Ghazal

"rakkhaa nahin thaa tu ne miraa dil sanbhaal kar ab kuchh na kar sakegaa lihaazaa malaal kar raqsaan thi shab ko dhuup tumhaare khayaal ki fursat kaa chaand baiTh gayaa dil sanbhaal kar baahar nikal ke dekh andheron se ek baar rakkhaa hai raushni ne kaleja nikaal kar kahte hain dil jise kahin maujud hi nahin dekhaa hai main ne baarhaa siina khangaal kar baab-e-qafas khulaa thaa rihaa tab na ho sake ab kyaa karein zamin se rasta nikaal kar aai thi itni yaad tire jism ki mahak ham chumne lage tire kapDe nikaal kar"

"chashm dekhun na main us ki na hi abru dekhun phir vo kyaa shai hai jise duniyaa mein har-su dekhun is bhare shahr mein bas ek hi saudaagar hai ab main saamaan kharidun ki taraazu dekhun jang ne chhoD diye zakhm mire haathon par fath kaa jashn manaaun ki ye baazu dekhun mujh ko haalaat ne is samt dhakelaa hai magar meri ye 'umr kahaan hai ki main ghungru dekhun in ujaalon se bandhi hain miri aankhein 'zishaan' in ujaalon se nikal jaaun to ghungru dekhun"

"reh reh ke yaad aati hai us sharmsaar ki be-ikhtiyaari dekh mire ikhtiyaar ki Dar hai ki gir na jaae mohabbat kaa aashiyaan miTTi khisak rahi hai mire e'tibaar ki murjhaa rahaa hai dil mein tiri yaad kaa darakht kyaa dhuup paD rahi hai tire intizaar ki ik tujh ko dekhnaa hi miraa kaam kaaj thaa kyon dhajjiyaan uDaa diin mire rozgaar ki vo shakhs aa ke mere mahalle mein bas gayaa mujh par nigaah paD gai parvardigaar ki"

"ham ek roz us ko bhulaane nikal gae jab aae lauT kar to zamaane nikal gae ik shakhs jaa rahaa thaa hamaaraa zamin se ham aasmaan sar pe uThaane nikal gae tu to khamosh ho gayaa phir ham gali gali teri taraf kaa shor machaane nikal gae jab jab hamaare haath mein aae hamaare paanv un ki gali mein khaak uDaane nikal gae us kam-sukhan ne aaj bahut khul ke baat ki muflis ki jhopDi se khazaane nikal gae bilkul nai zabaan thi us ke kalaam mein lekin hamaare kaan puraane nikal gae jab jab bhi yaad aaiin tumhaari hatheliyaan ham doston se haath milaane nikal gae"

"kartaa hai koi ab bhi paziraai hamaari rusvaai bhi lagti nahin rusvaai hamaari ham dekh ke duniyaa bhi tujhe dekh na paae bekaar paDi rah gai binaai hamaari lagtaa hai bichhaD kar bhi nazar aate raheinge hai us ke mahalle mein shanaasaai hamaari ham tere khayaalon mein bhaTakte rahe bejaa aavaaz lagaati rahi tanhaai hamaari ab sab se musavvir kaa pata puchh rahaa hai itni use tasvir pasand aai hamaari rusvaai pe ham naaz karein kyon na bataaein jab aap se mansub hai rusvaai hamaari"

"yuun bharam apni amiri kaa banaa rakkhaa hai ghar to khaali hai magar taalaa lagaa rakkhaa hai aal-e-maqtul to maqtal mein khaDi hai khaamosh aap ne kis liye hangaama machaa rakkhaa hai tum ne sahraa mein bahut khaak uDaai hogi main ne to shahr mein maahaul banaa rakkhaa hai jaise-taise tiri tasvir churaa li main ne bas koi puchh na le jeb mein kyaa rakkhaa hai tum kaho apne ta'alluq ki vazaahat kar duun ek patthar hai jise sar pe uThaa rakkhaa hai"

"haakim-e-shahr ke andaaz hain hinda jaise ham to haathon mein thamaa deinge kaleja jaise sakht mushkil thaa mujhe chhoD ke aanaa tujh ko sukDi galiyon se nikaltaa hai janaaza jaise yuun dilaayaa hai use apni mohabbat kaa yaqin munkir-e-din ko paDhaayaa gayaa kalma jaise us kaa jhunjhlaanaa to bantaa thaa ki main ne us ko aise dekhaa kabhi dekhaa hi nahin thaa jaise zindagi saath tire itni hasin lagti hai dhuup mein baiThaa huaa dudh-munh bachcha jaise zindagi ghuum rahi hai tiri yaadein le kar maut ke ghar mein Tahalti hui beva jaise"

"janaab-e-'aali bichhaDne ki koi baat nahin hamaare siine mein ik dil hai paanch saat nahin bahut jhijhak ke kiyaa hai musaafaha tum ne tumhaare haath mein shaayad tumhaaraa haath nahin zamaane bhar se ta'alluq ki parda-daari hai kise bataaein ki ab tu hamaare saath nahin hamaari zaat se baahar hamein talaash karo hamaari zaat ke andar hamaari zaat nahin main chaahtaa huun ta'alluq bahaal karnaa magar tumhaaraa dil hi nahin hai to koi baat nahin ham apne pairon ko ye baat kaise samjhaaein ab us gali mein hamaare mu'aamalaat nahin"

"tu to tanhaa sar-e-baazaar nikal jaataa hai dekhte dekhte maahaul badal jaataa hai tum ne har baar mire 'ishq kaa inkaar kiyaa itni koshish mein phaTaa note bhi chal jaataa hai jab bhi lagti hai bhanak aap se mansub huun main saamne vaale kaa lahja hi badal jaataa hai der tak reh nahin paati tire chehre pe nazar is chaDhaai pe miraa paanv phisal jaataa hai dhuup se haath chhuDaayaa to hamein 'ilm huaa saaya auqaat se baahar bhi nikal jaataa hai"

"zindagi aise chal rahi hai dost jaise mayyat nikal rahi hai dost aaj jaanaa hai gham ki mahfil mein shakl kapDe badal rahi hai dost be-vafaa tum ho be-vafaa ham hain barf par naav chal rahi hai dost hosh niche giraaegaa us ko niind rassi pe chal rahi hai dost ye udaasi hamaari aankhon mein kitne naazon se pal rahi hai dost aag kaise bujhegi paani se aag paani mein jal rahi hai dost"

"vo aa ke baiThe the jis vaqt aashiyaane mein amiir jhaank rahe the gharib-khaane mein hazaar qaafile guzre hain saamne se magar main rah gayaa huun tumhein dekhne dikhaane mein tamaam 'umr bichhaDne se khauf khaayaa magar zaraa si der lagi asthiyaan bahaane mein hamaare dil ko sukun aa gayaa hai jab se miyaan machi hui hai 'ajab haDbaDi zamaane mein khudaa ke vaaste chehra sanbhaal kar rakhnaa lagaa huaa hai koi aaina banaane mein"

"vo sang-dil to faqat dekhne se Tuut gae ye dekhne mein hamaare pasine chhuT gae unhein hamaare sivaa qaafile se kuchh na milaa magar luTere hamaaraa bharam to luuT gae tumhaari diid kaa darvaaza khaTkhaTaayaa zarur main kyaa karun ki nigaahon ke haath Tuut gae tumhaare dasht se kuchh khaas haath aayaa nahin zaraa se aable laae the vo bhi phuuT gae na khaain Thokarein us ki gali ke pattharon se guzarne vaalo tumhaare nasib phuuT gae"

"dil itnaa kho gayaa aaraaishon mein tiri khvaahish nahin hai khvaahishon mein tiri yaadein hain aur aansu hamaare chitaaein jal rahi hain baarishon mein hamaari ruuh ghuT ke mar gai hai hamaare jism ki gunjaaishon mein ham apne qatl kaa zimma kise dein hai saaraa shahr hi farmaaishon mein"

"kis taraf qaafila jaanaa hai kahaan dekhte hain ham to bas aap ke pairon ke nishaan dekhte hain aisaa maahaul banaa rakkhaa hai darvaaze par aate jaate hue sab meraa makaan dekhte hain jang binaai ko kis moD pe le aai hai aasmaan dekhnaa chaahein to dhuaan dekhte hain log kahte hain tu maujud nahin duniyaa mein ham ko phir bhi nazar aataa hai jahaan dekhte hain pairahan dekh rahe hain ye sabhi log miraa tum to kahte the ki andaaz-e-bayaan dekhte hain"

"sharmindagi mein 'umr basar kar rahe hain ham ye kaam thaa tumhaaraa magar kar rahe hain ham piinaa karo na band mulaaqaat ki sharaab muddat ke baa'd tum pe asar kar rahe hain ham aise bhaTak rahe hain tumhaari talaash mein duniyaa ko lag rahaa hai safar kar rahe hain ham dil saari baat bhuul gayaa sochnaa bhi mat hans hans ke tujh se baat agar kar rahe hain ham tu shahr mein nahin hai magar is ke baavajud teri gali se roz guzar kar rahe hain ham"

"dil kisi kaa na huaa ek kharidaar ke baa'd log baazaar lagaa lete hain baazaar ke baa'd qatl kar ke bhi hamein dil nahin bhartaa un kaa laat bhi maarte hain jism pe talvaar ke baa'd khud ko bad-bakht kahun yaa main kahun khush-qismat meri binaai gai hai tire didaar ke baa'd shahr khaali na ho ye soch ke ham khaana-ba-dosh jam' ho jaate hain har raat ko baazaar ke baa'd sirf pachhtaavaa huaa hai hamein tujh se mil kar kabhi guftaar se pahle kabhi guftaar ke baa'd"

"tu mujhe yaad kare aisaa tariqa nikle meri yak-tarfa mohabbat kaa natija nikle teri aankhon mein dikhaai de mohabbat meri be-namaazi tire baste se musallaa nikle varna ham kab ke chaTaanon mein phanse mar jaate paanv kaaTe to tire dasht se zinda nikle jang mein kaun nikaltaa hai gharon se baahar tu ne aavaaz lagaai thi lihaazaa nikle teri raahon mein bhaTakte hue maut aa jaae aur aise mein miri jeb se naqsha nikle itni khaamoshi se nikle hain tire shor se ham jaise baazaar ke majma' se janaaza nikle aaj aaungaa tire paas mohabbat le kar muddatein ho gaiin 'izzat kaa janaaza nikle"

"aankh se kaise kahun ab bhi andheraa dekhe muddatein biit gaiin dhuup kaa jalva dekhe do gilaason mein samundar to nahin aa saktaa ye nazar tujh ko agar dekhe to kitnaa dekhe ghuum kar dekh liyaa saaraa zamaana main ne ab to bantaa hai mujhe saaraa zamaana dekhe aise paDhtaa huun qaside tiri raa'naai ke hai jo mahrum-e-nazar vo bhi saraapaa dekhe jaa rahaa thaa vo mujhe chhoD ke aise us din main ne bhi chaahaa nahin muD ke dubaara dekhe us ke jaane pe khushi bhi thi mujhe fikr bhi thi jaise maan madrase jaataa huaa bachcha dekhe bahut itraataa hai aazaadi pe apni koi us se kahnaa kabhi aa kar miraa pinjra dekhe"