Ghazal

"jism-o-jaan ki basti mein silsile nahin milte ab kisi bhi markaz se daaere nahin milte do-qadam bichhaDne se qaafile nahin milte manzilein to milti hain raaste nahin milte baarhaa taraashaa hai ham ne aap kaa chehra aap ko na jaane kyuun aaine nahin milte vaqt ki kami kah kar jehl ko chhupaate hain aaj-kal kitaabon mein haashiye nahin milte aaj bhi zamaane mein aadmi karishma hain shoabde to milte hain moajize nahin milte zindagi kaa har lamha aarzu kaa dushman hai haadson ki khvaahish mein haadse nahin milte aaj qatl karnaa bhi ban gayaa hai fan 'zarrin' qatl karne vaalon ke kuchh pate nahin milte"

"aable suukh chuke phir bhi kasak baaqi hai dil ke har zakhm mein yaadon ki mahak baaqi hai chhoD duun kaise bhalaa apne buzurgon kaa chalan meri rag rag mein abhi un kaa namak baaqi hai jin ke saae mein bahal jaataa thaa bachpan aksar mere ehsaas mein ab tak vo dhanak baaqi hai tum ko aanaa hai to aa jaao ba-sad-shauq yahaan ab bhi haalaat mein halki si lachak baaqi hai band hoti nahin palkein miri sadiyaan guzrin khvaab to TuuT chuke sirf chamak baaqi hai dil ki dhaDkan miri aavaaz-e-anaa hai 'zarrin' mere har lafz mein lahje ki khanak baaqi hai"

"kaarvaan sust-musaafir ko sazaa detaa hai zard patte ko har ik peD giraa detaa hai apni aankhon ko vo be-vajh sazaa detaa hai giile indhan ko agar koi havaa detaa hai ab mire bas mein kahaan hai ki main vaapas aauun meraa maazi mujhe bekaar sadaa detaa hai kis liye tu ne bujhaa Daale sulagte sapne kis liye ab inhein rah rah ke havaa detaa hai zindagi ham ne banaai hai 'amal se lekin ham bhi kahte hain ye hi sab ko khudaa detaa hai ek bahtaa huaa tinkaa bhi aham hai 'zarrin' apni raftaar se dariyaa kaa pataa detaa hai"

"baarish-e-ashk bazaahir to suhaani hogi haan magar 'umr samundar mein ganvaani hogi mash'alein saath rakho raat bhayaanak hai bahut aag jangal mein bahar-gaam jalaani hogi main musavvir huun mire fan kaa taqaazaa hai yahi mujh ko dushman ki bhi tasvir banaani hogi yuun to patthar ki bhi qismat hai hasin taaj-mahal apni taqdir magar aap banaani hogi aaj to zakhm ke phulon ki mahak hai taaza kal tum aae bhi to har baat puraani hogi mujh ko ehsaas ke paikar mein na DhunDo logo meri aavaaz tumhein DhunD ke laani hogi ham ne har 'ahd se samjhautaa kiyaa hai 'zarrin' kuchh bhi ho ab to har ik baat nibhaani hogi"

"ruuh jismon se baahar bhaTakti rahi zakhmi yaadon ko aanchal se Dhakti rahi mere haathon mein thiin gard ki chaadarein zindagi thi ke daaman jhaTakti rahi chaandni mein hasin zahr ghultaa rahaa sar ko marmar pe naagin paTakti rahi main ghaTaaon se khud ko bachaati rahi tegh bijli ki sar pe laTakti rahi mere honTon ko kab mil saki baansuri saans 'zarrin' labon pe aTakti rahi"

"ajiib karb-e-musalsal dil-o-nazar mein rahaa vo raushni kaa musaafir andhere ghar mein rahaa vo chaandni kaa muraqqaa nahin thaa jugnu thaa charaagh ban ke jalaa aur shajar shajar mein rahaa kahaavaton ki tarah vo bhi shahr-e-maani thaa bujhaa bujhaa saa diyaa jo kisi khanDar mein rahaa vo jis ko khoj saraabon mein thi samundar ki vo apne dasht-e-dil-o-jaan ki rahguzar mein rahaa vahi to naqsh-e-qadam the jo saare miTte gae vo daagh-e-sajda thaa baaqi jo sang-e-dar mein rahaa yahi tilism thaa 'zarrin' jise na toD saki vajud us kaa to taqdir ke bhanvar mein rahaa"

"be-samt raaston pe sadaa le gai mujhe aahaT magar junun ki bachaa le gai mujhe patthar ke jism mom ke chehre dhuaan dhuaan kis shahr mein uDaa ke havaa le gai mujhe maathe pe us ke dekh ke laali sindur ki zakhmon ki anjuman mein hinaa le gai mujhe khushbu pighalte lamhon ki saanson mein kho gai khushbu ki vaadiyon mein sabaa le gai mujhe jo log bhiik dete hain chehre ko dekh kar 'zarrin' unhin ke dar pe anaa le gai mujhe"

"manzilein aaiin to raste kho gae aabgine the ki patthar ho gae be-gunaahi zulmaton mein qaid thi daagh phir kis ke samundar dho gae umr bhar kaaTeinge faslein khuun ki zakhm dil mein biij aisaa bo gae dekh kar insaan ki bechaargi shaam se pahle parinde so gae an-ginat yaadein mere hamraah thiin ham hi 'zarrin' darmiyaan mein kho gae"

"khvaab aankhon se zabaan se har kahaani le gayaa mukhtasar ye hai vo meri zindagaani le gayaa phuul se mausam ki barsaatein havaaon ki mahak ab ke mausam ki vo sab shaamein suhaani le gayaa de gayaa mujh ko saraabon kaa sukut-e-mustaqil mere ashkon se vo dariyaa ki ravaani le gayaa khaak ab uDne lagi maidaan sahraa ho gae ret kaa tufaan dariyaaon se paani le gayaa kaun pahchaanegaa 'zarrin' mujh ko itni bhiiD mein mere chehre se vo apni har nishaani le gayaa"

"duur tak phaile rahe tanhaaiyon ke silsile aansuon ki dhund mein parchhaaiyon ke silsile ek to saavan kaa mausam us pe maazi ki phuvaar zakhm taaza kar gae purvaaiyon ke silsile Dubte jaate hain saahil girte jaate hain makaan baDh rahe hain har taraf angnaaiyon ke silsile sath-e-dariyaa se na gahraai kaa andaaza huaa Duub kar ham ko mile gahraaiyon ke silsile aaj duniyaa kah rahi hai jin ko 'zarrin' devtaa un ke maazi mein bhi hain rusvaaiyon ke silsile"

"phuul rishton ke mohabbat ke chaman chhoD gae kitne majbur the jo apnaa vatan chhoD gae ab tabassum ke liye ham ko tarasnaa hogaa haadse vaqt ke maathe pe shikan chhoD gae aane vaalon ke liye raat qayaamat hogi kaarvaan shaam ke daaman mein thakan chhoD gae mere virse mein na daulat hai na jaagir koi mere ajdaad zamaane mein chalan chhoD gae meri hassaas tabi'at kaa asar hai 'zarrin' phuul kaanTe to na the phir bhi chubhan chhoD gae"

"agar vo mil ke bichhaDne kaa hausla rakhtaa to darmiyaan na muqaddar kaa faisla rakhtaa vo mujh ko bhuul chukaa ab yaqin hai varna vafaa nahin to jafaaon kaa silsila rakhtaa bhaTak rahe hain musaafir to raaste gum hain andheri raat mein dipak koi jalaa rakhtaa mahak mahak ke bikharti hain us ke aangan mein vo apne ghar kaa daricha agar khulaa rakhtaa agar vo chaand ki basti kaa rahne vaalaa thaa to apne saath sitaaron kaa qaafila rakhtaa jise khabar nahin khud apni zaat ki 'zarrin' vo dusron kaa bhalaa kis tarah pataa rakhtaa"

"ghabraa gae hain vaqt ki tanhaaiyon se ham uktaa chuke hain apni hi parchhaaiyon se ham saaya mere vujud ki had se guzar gayaa ab ajnabi hain aap shanaasaaiyon se ham ye soch kar hi khud se mukhaatib rahe sadaa kyaa guftugu kareinge tamaashaaiyon se ham ab deinge kyaa kisi ko ye jhonke bahaar ke maangeinge dil ke zakhm bhi purvaaiyon se ham 'zarrin' kyaa bahaaron ko muD muD ke dekhiye maanus the khizaan ki dil-aasaaiyon se ham"

"ham jo oDhe hue ehsaas ki chaadar nikle jin ko insaan samajhte the vo patthar nikle khushk mausam thaa magar Duub gae ahl-e-zamin ham ne patthar jo haTaae to samundar nikle bai'at-e-dast-e-yazidi mujhe manzur nahin miri is baat pe har samt se khanjar nikle bastiyaan bhi to darindon se nahin hain mahfuz ghar se nikle bhi koi shakhs to kyunkar nikle jabr-e-tahzib ki taarikh yahi hai ab tak ek divaar giraai to kai ghar nikle un ke chehre bhi nazar aae hain dhundle 'zarrin' aaina-khaanon se jo log sanvar kar nikle"