Ghazal

"mujh ko sadaa na dein na sataaein mohabbatein meri balaa se bhaaD mein jaaein mohabbatein pahneinge ham kabhi na ye maangi hui qabaa jaaein yahaan se apni uThaaein mohabbatein baiThe rahein ghurur mein apni anaa ke saath rakkhein sambhaal kar ye vafaaein mohabbatein kahnaa ki ab kisi ki zarurat nahin rahi thak haar kar jo lauT ke aaein mohabbatein divaar nafraton ki jo tum ne khaDi hai ki mumkin hai ye bhi bojh uThaaein mohabbatein hoti nahin ye har kas-o-naa-kas ke vaaste anmol hain jahaan mein duaaein mohabbatein is dil-fareb jaal mein 'fauzi' na aaegi qadmon mein chaahe phuul bichhaaein mohabbatein"

"kab gavaara thi zamaane ki koi baat mujhe vo to le aai yahaan gardish-e-haalaat mujhe rok sakti huun use roz-e-qayaamat tak bhi sang tere jo mile pyaar ki ik raat mujhe aakhiri gaam talak jiit hi samjhi main ne baDi tadbir se laai hai miri maat mujhe log jis kaar-e-aziyyat mein mare jaate hain zinda rakhte hain vahi hijr ke lamhaat mujhe tum se milne ke liye roz paDhaa karti thi ab bichhaD ne hi nahin detin ye aayaat mujhe lafz honTon se nikalte hue mar jaate hain us se aati hi nahin karni shikaayaat mujhe"

"koi fihrist lafzon ki yaa gōgle ko khangaalegaa vo meri chup se ab koi nayaa matlab nikaalegaa muqaabil kar diyaa us ke agar aaina main ne to zabaan se zahr uglegaa koi patthar uThaa legaa mujhe maalum hai us tak to khaali khat hi jaaegaa miraa qaasid hi dimak ban ke lafzon ko uDaa legaa zaraa daaman ko phailaayaa kai logon ne dukh Daale main samjhi thi koi hamdard mere gham uThaa legaa khaDe the log saahil par tamaashaa dekhne vaale main khush-fahmi mein Duubi thi koi aa kar bachaa legaa apaahij saari duniyaa hai koi andhaa koi bahraa koi maange mire sapne koi aankhein churaa legaa mujhe is dil ke zindaan se hai behtar aankh kaa dariyaa Duboegaa ye paani gar to laashein bhi uchhaalegaa lab-e-saahil to aate hain faqat kuchh khol sipon ke jo gahraai mein jaaegaa vahi gauhar nikaalegaa kisi miTTi ko gundhegaa kahin patthar taraashegaa hunar hai us ke haathon mein nai 'fauzi' banaa legaa"

"sirf kaaghaz ke phuul hote hain log aankhon ki dhuul hote hain ye koi moD hai judaai kaa vaapsi ke usuul hote hain ek patthar se baarhaa Thokar ye bharose bhi bhuul hote hain jab talak tum nazar nahin aate saare mausam fuzul hote hain dil sahifa hai ik mohabbat kaa aur chehre rasul hote hain saare mukhlis hi aabdida hain aap kyunkar malul hote hain chand lamhe visaal ke 'fauzi' qurbaton kaa husul hote hain"

"lu hi lu thi sabaa to thi hi nahin ziist raahat-fazaa to thi hi nahin us ki miTTi mein khu thi kuufe ki us mein bu-e-vafaa to thi hi nahin saath rah kar bhi itni duuri he vasl jaisi sazaa to thi hi nahin TuuT kar bhi main kahkashaan hi huun TuTne mein fanaa to thi hi nahin sirf malba paDaa thaa duniyaa kaa dil mein koi duaa to thi hi nahin apni surat se Dar gayaa thaa koi aaine ki khataa to thi hi nahin vo samar-baar peD thaa lekin us ke saae mein jaa to thi hi nahin jism jabran kisi se baandhaa hai is mein dil ki razaa to thi hi nahin us ne tohfe mein hijr bhejaa hai yeh aziyyat ravaa to thi hi nahin aadmi thaa khudaa na thaa 'fauzi' ziist us ki ataa to thi hi nahin"

"marham bhi mire zakhm kaa aazaar se niklaa iqraar kaa pahlu tire inkaar se niklaa thaa teri raunat ke pas-e-parda koi aur sar aur kisi kaa tiri dastaar se niklaa kis shakhs ki rah dekhne betaab saa ho kar saayaa kabhi dar se kabhi divaar se niklaa yaadon ke kisi baab mein rakhaa huaa koi khvaab sukhe hue ik phuul ki mahkaar se niklaa is sang-sifat shakhs ke lahje mein mohabbat yaa chashma-e-shirin kisi kohsaar se niklaa duniyaa tiri surat ke kharidaar bahut the luT kar hi gayaa jo tire baazaar se niklaa is khaak ki tah mein thi koi mauj-e-balaa-khez lafzon kaa samundar mire afkaar se niklaa"

"honTon par sahraa rahtaa hai aankh mein khaaraa paani ek kinaaraa aag hai meraa ek kinaara paani sukhe peD aur pyaasi aankhein aasmaan ko dekhein miTTi mein jaa kar chhup baiThaa dhuup kaa maaraa paani chaak ki is gardish ne maah-o-saal lapeT liye kuza-gar ki saari punji miTTi gaaraa paani aatish-gir masaafat hai aur ik ristaa mashkiza kab tak saath rahegaa aakhir ye bechaara paani aankh ke bahte ashkon se hi pyaas bujhaani hogi hijr ke tapte sahraa mein hai sirf sahaaraa paani kaun gali se guzrun aur main kaise tujh tak aauun basti saari daldal hai aur rasta saaraa paani sahraa ko hai yaad abhi tak pyaas ki fath-e-kaamil zulm ko kaise maat hui aur kaise haaraa paani"

"phir ik khushi se kiyaa us ne ham-kanaar mujhe vo khinch le gayaa dariyaa-e-gham ke paar mujhe charaagh-e-raah-e-mohabbat huun taaq mein rakhnaa ghubaar-e-qarya-e-nafrat mein mat utaar mujhe main us ki yaad mein raaton ko so nahin sakti vo duur rah ke bhi rakhtaa hai ashk-baar mujhe kaTi patang si aTki huun shaakh-e-naazuk par havaa kaa haath bhi kartaa hai taar taar mujhe miTaa de mujh ko yaa rakh le sameT kar dil mein tu hijr jaisi aziyyat se mat guzaar mujhe tu jaantaa hai ki main be-ghari se Darti huun nikaal dil se na aise tu baar baar mujhe main intizaar ke barzakh mein jalti rahti huun hazaar vasvase rakhte hain be-qaraar mujhe main chaahti huun use bhulnaa magar 'fauzi' qasam khudaa ki nahin khud pe ikhtiyaar mujhe"

"dil par tire hijraan mein qayaamat ki ghaDi hai ehsaas ke taabut mein ik laash paDi hai kichaD kaa takalluf na karo shahr ke logo aanchal pe to rusvaai ki ik chhinT baDi hai siine se lago hans ke rahe yaad ye lamha kho kar hamein rone ko to ik umr paDi hai mumkin hai to ik baar use toD de aa kar barson hue dahliz pe ummid khaDi hai kis tarah miri khaak se niklegi vo surat aankhon mein basi hai to kahin dil main gaDi hai siine mein nai saans utaari hai kisi ne barson se paDi gard mire dil se jhaDi hai koshish to bahut ki thi ki shishe mein utaarun tasvir bhi us shakhs ki pathar mein jaDi hai"

"mere andar bhi mire yaar si khaamoshi hai yaani us paar bhi is paar si khaamoshi hai dastakein deti huun naakaam palaT aati huun ek dar hai jahaan divaar si khaamoshi hai kis musavvir kaa taraashaa huaa shahkaar hai tu jo khad-o-khaal mein kohsaar si khaamoshi hai saare ehsaas masal degi kuchal jaaegi us ke lab par jo giraan-baar si khaamoshi hai baat sun kar bhi miri koi samajhtaa hi nahin shor ki sath pe tahdaar si khaamoshi hai kyon na is ko bhi kisi shakl mein Dhaalaa jaae ye jo atraaf mein be-kaar si khaamoshi hai baagh mein jhulaa na sahraa mein bagula koi samt-dar-samt pur-asraar si khaamoshi hai chup kaa matlab kabhi isbaat liyaa jaataa thaa aaj isbaat mein inkaar si khaamoshi hai"

"nafrat ki aandhiyon ko mohabbat mein Dhaal kar tanhaa khaDi huun dasht mein rishte sambhaal kar mujh ko to tere dard bhi tujh se aziiz hain baiThi huun dekh pyaar se jholi mein Daal kar taabir DhunDte hue rasta bhaTak gaiin khvaabon samet pheink diin aankhein nikaal kar shohrat kamaa rahe ho tum akhbaar ki tarah apne paraae logon ki pagDi uchhaal kar ik khush-gumaan aks ki bai'at se peshtar khush-bakht aaine se to rishta bahaal kar chhaayaa huaa hai baagh mein khauf-o-hiraas kyon sahme hue gulaab hain khushbu sambhaal kar yaa-rab kahaan se laate hain ye log hausla kaanTon mein pheink dete hain phulon ko paal kar"

"sab jiit kar bhi maat se aage nahin gayaa vo shakhs meri zaat se aage nahin gayaa naa-mumkinaat se hi thaa aaghaaz-e-zindagi buzdil to mumkinaat se aage nahin gayaa Thahraa hai vaqt aaj bhi bichhDe the ham jahaan ik pal bhi gham ki raat se aage nahin gayaa umron kaa intizaar vo jholi mein Daal kar do-chaar pal ke saath se aage nahin gayaa gham hijr kaa hai yaa use shauq-e-visaal hai insaan gham-e-hayaat se aage nahin gayaa jitne lage hain zakhm mire doston ke hain dushman to sirf ghaat se aage nahin gayaa miTTi ke haath ishq ki miTTi palid hai tu bhi havas ki baat se aage nahin gayaa haathon mein haath Daal ke jaanaa thaa chaand par afsos chaand-raat se aage nahin gayaa main duur se hi dekh ke khush ho gai use aur vo bhi khvaahishaat se aage nahin gayaa"