Ghazal

"gham-e-hijraan se zaraa yuun bhi nibhaai jaae mahfil-e-ghair sahi aaj sajaai jaae ikhtilaafaat ki buniyaad hai gahri lekin is pe nafrat ki na divaar uThaai jaae pahle manzil kaa ham apni to taayyun kar lein phir zamaane ko koi raah dikhaai jaae mai ke baare mein khayaalaat badal jaaeinge hazrat-e-shaikh ko thoDi si pilaai jaae sab ke aamaal pe tanqid hai sheva jis kaa baat kirdaar pe us ke bhi uThaai jaae yuun hi aqvaam ki taqdir sanvarti hai 'farogh' neamat-e-ilm pe kuchh baat chalaai jaae"

"ai miri jaan tujhe aur badalnaa hogaa phir mire saath kaDi dhuup mein chalnaa hogaa apne pairon pe abhi qarz-e-safar baaqi hai hadd-e-imkaan se aage bhi nikalnaa hogaa is se pahle ki Dhale raat nayaa din nikle tire khvaabon ko mire khvaab mein Dhalnaa hogaa inqilaabaat kaa aaghaaz bhi hogaa lekin le ke parcham sar-e-baazaar nikalnaa hogaa kaamyaabi kaa yaqin duur na kar de ham ko paas manzil ke zaraa aur sambhalnaa hogaa vaadiyon mein to kisi khvaab ki bhaTke hai 'farogh' tujh ko taabir ke sahraa mein bhi jalnaa hogaa"

"khvaahishon kaa imtihaan hone to do faasle kuchh darmiyaan hone to do mai-kashi bhi baa-vazu hogi yahaan shaikh ko pir-e-mughaan hone to do manzil-e-maqsud se aai sadaa dil ko mir-e-kaarvaan hone to do khaamushi aavaaz ban jaaegi yuun be-zabaani ko zabaan hone to do kyaa nahin mumkin hai kuchh sayyaad se us ko apnaa baaghbaan hone to do"

"kyon vo meraa markaz-e-afkaar thaa jis ke hone se mujhe inkaar thaa yuun to mushkil thi bahut teri talaash khud ko apnaa aur bhi dushvaar thaa us ke hisse mein dar-o-divaar the meraa hissa saaya-e-divaar thaa rafta rafta sab ke jaisaa ho gayaa pahle main bhi saahab-e-kirdaar thaa duriyon ne qurbatein bakhshin hamein milnaa-julnaa baais-e-takraar thaa kaise baDhtaa qaafila aage 'farogh' har koi jab qaafila-saalaar thaa"

"koi kaaba na kalisaa na sanam meraa hai ik nae khvaab ki dharti pe qadam meraa hai saari duniyaa se hama-vaqt juDaa rahtaa huun raabta khud se magar aaj bhi kam meraa hai dil ko ehsaas ke us moD pe laai hai hayaat ab na meri hai khushi aur na gham meraa hai ab bhi Dartaa huun har ik baat main likhne se 'farogh' tum ye kahte ho ki aazaad qalam meraa hai"

"hain miri parvaaz ke tevar nae saath mere dekhiye manzar nae ik puraane mai-kade mein tishnagi DhunDti hai saaqi-o-saaghar nae bachpane kaa ghar na bhulegaa kabhi chaahe jitne aap ke hon ghar nae kijiye har ilm se aaraasta bachchiyon ke hain yahi zevar nae ik nae fōtpath par mazdur thaa muflisi ne jab diye bistar nae ab zaraa taabir bhi badle 'farogh' dekhtaa huun khvaab to aksar nae"

"har kisi ki hai zabaani dosti kyaa kisi ki aazmaani dosti the musaafir do alag raston ke ham ho gai bas naa-gahaani dosti DhunDhtaa hai har rifaaqat mein nai dil hamesha ik puraani dosti dafn hai siine mein mere aaj bhi us ki meri aan-jahaani dosti doston ko dil dukhaanaa aa gayaa aa gai ham ko nibhaani dosti kuchh to teri bhi khataa hogi 'farogh' gar hui hai sargiraani dosti"

"aql ki aisi taabedaari hai khvaahishon mein bhi inkisaari hai chal paDi hai ajal ki raahon par zindagi be-khabar savaari hai dil se apne jo haar jaate hain saari duniyaa unhin se haari hai is maishat mein kaamyaabi kaa raaz kaun kitnaa baDaa juaari hai diin samjhe hain jis ko aap 'farogh' shaikh ji ki dukaan-daari hai"

"mil ke baiThein to ham kahin pahle baanT lete hain kyuun zamin pahle hogaa teraa bhi e'tibaar mujhe kar luun apnaa main gir yaqin pahle kyuun kisi dar pe aasmaan jhuktaa gar na jhukti miri jabin pahle dil mein shaayad abhi bhi hai maujud aao DhunDein use yahin pahle kab ye sunte hain daastaan puuri bol uThte hain nukta-chin pahle sochtaa huun main sun ke baat tiri kyuun ye main ne kahi nahin pahle"

"kahtaa rahe zamaana gunahgaar zindagi kuchh log ji rahe hain mazedaar zindagi kirdaar apnaa apnaa nibhaate hain sab yahaan samjho na tum kisi ki hai be-kaar zindagi ik vaqfa-e-ajal bhi to aataa hai darmiyaan chalti nahin kisi ki lagaataar zindagi aage nikal chuke the ham apne vujud se phir bhi hui na kam tiri raftaar zindagi raste kai hasin nikalte jahaan se the laai thi aise moD pe ik baar zindagi hai zindagi se shikva unhein bhi bahut 'farogh' hisse mein jin ke aai hai gulzaar zindagi"

"dil ke andar ik zaraa si be-kali hai aaj bhi jo mire afkaar mein ras gholti hai aaj bhi yuun to vo divaar ban ke aa gayaa hai darmiyaan meri apne aap se kuchh dosti hai aaj bhi pattharon par chal ke sab ne paanv zakhmi kar liye jabki us ke dar kaa rasta makhmali hai aaj bhi rukh havaaon kaa badalnaa jaante hain log jo bas unhin ke har diye mein raushni hai aaj bhi jin savaalon kaa nahin hotaa koi musbat javaab un savaalon se ulajhtaa aadmi hai aaj bhi sikhtaa hai yuun to insaan har tariqe ki zabaan sab se aasaan sab se behtar khaamushi hai aaj bhi jis ke chalte main ne DhunDe the kai raste nae DhunDhti mujh ko vahi aavaargi hai aaj bhi kitne Duube kitne ubhre kyaa khabar un ko 'farogh' bah rahi chup-chaap yuun hi har nadi hai aaj bhi"

"aisaa lagtaa hai samajhdaar hai duniyaa saari main huun is paar to us paar hai duniyaa saari is nai dauD mein aage hai na pichhe koi daam-e-ujlat mein giraftaar hai duniyaa saari dosti aur dikhaave ki mohabbat karnaa sab kaa sheva hai adaakaar hai duniyaa saari qaafile dil ke sar-e-aam hain luuTe jis ne usi rahzan ki talabgaar hai duniyaa saari aap andaaz kuchh apnaa to badal lete 'farogh' chaliye maanaa ki khataavaar hai duniyaa saari"

"koi kaaba na kalisaa na sanam meraa hai ik nae khvaab ki dharti pe qadam meraa hai saari duniyaa se hama-vaqt juDaa rahtaa huun raabta khud se magar aaj bhi kam meraa hai dil ko ehsaas ke us moD pe laai hai hayaat ab na meri hai khushi aur na gham meraa hai ab bhi Dartaa huun har ik baat mein likhne se 'farogh' tum ye kahte ho ki aazaad qalam meraa hai"

"ilm-o-hunar se qaum ko raghbat nahin rahi is par shikaayatein ki fazilat nahin rahi badlegaa kyaa nizaam kab aaegaa inqilaab jab naujavaan lahu mein haraarat nahin rahi mazlum ko dilaae jo har zulm se najaat aisi jahaan mein koi adaalat nahin rahi sajde mein jaa ke maangnaa be-kaar neamatein kuchh bhi kaho use ye ibaadat nahin rahi fatve liye hain shaikh se pir-e-mughaan ne khaas piine mein ab zaraa bhi qabaahat nahin rahi masjid kaa rukh kiyaa hai janaab-e-'farogh' ne lagtaa hai ab gunaah mein lazzat nahin rahi"