Ghazal

"raah mein meri agar aae to mar jaaeinge aap kyaa mujhe yuun hi nazar-andaaz kar jaaeinge aap ek pal aasudgi kaa ek lamha ishq kaa mujh se ham-aaghosh hote hi nikhar jaaeinge aap sath par mujh ko chhalakne ki na daavat dijiye ek qatra bhi agar Tapkaa to bhar jaaeinge aap ik adaa maasumiyat aur ek tohmat maasiyat kab talak bachte raheinge ham kidhar jaaeinge aap bad-shuguni ki alaamat pesh-khema maut kaa dekhiye ham jaan de deinge agar jaaeinge aap qabr jaisi naa-pasandida jagah bhi 'irtizaa' dil kabhi hargiz na chaahegaa magar jaaeinge aap"

"tumhaare murgh-zaar par mire mazaar par kabhi kabhi na harf aa sakaa bhari bahaar par kabhi duhaai tum ko ik vasi' aur gahri jhiil ki chale bhi aao aansuon ki rud-baar par kabhi kahaan se kijiye bhalaa shuru' apni zaat ko ki phir kahin na ruk sake ye ikhtisaar par kabhi jo ho sake to ek pal zaraa 'aqab-numaa mein dekh ki aisi aankh thi kisi ki teri car par kabhi bataae de rahaa huun main abhi se ek baat ko kiyaa hai ghaur aap ne khudaa ki maar par kabhi na sirf meraa qatl hi kiyaa mujhe miTaa diyaa ki meri nasl mein koi chaDhe na daar par kabhi hamaaraa kyaa hai hausla bhi haar dein to kyaa 'ajab ki bas chalaa na jabr par na ikhtiyaar par kabhi jue mein jiit haar ke sivaa to kuchh nahin 'nishaat' isi mein jiit hai tiri ki soch haar par kabhi"

"afsurda bahut hai dil-e-naakaam bahut hai kaT jaae agar khair se ye shaam bahut hai dard-e-dil-e-betaab kaa socho na mudaavaa yaaro mujhe is dard mein aaraam bahut hai hamraah mire tujh ko kisi ne nahin dekhaa kahne ko tire saath miraa naam bahut hai sochaa huaa puuraa kabhi hone nahin detaa ye vaqt jo is kaam mein badnaam bahut hai kuchh karne ki zahmat na karein aap gavaaraa Dhaane ko sitam gardish-e-ayyaam bahut hai har shakhs ko haq hai ki har ik shai ko vo jaane kyaa chiiz bahut khaas hai kyaa 'aam bahut hai maa'ni nahin ban paDte kabhi shor-o-shaghaf ke daldal ki tarah dil mein to kohraam bahut hai sahraa mein khabar-daar abhi qais na bannaa ai ahl-e-junun jazb-e-darun khaam bahut hai sunte hain vahi asl mein shaa'ir hai 'nishaate' mashhur bahut hai kahin gumnaam bahut hai"

"ghar se daftar aur phir daftar se ghar karti hui chal rahi hai rail paTri par safar karti hui ye jo mere aasmaan par chhaai kaali raat hai ye mujhe lagti nahin hargiz sahar karti hui har qadam par main laraztaa kaanptaa dam toDtaa 'umr saare kaam be-khauf-o-khatar karti hui ji rahaa huun be-khabar behosh gird-o-pesh se jis tarah ik bheD revaD mein safar karti hui shaa'iri hai TuuTe shishe kaale kaaghaz kaa adab be-hisi ki soch qissa mukhtasar karti hui tez baarish mein umanDte baadalon ki ghan-garaj vaadiyon mein tairti jhilon ko tar karti hui mere aage kyon kisi kaa jal nahin saktaa charaagh kyon havaa chalti nahin mujh par asar karti hui zindagi piiri faqiri shaa'iri surat-gari zindagi ik vaishyaa bhi raat bhar karti hui main kahaan paataa suraagh-e-'aish-o-aasaaish 'nishaat' mere aage meri basti thi basar karti hui"

"na raas aai agar hangaama-aaraai to kyaa hogaa kisi ki ho gai meri ye tanhaai to kyaa hogaa main us ki sarkashi ko dekhtaa huun aur kuDhtaa huun chaTaanon se agar ye mauj Takraai to kyaa hogaa mire baare mein ye ehsaas tum ko ho chukaa hogaa agar is shakhs ko zanjir pahnaai to kyaa hogaa yahaan main ajnabi huun aur sab zi-haisiyat insaan madad ki peshkash bil-farz Thukraai to kyaa hogaa mire lahje mein ghabraahaT kaa 'unsur DhunDne vaalo isi mein kho gai saari tavaanaai to kyaa hogaa miloge tum to bharraae hue lahje mein puchhungaa mukammal ho chukegi meri rusvaai to kyaa hogaa misaalein do magar naa-qaabil-e-tardid hon aisi 'alaamat isti'aare ke na kaam aai to kyaa hogaa 'nishaate' ye mohabbat aur nafrat khel hain donon bane ik dusre ke ham tamaashaai to kyaa hogaa"

"baazaar mein bhi garmi-e-baazaar kyon nahin dekheinge log aaj kaa akhbaar kyon nahin kahte the aap ek hi jaise hain aap ham main qaid huun to aap giraftaar kyon nahin parvaa na ki usul-parasti ke saamne vo yaar kyon nahin hai main 'ayyaar kyon nahin nargis ke phuul mere janaaze pe Daal ke kahte ho kyon pasand kaa izhaar kyon nahin qadmon se ab to samt kaa ehsaas bhi gayaa rukti nahin hai vaqt ki raftaar kyon nahin haalaat ko mazid bigaaDaa to faaeda kyaa kar rahe hain aap khabar-daar kyon nahin ik dusre ke khuun ke pyaase to hain 'nashaat' koi kisi kaa munis-o-gham-khvaar kyon nahin"

"shaamil kahaan huaa hai pasine mein khuun abhi is zindagi se haath uThaa luun to kyon abhi naazil hain sab balaaein magar pur-sukun abhi shaayad havaa mein phail sake bu-e-khun abhi miTtaa hai koi aur to bantaa hai koi aur parcham hai sar-buland abhi sar-nigun abhi bas yuun lage ki jaise huaa hi nahin hai kuchh jam kar abhi na rouun na khul kar hansun abhi raste mein koi saanp uchhal kar na kaaT le sahraa se dekh-bhaal ke guzre junun abhi aate hain yaad jaise ki sab kuchh ho saamne TuuTaa nahin hai biite dinon kaa fusun abhi kahne lagaa huun khud se main jumle 'ajib se raahon mein sab se bach ke guzartaa rahun abhi dukh to bahut huaa hai tujhe dekh kar 'nishaat' bad-qismati se main bhi musibat mein huun abhi"

"kitnon ki jaan Daal di khatron ke jaal mein ik baat aap kah to gae ishti'aal mein jaise kai parind kisi ek jaal mein is haal mein hai zindagi aise vabaal mein allaah teri raah pe qaaem rahun sadaa jaise qutub-numaa ki sui hai shumaal mein bas ek she'r par ye tamaashaa ye haae-hu ye haal hai to aag lagaa dungaa hall mein pichhe paDaa huun ek achhute khayaal ke ai raat meri niind ko rakhnaa rumaal mein ye peD ye pahaaD ye suraj ye aabshaar kyaa kyaa kamaal pesh kiye hain misaal mein kaise usuul kaise maqaasid kahaan ki fikr chalte hain sar jhukaae hue bheD-chaal mein suraj ghurub hone lagaa vaqt-e-shaam hai manzar ye khush-gavaar bahut hai zavaal mein be-sud be-nashaat tajarrud hai 'irtizaa' shaadi kaa vasf aur hi kuchh hai visaal mein"

"tumhaaraa aaj meraa kal nahin hai magar maathe pe koi bal nahin hai vo meri zindagi kaa aakhiri din mu'ayyan hai magar kal-val nahin hai kabhi hargiz bhi uchhlegi na kichaD pahaaDon ke tale daldal nahin hai mohabbat mein kami aane na paae chaTaai ghar mein hai kambal nahin hai zamaana ho gayaa fariyaad karte ki dil mein dard hai halchal nahin hai siqa hazraat kahte hain ki insaan qarib-ul-marg hai paagal nahin hai buraa ho aakhir-e-shab mai-kashi kaa namaaz-e-saa'at-e-avval nahin hai zamaana hai agar ye haath aa jaae ye ik lamha nahin ik pal nahin hai milegi manzil-e-maqsud shaayad nazar se raasta ojhal nahin hai ye kahte sharm aati hai 'nishaate' ye meraa shahr hai maqtal nahin hai"

"jo qatl ho rahaa thaa koi naa-tavaan thaa chup-chaap dekhtaa thaa khaDaa hukmraan thaa ye daur jis kaa dard bayaan kar rahaa huun main ik tiir zulm kaa thaa sitam ki kamaan thaa mere liye 'ajib si duniyaa thi soch ki jis mein khudaa ke vaaste pukhta makaan thaa donon ke darmiyaan khalaa fasl-o-nasl kaa 'aatish' agar javaan thaa main naujavaan thaa mere liye ghazal nahin machhli ki aankh thi har she'r is shikaar mein 'arjun' kaa baan thaa raghbat hai us ko khet mein maujud ghaas se phir khud-kushi ne maar diyaa phir kisaan thaa markaz hi 'irtazaa' se judaa ho sakaa 'nishaat' jis kaa vo yaar-e-ghaar takhallus thaa jaan thaa"

"ai khudaa tu bhi yahaan aae to jaae na bane ab kahin aur koi aisi saraae na bane vaqt ko apni 'imaarat kaa bharam rakhnaa hai aisi divaar uThaa di hai ki Dhaae na bane raushni malgaji aur dhund bahut gahri thi lahriye aaj tiri yaad ke saae na bane meraa uslub isi baat ki koshish to nahin mere baare mein kisi ki koi raae na bane chhoD kar ham ko zamaane kaa nikalnaa dekho dil baDhe bhi to qadam ham se baDhaae na bane zindagi aisi havaa-khvaah-e-havas hai ki ajal laakh chaahe ki ise apnaa banaae na bane kuchh hi ash'aar hain 'ghaalib' ke nahin jin kaa javaab baaqi she'ron ke liye sharh uThaae na bane koi chaahe ki use DhunDne niklein sab log us taraf jaae jidhar khalq se jaae na bane"

"is vaqt kuchh 'ajib ghazal ki uDaan hai kaisi abhi zamin abhi aasmaan hai kyaa dekhtaa huun puchh lo mujh se vagarna phir divaar huun ki aankh nahin sirf kaan hai neki badi ke donon farishte hain bad-havaas dar jhonpaDe kaa band khulaa aasmaan hai isbaat kuchh to mahr-e-mohabbat kaa chaahiye honTon pe ab bhi us ke labon kaa nishaan hai mumkin hai kal haveli nazar aae yaa khanDar jab tak havaa ki zad pe Tikaa hai makaan hai tanqid kaa bhi toD ke dekhaa hai password jo ham-navaa hai us pe bahut mehrbaan hai ik dost haath dho ke hai pichhe paDaa huaa kirdaar-kush nahin hai magar bad-gumaan hai"

"idhar udhar ke havaalon se mat Daraao mujhe saDak pe aao samundar mein aazmaao mujhe miraa vajud agar raaste mein haail hai tum apni raah nikaalo phalaang jaao mujhe sivaae mere nahin koi jaarehaana qadam main ik haqir piyaada sahi baDhaao mujhe isi mein meri tumhaari najaat muzmar hai ki main banaaun tumhein aur tum miTaao mujhe guzarne vaalaa har ik lamha meraa qaatil hai khudaa ke vaaste maaro ise bachaao mujhe jami hui hain miri laash par nigaahein kyuun main koi aakhiri khvaahish nahin dabaao mujhe khushi manaate ho kahte ho mujh ko iid 'nishaat' magar main khuun ki holi bhi huun jalaao mujhe"

"yahaan se vaapsi kaa marhala kitnaa giraan niklaa bahut kuchh ham ne joDaa aur sab kuchh raaegaan niklaa haraa thaa zakhm vaalid kaa magar ye maan ko kyaa sujhi zamin pairon se nikli thi ki sar se aasmaan niklaa baDaa naazuk baDi aa'saab-shikni kaa zamaana hai musalsal koshishon ke baa'd munh se naagahaan niklaa mujhe sab dekhte hi rah gae kuchh kar nahin paae 'ajab andaaz se main bhi to un ke darmiyaan niklaa masaail ek sab ke sab ki zimmedaariyaan yaksaan jo sach puchho to duniyaa ek kunbe kaa makaan niklaa zamin par raat din chhoTe baDe hote hue dekhe falak par har sitaara vaqt par niklaa javaan niklaa kabhi to rote rote meri ghigghi bandh jaati hai zamaana zindagi ke 'aish kaa andhaa kuaan niklaa huaa majbur main bhi 'irtizaa' aahista chalne par ki meraa har qadam ik bebasi ki daastaan niklaa"

"dam nahin hai zabt kaa yaaraa nahin sabr karne ke sivaa chaaraa nahin haath yuun paDtaa hai meraa jeb mein juun qadam daldal pe dobaara nahin maar Daalaa ghalba-e-jazbaat ne main gham-o-aalaam se haaraa nahin aap mar jaaeinge marte maarte marne vaalaa nafs-e-ammaara nahin 'umr be-masraf kaTi hai aur ab aaegaa ye din bhi dobaara nahin Taap par pahunchaa huaa hai nang-pan aur kahin se huun kaa hunkaaraa nahin us ko aasaani se maaraa jaaegaa Thok kar kham jis ne lalkaaraa nahin shaa'iri ki top daaghi hai 'nishaat' aur koi tiir to maaraa nahin"

"kyaa khabar us ko jo baiThaa hai nishaane vaalaa maarne vaale se behtar hai bachaane vaalaa chand lamhon ki khamoshi ko gavaaraa kar lo varna ye vaqt bahut kuchh hai sunaane vaalaa dil ki gahraai mein utre to utar jaane do mustaqil chehre pe nazron ko jamaane vaalaa mubtalaa huun main kisi kashmakash-e-zehni mein yaa'ni kuchh kahne na sunne na sunaane vaalaa soch dimak ki tarah chaaT rahi hai mujh ko aur main huun ki isi kaam mein aane vaalaa kis tarah chain se baiThegaa banaaegaa makaan ghar kahin jaltaa huaa chhoD ke aane vaalaa dil kabhi Dubtaa mahsus kiyaa hai tum ne tez dhaare ki tarah saath bahaane vaalaa tum to zakhmon pe namak khuub chhiDakte ho 'nishaat' main faqat ghusse mein honTon ko chabaane vaalaa"

"laai miri junun ki manzil kidhar mujhe hairat se dekhte hain mire ham-safar mujhe aayaa huaa kahin se koi ajnabi huun main dauDe hai kaaT khaane ko meraa hi ghar mujhe yaadash-ba-khair gham se subuk-dosh kar gai vo zindagi jo baar rahi 'umr bhar mujhe vo jalva-gar jahaan ke har juzv-o-kul mein hai ye aur baat hai ki na aae nazar mujhe kyaa jaane husn-o-'ishq hain kis marhale mein ab un ko miri khabar hai na un ki khabar mujhe maqtal mein jaa ghusun main anal-‘ishq chikhtaa shaanon pe ab to bojh saa lagtaa hai sar mujhe ab tak to meraa kaam bhi puuraa nahin huaa be-vaqt maar Daalegaa marne kaa Dar mujhe thaa koi gham-gusaar dam-e-marg ai 'nishaat' rote rahe sukun se divaar-o-dar mujhe"

"mutmain huun main agar hai qadr mere kaam ki shaa'iri mein kyaa zarurat hai kisi in'aam ki phir bhi un ko jaane kyaa kyaa mil gayaa hai be-hisaab koi koshish ki na mehnat hi baraae-naam ki thak gayaa huun yaa koi lambaa safar darpesh hai kuchh dinon se fikr laahaq hai mujhe aaraam ki vo khudaa hai jo bhi ji mein aae kartaa hai miyaan ibtidaa hi kuchh nahin to fikr kyaa anjaam ki kis qadar nuqsaan uThaayaa soch kar rotaa huun main kuchh dinon jo 'umr apni mubtalaa-e-jaam ki kaise kaise masale lahraa rahe hain zehn mein subh se tasvir banti jaa rahi hai shaam ki sab se achchhaa hai yahi mazhab nahin gardaante shaadiyaan karne ko lete hain madad islaam ki naam mein kuchh bhi nahin rakkhaa ghalat hai 'irtizaa' kis qadar 'izzat hai duniyaa mein mohammad naam ki"

"kyaa jaane kis khayaal mein kis ehtimaal mein do din mile the baanT diye maah-o-saal mein suraj ghurub hone lagaa dekhte raho manzar ye khush-gavaar bahut hai zavaal mein bas ek she'r par ye tamaashaa ye haao-hu ye haal hai to aag lagaa dungaa hall mein gardan jhukaae saath liye be-hisi ki soch shaamil na ho sakungaa kisi bheD-chaal mein shaayad isi kaa naam global village hai jaise kai parind kisi ek jaal mein shaadi se pahle jaise valima kisi kaa ho is vaqt phans gayaa huun kuchh aise vabaal mein ye peD ye pahaaD ye paude ye phuul phal kyaa kyaa kamaal pesh hue hain misaal mein be-shak khudaa kaa fazl-o-karam hai 'nishaat' par hai munfarid kalaam mein yaktaa kamaal mein"

"dikhaai detaa hai ab kuchh dikhaai detaa hai is intizaar mein kab kuchh dikhaai detaa hai saraab hai ki samundar hubaab hai ki guhar kahaan hain tishna-ba-lab kuchh dikhaai detaa hai khushi vujud mein utri hui si lagti hai khuli ho aankh to sab kuchh dikhaai detaa hai mire bayaan ke khaalis-tarin lafzon mein zabaan kaa lams ghazab kuchh dikhaai detaa hai ye meraa jism zamin par hai fan bulandi par kisi ko is kaa sabab kuchh dikhaai detaa hai kiyaa hai ghaur to pahunche hain is natije par ki apnaa haal 'ajab kuchh dikhaai detaa hai kiye-karaae pe paani na pher jaae ghurur ki baat kahne kaa Dhab kuchh dikhaai detaa hai nazar pe naaz buri chiiz to nahin hai 'nishaat' zamaana lagtaa hai tab kuchh dikhaai detaa hai"

"ab to le de ke yahi ek hunar meraa hai aasmaan had hai to uThtaa huaa sar meraa hai iinT se iinT jo bajti si nazar aae kahin vo 'imaarat hi samajh lijiye ghar meraa hai ye bayaabaan ye sahraa ye samundar ye saDak sab ko rad kar ke guzarne kaa safar meraa hai ye fasaadaat mire khuun ke pyaase hain faqat jo badan bhi hai kahin khuun mein tar meraa hai ai khudaa ‘aalam-e-aflaak kaa ahvaal sunaa is zamin par to sunaa hai ki asar meraa hai bebasi ashk bahaati hai miri mayyat par dhaD kahin kaT ke giraa hai kahin sar meraa hai kyaa yahi hai miri maa'sum mohabbat kaa gunaah ashk bhi mere garebaan bhi tar meraa hai 'irtizaa' aise bhi jumle the kahin tum ne sune laash ye mere pati ki ye pisar meraa hai"

"vaqt ki shatranj par ye Dhaai ghar aataa nahin sasti shohrat ke liye koi hunar aataa nahin diin duniyaa zindagi ke baab mein har aadmi be-khabar jaataa nahin aur baa-khabar aataa nahin apne apne doston yaaron vafaadaaron ki fikr dusron ke kaam mein koi bashar aataa nahin ab kahaan le jaaein apni ‘izzat-o-naamus ko kaun saa vo raasta hai jis mein Dar aataa nahin jaan ki baazi lagaane kaa zamaana hai magar kyaa kiyaa jaae hatheli par ye sar aataa nahin ik se ik khunkhaar haibatnaak machhli maujzan jhiil mein khush hai samundar mein magar aataa nahin baiThe baiThe baandh lete hain havaa bhi she'r mein shaa'iron ko baadbaani kaa hunar aataa nahin tauba kar li yaa qasam de di kisi ne 'irtizaa' kyaa huaa ab mai-kade mein jaa ke mar aataa nahin"

"pas-manzaron ke saamne manzar hi rah na jaaein sinon ke raaz sinon ke andar hi rah na jaaein kahne ki baat aur hai karne ki baat aur yaani ye soch lijiye kah kar hi rah na jaaein dekho vahi to vaqt nahin aa rahaa hai phir phir aaj apne saath bahattar hi rah na jaaein ik dusre ko ye jo haDap kar rahe hain ham socho zamin na ho to samundar hi rah na jaaein is baar gir paDi hain chhatein bhi makaan ki is baar haath haath pe dhar kar hi rah na jaaein bhaai duaa kaa shish-mahal bhi hai koi chiiz haathon mein bad-duaaon ke patthar hi rah na jaaein kuchh kar ke ai 'nishaat' dikhaao vagarna phir afraasiyaab-o-khizr-o-sikandar hi rah na jaaein"