Ghazal

"baad-e-sabaa khamosh ho gulzaar chup rahein vo baat kar rahaa hai khabar-daar chup rahein tasvir se laDein dam-e-didaar chup rahein be-vaqt guftugu karein be-kaar chup rahein vo khush-kalaam nazm si sar-goshiyaan kare us vaqt jhumte dar-o-divaar chup rahein tujh khub-ru pe marne kaa haq pahle meraa hai shahzaadi keh bhi de tire saalaar chup rahein kam-go thaa main so mujh pe dalilon se bain kar main chaahtaa thaa mere 'azaadaar chup rahein mere tamaam dost mire haq mein Thiik hain ek-aadh mujh ko radd karein do-chaar chup rahein yaan bahs chunki 'ishq ke baare mein jaari hai so maa'zarat ke saath samajh-daar chup rahein"

"bahaar rut mein khizaan jhel kar kharaab hue him apne ghar hue tum apne ghar kharaab hue khilaa rahegaa hamesha vo aaina-chehra javaan gulaab jase dekh kar kharaab hue tujhe banaane ki koshish main ai sunahre charaagh sitaare khaak hue kuza-gar kharaab hue main be-zarar huun mujhe chhune de badan apnaa tire nuqush agar ratti bhar kharaab hue dil ek dan tiri divaar par nahin baiThaa paye ghurur mire baal-o-par kharaab hue agar ye phuul tiri raah tak nahin pahunche agar ye phuul mari khaak par kharaab hue kisi kisi ko ye dil dasht le kar aataa hai vagarna beshtar apne hi ghar kharaab hue bahut se meri tarah teraa khvaab dekhte the magar jo mary tarah sar-ba-sar kharaab hue tujhe to dast-e-hunar nang-e-aafrinash hain paDe paDe ju badan chalk par kharaab hue jahaan vaale hamaari misaal dete hain to aap sochiye ham kas qadar kharaab hue hamein kharaabi se yaa'ni dili ta'alluq thaa hue kharaab to baar-e-digar kharaab hue anguThi aakhirash ik qissa-go ke haath aai phir us kahaani mein sab sehr-gar kharaab hue sunaa hai un dinon ik jang-ju kaa dil TuuTaa phir us ke baa'd hazaaron nagar kharaab hue"

"apne uslub se baahar to nahin aaeinge ye safar-zaad hain ye ghar to nahin aaeinge masala ye hai tu yak-baargi khiltaa bhi nahin ham bhi khud-sar hain mukarrar to nahin aaeinge jism le aaeinge par dil to nahin aaegaa ham tire pahlu se yaksar to nahin aaeinge milne aayaa hai tu aur baahami fursat hai hamein din ab is din se bhi behtar to nahin aaeinge ek ik kar ke sabhi yaar baDe ho gae hain ab vo mujh kam ke baraabar to nahin aaeinge khub-ru khaana-badoshon kaa bharam bhi rakh le ye hamesha tire dar par to nahin aaeinge sang-bardaaron ke sang aae ho tum maslahatan yaa'ni us samt se patthar to nahin aaeinge tere aane se hai mashrut miri khush-bakhti bhale din mere kahe par to nahin aaeinge"

"yaad aai thi ek baat mujhe sone mein lag gai thi raat mujhe main ne rahnaa thaa apni miTTi par le uDiin meri khvaahishaat mujhe tu agar ham-safar huaa meraa kam paDeingi ye shash-jihaat mujhe duniyaa-daari bhi karnaa paDti hai is mohabbat ke saath-saath mujhe khub-ru tere ru-baru ho kar zahr lagti hai ehtiyaat mujhe peD jo mere saamne kaTe hain koste honge paat paat mujhe tujh ko dekhaa na jaa sakaa ji bhar khaae jaati hai ye hi baat mujhe niind aati nazar nahin aati aap ke gham ke saath saath mujhe muft huun aur anokhaa huun le le ai kharidaar haathon haath mujhe"

"tujh ko hi vaa'da vafaa karne mein dushvaari hai meri to shaam-e-mulaaqaat ki tayyaari hai ai mire khaak ke phuul unche suron mein na mahak aisaa lagtaa hai mujhe saans ki bimaari hai aur bhi chizein kai mujh mein buri hain lekin sar-e-fihrist ye be-mausami bezaari hai saada-dil huun so tujhe teri razaa par chhoDaa ye miraa husn-e-talab hai miri 'ayyaari hai siine ki vaadi mein naakhun ne ugaae hain gulaab baaghon par taa'na-zan ik miTti hui kyaari hai"

"jugnuon ki qasam diyon ki qasam khub-surat hai tu dinon ki qasam tere bin duniyaa chal nahin sakti ghar ke matruk bartanon ki qasam mujh se nindon ne parda kar liyaa hai tere mastur baazuon ki qasam khatm hai tujh pe daastaan-e-hayaa tere ham-raaz aainon ki qasam tu bahut sidhi-saadi laDki hai shikan-aalud bistaron ki qasam teraa saath achchhaa lagtaa hai mujh ko raaston ki qasam gharon ki qasam zindagi se mujhe mohabbat hai rassiyon ki qasam kuon ki qasam mere ahbaab mujh se mukhlis hain mujh ko yusuf ke bhaaiyon ki qasam"

"goyaa khurshid bhare din mein 'ayaan hotaa hai koi is shahr mein is tarh javaan hotaa hai baarhaa sakhiyon ke jhurmuT mein use dekhtaa huun baagh mein jaise koi sho'la ravaan hotaa hai aankhein hoti hain magar aisi kahaan hoti hain husn hotaa hai magar aisaa kahaan hotaa hai jab achaanak tire chehre pe nazar paDti hai sura-e-nur ki aayat kaa gumaan hotaa hai in dinon teri zarurat hai hamesha se ziyaad in dinon tu mire sad-rang kahaan hotaa hai"

"tu puchhegaa to saraasar buraa lagegaa dost koi bhi tere baraabar buraa lagegaa dost tu aa rahaa ho to phir dar 'aziz hogaa mujhe tu jaa rahaa ho to phir dar buraa lagegaa dost tujhe pasand na aaegaa mere baa'd ye shahr mujhe bhi gaanv kaa chakkar buraa lagegaa dost isi sabab se ki dekhaa nahin hai subh tujhe tamaam din mujhe daftar buraa lagegaa dost hamaare baa'd safar-zaad bhaaeinge tujh ko hamaare baa'd tujhe ghar buraa lagegaa dost tu phuul hai tujhe bhaaeinge toDne vaale main peD huun mujhe patthar buraa lagegaa dost jabin-o-jaama to jachte hain pur-shikan ke baghair buraa lagegaa to bistar buraa lagegaa dost du'aa-e-vasl mein mere sharik-e-kaar raho vagarna hijr mein ji kar buraa lagegaa dost"

"dil mein gunjaa kiyaa ik naghma-e-tanhaai bhi aur uThaae phire ham baar-e-shanaasaai bhi tum yaqin mat karo lekin main nahin huun zinda tum ko achchhaa hai rahe zo’m-e-masihaai bhi ab to shahzaadi mire ghar ko basaane aa jaa ab to jangon se palaT aae tire bhaai bhi 'ishq kartaa hai basirat kaa ziyaan pahle-pahal aur phir haule se le jaataa hai binaai bhi tum mire paas raho laakh savaalaat karo main tumhein pyaar bhi detaa huun paziraai bhi main ne har rang mein iqraar kiyaa hai teraa saadgi bhi tiri mahbub hai raa'naai bhi tujh ko maa'lum hai sab sehn ke iklaute darakht tu miraa yaar bhi hai aur miraa bhaai bhi is se baDh kar nazar-andaaz koi kyaa hogaa vaaqi'a ban nahin paai miri rusvaai bhi mere honTon se tu is darja sakhaavat na barat ye na ho chhin lein pyaase tiri raa'naai bhi khud ko kis tarh dilaaungaa yaqin sochtaa huun sochtaa huun ki agar vaa'de ki shaam aai bhi log aa kar miri tanhaai baDhaa jaate hain ji kaa aazaar hai ye anjuman-aaraai bhi phir jagaa degaa tiraa haath jhaTaknaa mujh ko mujh ko bil-farz kisi tarh se niind aai bhi ai mujhe der se yaad aae hue misra'-e-vasl chhin lungaa main kisi din tiri yaktaai bhi vus'at-e-kaun-o-makaan habs-kada hai us ko raas aae na jise baanhon ki giraai bhi"

"ajnabi hai vo magar yaar bhi lagtaa hai mujhe ek darvaaza jo divaar bhi lagtaa hai mujhe muddaton mein bhi nahin lagtaa kabhi zakhm-e-gurez aur ik shab mein kai baar bhi lagtaa hai mujhe nazar-andaaz bhi kar detaa hai vo shakhs kabhi apnaa honaa kabhi be-kaar bhi lagtaa hai mujhe jitni dilchaspi dikhaataa hai masihaa meraa thoDaa thoDaa miraa bimaar bhi lagtaa hai mujhe log jo teraa buraa chaahte hain shahzaadi un mein se ik tiraa saalaar bhi lagtaa hai mujhe shaahzaadi mujhe lagtaa hai dilaasa teraa shaahzaadi tiraa rukhsaar bhi lagtaa hai mujhe apne jazbaat chhupaane pe bhi sharminda huun aur jhuTaa tiraa 'inkaar' bhi lagtaa hai mujhe baat yuun hai vo miraa marham-e-tanhaai hai vo bhale darpai-e-aazaar bhi lagtaa hai mujhe kabhi mahz aankhein bichhaa letaa huun teri rah mein aur kabhi kam miraa ghar-baar bhi lagtaa hai mujhe teraa in haalon mire saath guzaara karnaa 'ishq bhi lagtaa hai isaar bhi lagtaa hai mujhe"