazlon mein tum apni Dhaal ke kyaa she'r kah rahe ho ai 'aatif' kamaal ke jo ab guzar gayaa hai use bhul-bhaal ke aao talaashein qissa koi ab ke saal ke khushiyaan tamaam meri hi jholi mein Daal ke vo chal diye hain husn kaa sadqa nikaal ke dekheinge ham qarib se mauqa' agar milaa charche bahut sune tire husn-o-jamaal ke izhaar kar sake na mohabbat kaa apni ham lekin rakhe hain khat vo puraane sanbhaal ke aaegaa vaqt dekhnaa ek din zarur ye do do javaab deinge ham ik ik savaal ke main sochtaa huun har ghaDi 'aatif' yahi savaal din hain mire 'uruj ke yaa hain zavaal ke"

"un se kuchh baat pe main ruuTh ke kyaa baiTh gayaa mujh se phir ho ke har ik shakhs khafaa baiTh gayaa us ne kuchh apni sunaai na suni kuchh meri vo bhi baiThaa thaa judaa main bhi judaa baiTh gayaa paane manzil ko musalsal hi chalaa huun lekin jab nazar aa gai manzil to zaraa baiTh gayaa saari duniyaa se hi ab tark-e-ta'alluq kar ke tere darbaar mein main aa ke khudaa baiTh gayaa bazm mein yuun to kai log the teri lekin sun ke main bhi tiri paael ki sadaa baiTh gayaa imtihaan yuun to liye kitnon ke us ne lekin sirf ik main hi thaa jo us mein kharaa baiTh gayaa ho ke aazaad qafas se vo parinda 'aatif' itnaa zakhmi thaa zaraa der uDaa baiTh gayaa"