Ghazal

"jab se tire mizaaj mein chaahat nahin rahi ham ko bhi tere dar ki zarurat nahin rahi pathraav jism-o-jaan pe had se guzar gayaa phir yuun huaa ki dard mein shiddat nahin rahi din ki thakaan raat ko bistar pe le gai tum ko bhi yaad karne ki fursat nahin rahi tanhaa si ho gai hain ye kamron mein sardiyaan yaadon ke is alaav mein hiddat nahin rahi tum ne bhi apne aap ko masruf kar liyaa ham ko bhi intizaar ki aadat nahin rahi achchhaa huaa jo tum se ta'alluq nahin rahaa din-raat sochne ki aziyyat nahin rahi"

"muddatein ho gaiin jise khoe dil use baar-baar kyon roe khuun hi to hai aarzuon kaa koi daaman ko apne kyon dhoe fasl kaa intizaar karnaa hai ham ne kheton mein qahqahe boe jis ko jaanaa thaa vo ravaana huaa rone-dhone se kuchh nahin hoe niind bachpan mein jaise aati thi phir kabhi is tarah nahin soe dil ko patthar banaa liyaa lekin ek din be-sabab bahut roe"

"miri shikast pe chupke se muskuraataa hai baDe khulus se vo dosti nibhaataa hai usi ke naam se dahliz hai miri raushan usi kaa naam to khushbu si le ke aataa hai hai meraa dost magar kuchh pata nahin chaltaa har ek se vo mire aib kyon ginaataa hai mire vajud mein ghulti hai jaise raanaai tiraa khayaal mire hausle baDhaataa hai"

"har jagah bas yahi to hotaa hai aadmi aadmi ko rotaa hai kyaa zaruri hai yaad hi aae dil hai ye be-sabab bhi rotaa hai yaad aansu na ban sake jis din shaam par kitnaa bojh hotaa hai ye mizaajon kaa khel hai saaraa ek hanstaa hai ek rotaa hai haath uTh jaaein bas duaa ke liye kuchh na kuchh to zaruri hotaa hai sab mafaadaat ke karishme hain kaun kis ke qarib hotaa hai"

"kis ko dikhaaein sapne apne sab ke dukh hain apne apne kahne ko to log bahut the khvaab na baanTe ham ne apne tez bahut the havaa ke jhonke qadam na paae jamne apne saare aansu pi Daale hain tum ne apne ham ne apne saath tumhaaraa raas na aaya khat mein likkhaa ham ne apne raste par hai thakan si taari paanv lage hain jamne apne"

"tu judaa huaa jo mujh se mire khvaab jal gae the miri raat bujh gai thi ki diye badal gae the tire lams ki badaulat mire jism-o-jaan the raushan tiri zaat ke ujaale mire dil mein Dhal gae the jahaan zindagi luTi hai jahaan dafn hai tamanna usi sang-dil gali mein yunhi kal nikal gae the tujhe sochne kaa lamha koi phuul jaise mahke tiri yaad jaise ghar mein kai diip jal gae the mujhe yaad hai abhi tak vo tapish tire labon ki unhein jab chhuaa thaa main ne mire haath jal gae the vahi rahguzar thi ghaaeb bhalaa kaise lauT paate tiri justuju mein jaanaan jahaan ham nikal gae the"

"main apni zaat se jis ko nafi nahin kartaa utar ke mujh mein vahi zindagi nahin kartaa hai zindagi to salaamat hain zaaiqe saare yahi sabab hai ki main khud-kushi nahin kartaa main naa-sipaas huun lekin ye us kaa sheva hai vo apne fazl mein koi kami nahin kartaa kisi ki yaad bhi ab bhuul kar nahin aati dayaar-e-jaan mein koi raushni nahin kartaa sabhi ko apne garebaan ki fikr hai shaayad mire junun se koi dosti nahin kartaa"

"koi mere paas nahin hai aur na kisi kaa haasil main lahrein aa kar sar paTkeingi tanhaa tanhaa saahil main kyaa paayaa hai kyaa baanTaa hai apne apne zarf ki baat tu ne meri hansi uDaai tere dukhon mein shaamil main agle qadam pe andhaa kuaan thaa is kaa mujh ko ilm bhi thaa lekin main ne raah na badli apne aap kaa qaatil main bichhaD gayaa par aas hai mujh ko ik din tujh se milnaa hai teri zaat kaa mehvar thaa main tere safar ki manzil main ujle bistar par tanhaai pyaase honTon par cigarette paDhte paDhte so jaataa huun ibn-e-safi kaa novel main rasta manzil khalvat mahfil mahkein teri yaadon se lamha-lamha tujh ko sochaa tujh se rahaa kab ghaafil main"

"kyaa sabab bataaein ham apni is udaasi kaa raasta nahin miltaa dard ko nikaasi kaa ek tez jhonke mein uD gae sabhi kheme dil bhi kyaa kare shikva apni be-asaasi kaa har taraf khamoshi ki ik dabiz chaadar hai ham ne karb jhelaa hai apni khud-shanaasi kaa zakhm zakhm chehre par qahqahe sajaa Daale raaz bhi chhupaanaa thaa apni bad-havaasi kaa tum gae to kuchh aise lauT kar nahin aae haal bhi nahin puchhaa is nagar ke baasi kaa main ne apne ashkon ko aankh mein jalaa Daalaa kyaa kare gila koi teri naa-sipaasi kaa"

"us se mil kar aayaa huun mahkaa mahkaa phirtaa huun saare kaam uThaa rakkhe hain tujh ko sochaa kartaa huun main to baazi haar gayaa par us ki jiit pe hanstaa huun dil na chaahe phir bhi main us se mil hi aataa huun jis ne jaa kar khat na likhaa us kaa rasta taktaa huun tu aae to aage jaaun teri khaatir Thahraa huun"

"ye rahguzaar-e-shauq bhi kitni tavil hai ghar se chale the soch ke do-chaar miil hai mujh ko lagaa ki dard ki baarish karegaa vo ik zakhm de ke rah gayaa kaisaa bakhil hai itnaa na kharch kijiye rakhiye sanbhaal kar aankhon mein aansuon kaa zakhira qalil hai zulm-o-sitam ne misr pe qabza jamaa liyaa muusaa ke intizaar mein dariyaa-e-nil hai ab aur gham mile na mile koi gham nahin is mai-kade mein tishna-labi khud-kafil hai"

"zamin kaa bojh thaa ab bhi zamin pe rahne de jahaan pe laash giri hai vahin pe rahne de mire khulus ke qaatil tujhe amaan na mile khudaa ye daagh tiri aastin pe rahne de main intizaar karun tu mujhe kabhi na mile miri asaas-e-mohabbat nahin pe rahne de main apni zaat ki jalti ruton kaa maalik huun tu apne abr ko apni zamin pe rahne de tire karam ko aqidat se phuul kahtaa huun tu mere zakhm ko meri zamin pe rahne de"

"vo mire paas thi gai hai abhi meri duniyaa mahak rahi hai abhi tirgi ko khabar nahin shaayad meri aankhon mein raushni hai abhi us ne ik baar chhu liyaa thaa yunhi mujh mein khushbu si aa rahi hai abhi zindagi us pe tajraba na kare us ki baaton mein chaashni hai abhi main bhi ab tak udaas rahtaa huun un nigaahon mein bhi nami hai abhi is se pahle ki tirgi phaile tum chale aao raushni hai abhi"

"bahut kaThin hai bikharne kaa hausla rakhnaa sabab tumhin ho magar tum se kyaa gila rakhnaa na jaane kaun se mausam se saabiqa paD jaae hamaare haq mein duaaon kaa silsila rakhnaa khudaa kare ki use apni baat yaad rahe gayaa hai kah ke mujhe apnaa dar khulaa rakhnaa mire baghair ruton ko vo kaise kaaTegaa isi khayaal mein bas khud ko mubtalaa rakhnaa ye zindagi baDi mushkil se raam hoti hai kabhi mile to mohabbat se raabta rakhnaa tiraa suluk ho aisaa to kaise mumkin hai shahad zabaan pe to lahje mein shukriya rakhnaa main be-niyaaz mujhe kyaa gharaz natije se miraa to kaam hai bas apnaa muddaaa rakhnaa jahaan shikast ho aur vaapsi ki khvaahish bhi us ek pal ko mire naam se bachaa rakhnaa"

"main us ki aankh mein aansu na dekh paaungaa vo ek buund bhi royaa to Duub jaaungaa bahaar aae to shaayad vo bhuul jaae mujhe main apne sahn mein paudaa magar lagaaungaa vo jis ko zakhm mire yaad karte rahte hain usi ko DhunD ke phir zindagi mein laaungaa vo meri subh kaa suraj bane bane na bane main us ki shab mein sitaaron saa jagmagaaungaa ab apne aap se ik zid si ho gai hai mujhe main zakhm khaaungaa taDpungaa muskuraaungaa main jis ki zaat se kuchh mo'tabar saa lagtaa huun usi ke haq mein du'aaon ke dar sajaaungaa miraa vujud 'ajab pattharon ki zad par hai agar main sar na jhukaaun to TuuT jaaungaa main jaantaa huun tujhe meri shaam yaad nahin main intizaar ki sham'ein magar jalaaungaa miri giraft mein jugnu bhi aa nahin paate main us ke vaaste taare kahaan se laaungaa"

"siyaah shab mein vo chaand jaisaa sulagte din mein sabaa ho jaise qarib rah kar bhi duur rahnaa muqaddaron kaa likhaa ho jaise ghazab ki garmi thi jal gayaa sab magar ye mahsus ho rahaa hai ki khvaahishon kaa ye zard jangal kahin kahin pe haraa ho jaise hai ab bhi saanson kaa aanaa jaanaa hai ab bhi raushan nigaah meri ye zindagi jo main ji rahaa huun kisi ke dil ki duaa ho jaise badan sanbhaale bhaTak rahaa huun main be-jihat aasmaan ke niche zamin nahin hai kahin bhi shaayad safar khalaa-dar-khalaa ho jaise ye kis ko paane ki justuju thi ki har talab main ne girvi rakh di ab apnaa sab kuchh main haar baiThaa ye zindagi hi juaa ho jaise ajiib hai dil kaa ye diyaa bhi havaa chale maah-o-saal guzre mujhe ye mahsus ho rahaa hai abhi abhi kuchh bujhaa ho jaise"