Ghazal

"ruup ke paanv chumne vaale sun le meri baani phuul ki Daali bahut hi unchi tu hai bahtaa paani sondhi sondhi khushbu ke bahte hain shital jharne kheton par lahraataa hai jab meraa aanchal dhaani tu meraa aadarsh suhaanaa main sapnon ki Daali hariyaali dhun teraa meraa daulat aani-jaani chaand se maathe par hain gahri soch ki tiin lakirein bhuul gai rasta in bhul-bhulayyon mein ik raani phail gayaa hai qarya qarya teraa rang sunahraa tu hai meraa ruup saveraa main huun shaam suhaani bai-raagi ke ruup mein mere dar par aane vaale tere dil ki dhaDkan lagti hai jaani-pahchaani kitni unchi priit hai teri jantaa ke rakhvaale shakti kaa parchaar karegi teri prem-divaani"

"har kaasa-e-dil kaif se sarshaar bahut hai maail-ba-karam koi tarah-daar bahut hai kab satvat-e-asbaab ki hai dil ko tamannaa ham ahl-e-tariqat ko to pindaar bahut hai ye ahd ibaarat nahin shamshir-o-sinaan se shorida-saro! jurat-e-guftaar bahut hai kartaa hai lahu dil ko har ik harf-e-tasalli kahne ko to yuun qurbat-e-gham-khvaar bahut hai har-chand rasaai mein nahin fasl-e-bahaaraan arbaab-e-junun daaman-e-dildaar bahut hai honTon se ho maanus agar haq to junun ko ik naara-e-mansur sar-e-daar bahut hai"

"har chand zakhm zakhm darida-badan rahe gul-rang teri yaad ke sab pairahan rahe dekhaa tujhe to rang pas-e-rang thi nazar ye silsile bhi dil ke chaman-dar-chaman rahe pahron tasavvuraat ki mahfil saji rahi pahron tire khayaal se mahv-e-sukhan rahe zauq-e-junun pe tang rahin dil ki vusatein kis dasht ki talaash mein shorida-tan rahe har chand thiin khamosh mire dil ki dhaDkanein divaar-o-dar ko yaad tire sab sukhan rahe"

"charaagh-e-fikr jalaayaa hai raat bhar ham ne aur us ke baad nikhaaraa rukh-e-sahar ham ne hamein shuur ne dhoke diye hain rah rah kar fareb khaae hain daanista beshtar ham ne sila khirad kaa zamaane mein jaam-e-zahr sahi nikhaar di hai magar azmat-e-bashar ham ne nazar ho daulat-e-har-do-jahaan pe kyaa maail sameT li hai bahut daulat-e-nazar ham ne sadaa-e-paa ki suni baaz-gasht hi har gaam talaash ki hai jahaan teri rahguzar ham ne nigaar-e-gul ne liyaa naam zer-e-lab teraa udaas chaand ko dekhaa pas-e-shajar ham ne"

"har nafas vaqf-e-aarzu kar ke kuchh bhi paayaa na justuju kar ke sau shagufe khilaa diye dil mein khanda-e-gul se guftugu kar ke muskuraataa hi kyuun na rahne do faaeda chaak-e-dil rafu kar ke kitne nau-khez-o-nau-damida phuul mar miTe khvaahish-e-numu kar ke ghairat-e-dil ne aah-e-sozaan ko rakh diyaa surma-e-gulu kar ke"

"dil par gahraa naqsh hai saathi laakh tiri daanaai kaa saat samundar bhi to na paaein raaz miri gahraai kaa chashma-e-khun mein Duub gai baaraat suhaane taaron ki bojhal palkon par gahnaa yaa chaand miri tanhaai kaa jhuum rahe hain kaale baadal daras ki pyaasi aankhon mein kaajal ban kar phail gayaa hai daagh miri rusvaai kaa kitnaa hai aanand tire is dhime dhime lahje mein tere dhiraj se nikhraa hai rang miri raanaai kaa mere dil se puchhe koi qadr ubharte suraj ki meri aankh se dekhe koi ruup mire saudaai kaa sandal jaisi rangat par qurbaan sunahri dhuup karun raushan maathe par main vaarun saaraa husn khudaai kaa meraa bikhraa bikhraa tan-man simaT gayaa kisi chaahat se jaan gai huun bhed main teri baahon ki giraai kaa"

"saanjh savere panchhi gaaein le kar teraa naam Daali Daali par hai teri yaadon ke bisraam bichhDaa saathi DhunDh rahi hai gunjon ki ik Daar bhige bhige nain uThaae dekh rahi hai shaam miThi niind mein Duube gaanv bujh gae saare diip birhaa ke maaron kaa sukh ke sapnon se kyaa kaam chhoD shikaari apni ghaatein badal gayaa sansaar uD jaaeinge ab to panchhi le kar teraa daam aankhon par palkon kaa saajan kab hotaa hai bojh duur se aae ho tum nain biich karo aaraam"

"kab dil ke zakhm chaaragaron se rafu hue jo haath dil ki samt baDhe sab lahu hue shikve hue ki jaur hue sab hue tamaam vo husn-e-ittifaaq se jab ru-ba-ru hue jis ke sabab har ek sukhan-fahm hai khafaa muddat hui hai aap se vo guftugu hue kiije talaash tark-e-tamannaa ki suratein guzraa hai ik zamaana jigar ko lahu hue shorish hai ek mauj-e-talaatum ki tham gai shorida-sar zamaane ki jab aabru hue nikle jo manzilon ki tamannaa mein kho gae jo sang-e-dar pe tere jhuke surakh-ru hue"

"talaash karti hai tujh ko miri nazar har su jamaal-e-ruh mire dil ki raushni hai tu ye kis ki yaad ye kis kaa khayaal aayaa hai mahak mahak hai tajalli kiran kiran khushbu sulag sulag ke sar-e-shaakh bujh gaiin kaliyaan mire badan mein thaa khvaabida jin kaa zauq-e-numu miri nigaah mein jalve ye kis sahar ke hain ki daagh daagh nae aaftaab kaa hai lahu"

"mutarannim hai miri ruuh mein yuun teri sadaa aabshaaron ki sukun-rez ravaani jaise nur-o-nikhat mein nahaayaa huaa vo teraa kalaam rud-e-kausar kaa chamaktaa huaa paani jaise meri palkon pe hain yuun gauhar-e-shabnam ghaltaan mere honTon pe ho phulon ki kahaani jaise mere saanson mein machalti hai hinaa ki khushbu teri nau-khez mohabbat ki nishaani jaise kitnaa khush-rang hai maasum tabassum teraa muskuraati ho bahaaron ki javaani jaise bas gayaa mere tasavvur mein hayulaa teraa zehn-e-shaair mein koi yaad suhaani jaise dil ke aangan mein ubhartaa hai tiraa aks-e-jamil chaandni-raat mein ho raat ki raani jaise"

"nil-gagan par surkh parindon ki Daaron ke sang badli ban kar uDti jaae meri shokh umang komal kaliyon jaisaa meraa paak pavitra sarir pavan ke chhune se uD jaataa hai chehre kaa rang sapnon ki Daali par chamkaa ek sunahraa paat chaDhtaa suraj dekh ke jis kaa ruup huaa hai dang jalte bujhte phulon se utri khushbu ki raakh dho kar aag jo us ne dekhaa angaaron kaa rang taane de kar log lagaate hain kyuun aag mein aag basti vaale kyuun karte hain bairaagan ko tang"

"rang-birange phulon jaisi meri chanchal aas meri aas kaa ruup manohar piritam ko hai raas chupke chupke kyaa kahte hain tujh se dhaan ke khet bol ri nirmal nirmal nadiyaa kyuun hai chaand udaas sur-saagar jaise gahre hain mere kavi ke nain dekh sakhi panghaT par aayaa kaun bujhaane pyaas nuur ke taDke main ne dekhi pankhuDiyon par os taaron ke moti chunti hai saari raat kapaas saanjh-savere nainon mein lahraae us kaa ruup mere sapnon kaa rakhvaalaa duur rahe yaa paas"

"hama-tan jalvaa-fishaan maah-o-charaaghaan ki tarah kaun aayaa dil-e-pur-shauq mein mehmaan ki tarah guunj uThi gham-kada-e-ruh mein us ki aavaaz khvaab mein bahte hue chashma-e-irfaan ki tarah zehn-e-fankaar mein maanind-e-shuur-e-naghma safha-e-dil pe hai vo nazm ke unvaan ki tarah zau-fishaan mere sanam-khaana-e-afkaar mein hai lab-e-maasum koi laal-e-badakhshaan ki tarah ahrman ban ke taaaqub mein rahi zulmat-e-shab chhup gayaa koi miri ruuh mein yazdaan ki tarah barhana-paa-o-saraasima thi tauqir-e-bashar vo mire saath rahaa azmat-e-insaan ki tarah mizha aaluda-ba-khun chashm-e-tamannaa khun-baar sina-e-dahr mein huun zakhm-e-numaayaan ki tarah ai mire ham-dam-e-dil-gir duaa de mujh ko us ke qadmon pe rahun shaakh-e-gul-afshaan ki tarah jal uThi sham-e-tamannaa sar-e-mehraab-e-visaal kaun aataa hai ye khurshid-e-farozaan ki tarah"