Ghazal

"yaad mein teri aisaa karne lagte hain ham aksar khud se hi laDne lagte hain yaadein zinda ho jaati hain shaam Dhale phir ham dhire-dhire marne lagte hain kuchh yaadein itni dhundli ho jaati hain ham un ko ik khvaab samajhne lagte hain vo qissa main jab jab bhi dohraataa huun nazron se kuchh log utarne lagte hain buDhe ho kar mukhiyaa apne ghar mein hi apni aulaadon se Darne lagte hain"

"main thak chukaa huun zamaana ke chonchalon se ab so chun rahaa huun kuchh ik dost dushmanon se ab chale gae hain jo vaapas nahin milaa karte milungaa khair tumhein main bhi mushkilon se ab na jaane kaaT rahaa huun main kis liye raatein milegaa kyaa hi mujhe jaane ratjagon se ab miTaa rahaa huun ab apnaa main asl maa'ni khud talaash karnaa mujhe apne zaaviyon se ab tumhaare dil mein bhi meri jagah nahin koi mujhe bhi sikhnaa hai jiinaa be-gharon se ab"

"tujhe paane ki khvaahish phir jagi hai magar afsos ye to khud-kushi hai mujhe aavaaz de main ji uThungaa tiri aavaaz udaasi toDti hai tiri tasvir ko dekhun to mujh ko abhi tak pyaar se hi dekhti hai agar tu khush nahin hai to chali jaa mujhe to khair bas apni paDi hai miraa kyaa hai miraa afsos bhi kyaa tire aage to puuri zindagi hai"

"toD di saare jahaan se dosti achchhaa kiyaa aur khud se bhi koi khvaahish na ki achchhaa kiyaa ik qasam jo rok sakti thi hamaari rukhsati khair tum ne vo qasam ham ko na di achchhaa kiyaa lauTtaa to dekhtaa kuchh aur pairon ke nishaan par na lauTaa main kabhi us ki gali achchhaa kiyaa logon kaa bartaav to thaa hi bahut bekaar par khud se main ne kaun saa khud bhi kabhi achchhaa kiyaa ab to jhuTe munh bhi tum kahte nahin ho pyaar hai tum ne aakhir chhoD hi di dil-lagi achchhaa kiyaa"

"miri aankhon ke jo raushan diye hain tumhaari yaad mein bujhne lage hain kai aansu to asli rang apnaa miri aankhon mein aa kar dekhte hain tumhaare khvaab dilkash khvaab the par miri aankhon mein bhi gahre kuein hain vahi rishte jo mujh ko bun rahe the mire ash'aar mein bikhre paDe hain baDappan dekhiye mere baDon kaa mujhe chhoTaa jataane par tule hain"

"aap ko ye bhale aasaan safar lagtaa hai she'r kahne mein magar khun-e-jigar lagtaa hai chaahte the jise bhar leinge kabhi baanhon mein itnaa naazuk hai vo chhune mein bhi Dar lagtaa hai itni yaadein hain fazaaon mein tiri kyaa bolein lakhnau aaj bhi teraa hi nagar lagtaa hai jis kisi se bhi milun ab vo lage hai tum saa tum na maanoge mire yaar magar lagtaa hai tum se bichhDe the kabhi tab se pahar ye ham ko aaj tak tum se bichhaDne kaa pahar lagtaa hai"

"aur phir ham ne bhi apne dil kaa saudaa kar liyaa baa'd tere ham ne apnaa dil khilaunaa kar liyaa uf ye tere haath piile uf sinduri maang ye ik zaraa naaraazgi mein tu ne ye kyaa kar liyaa thaa nahin suraj magar itnaa andheraa bhi na thaa ham ne khud batti bujhaai khud andheraa kar liyaa koi chaara hi nahin thaa paas mere is liye teri jaisi ‘aadatein kiin khud ko tujh saa kar liyaa ab kahaan mujh saa milegaa tum ko duniyaa mein koi mujh se dhokaa kar ke tum ne khud se dhokaa kar liyaa"

"main ne chaahaa hi nahin mujh ko safaai do tum apni yaadon se magar mujh ko rihaai do tum meri bas itni si khvaahish ko tavajjoh de do roz jagte hi mujhe subh dikhaai do tum ik bharam rakh lo yahi kah do mileinge phir se aas hi baaqi rahe aise vidaa'i do tum ab miraa man hi nahin aur ghazal kahne kaa tum ho guzraa huaa kal ab na sunaai do tum pyaar ke rog ki bas pyaar davaa hai to phir lauT kar aao mujhe meri davaai do tum"

"ye zindagi khayaal hai aur ham-khayaal tu apnaa le mujh ko yuun na miri jaan nikaal tu break-up kaa gham to thaa hi mujhe ab ye gham bhi hai break-up ke baa'd lagne lagi hai vabaal tu jo bhi kahungaa jhuuT kahungaa main hosh mein piine ke baa'd puchh miraa haal-chaal tu kyon dil mein chubh rahaa hai miraa pyaar hai agar tu pyaar hai to pair kaa kaanTaa nikaal tu ik to hai pyaar vo bhi mujhe vo bhi tujh se hai main bhi kamaal pyaar bhi us par kamaal tu"

"sach hai tum ko milaa nahin huun main haan magar gum-shuda nahin huun main mujh se kuchh ghaltiyaan to hongi hi aadmi huun khudaa nahin huun main aap ko bhuul hi nahin paayaa kyaa karun aap saa nahin huun main is zamaana ke rang hain mujh par varna itnaa buraa nahin huun main sun rahaa huun main teri khaamoshi dil dukhaa hai maraa nahin huun main"

"do-chaar doston ki nazar lag gai mujhe varna kisi ke saath ki 'aadat na thi mujhe phir aap ki gali se guzarte hue lagaa pichhe se jaise aap ne aavaaz di mujhe hanstaa huun is liye ki isi mein sukun hai ro kar bhi kaun si khushi vaapas mili mujhe main kis tarah se tere binaa ho gayaa tabaah main sochtaa huun kaash ki tu dekhti mujhe apnaa sukun aur hai dil kaa sukun aur dil ke sukun se hi musibat mili mujhe"

"jangal pahaaD khet bhi bhaate nahin mujhe apni nazar se tum jo dikhaate nahin mujhe main rasm rah gayaa huun faqat aur kuchh nahin is par bhi mere log nibhaate nahin mujhe do din mile baghair bhi jis se sukun na thaa haae ab us ke khvaab tak aate nahin mujhe ye zindagi hai khvaab buraa khvaab zindagi kyon niind se khudaayaa jagaate nahin mujhe gham hain mujhe to khair mujhe ye sukun hai ye gham akele chhoD ke jaate nahin mujhe"

"jism thaktaa rahaa magar nikle ik safar se kai safar nikle 'ishq niklaa khaton khaton pahle aur phir in khaton ke par nikle bas usi ki rahi kami chhat par chaand taare to raat-bhar nikle aise niklaa hai vo kahaani se jism se ruuh jis qadar nikle maut ki hi kasar bachi hai ab ek gham aur ye kasar nikle"

"us ko jin aankhon se duniyaa dikhti hai main ne un aankhon mein duniyaa dekhi hai jis ko meraa haath pakaDnaa chaahiye thaa vo meri ik ghalati pakDe baiThi hai aankh se nikli tab mujh ko maa'lum huaa khvaab ki arthi paani jaisi hoti hai san navve mein vo duniyaa mein aai thi san navve se shaam ye bahki bahki hai vo kahti thi mar jaaegi mere bin koi to batlaao ab vo kaisi hai"

"ji bhi chuke hain khvaab jo ab dekhte hain ham kuchh ik baras to saath bhi us ke rahe hain ham vo ghair ki hui ye chalo maan bhi liyaa aataa nahin yaqin ki kisi aur ke hain ham ham ko na dekh aaj tujhe ye khabar nahin kal tak the koi aaj koi dusre hain ham sochaa karein hain lauT chalein us ke shahr ko DhunDhaa karein ki kaun jagah kho gae hain ham ghazlein paDho to haal hamaaraa pata chale achchhe hain puchhne pe yahi bolte hain ham"

"pyaar kar paaun main ab aisaa nahin ho paaungaa chaahtaa to huun magar teraa nahin ho paaungaa mujh saa duniyaa mein talaashe phir rahi ho to suno ab main khud bhi chaahun to vaisaa nahin ho paaungaa kuza-gar mujh ko banaate vaqt itnaa dhyaan rakh main binaa mahbub ke puuraa nahin ho paaungaa baa'd maan ke bhi main pyaaraa to huun laakhon kaa magar ab kisi ki aankh kaa taara nahin ho paaungaa us ne jab chhoDaa thaa meri 'umr thi ikkis baras tab se ikkis kaa huun main buDhaa nahin ho paaungaa"