Ghazal

"khayaal-e-tark-e-ulfat ham-nashino aa hi jaataa hai vafur-e-be-dili mein aadmi ghabraa hi jaataa hai tabaahi ki ghaDi shaayad zamaane par nahin aai abhi apne kiye par aadmi sharmaa hi jaataa hai nigaah-e-dost ke aage sipar laanaa hai laa-haasil ye tir-e-nim-kash qalb o jigar barmaa hi jaataa hai nazar aataa nahin jis ko hujum-e-shauq mein kuchh bhi fareb-e-rahnumaa aksar vo rah-rau khaa hi jaataa hai nahin narmak-khiraami kaarvaan ki be-sabab 'kausar' khamoshi se jo uThtaa hai vo baadal chhaa hi jaataa hai"

"kis qayaamat kaa na jaane vo andheraa hogaa jis ne khurshid-e-jahaan-taab ko gheraa hogaa haan isi parda-e-zulmaat se ubhregi sahar panja-e-shab se kahaan qaid saveraa hogaa kis se us husn kaa afsaana kahun jis ke liye main ne sochaa bhi nahin thaa kabhi meraa hogaa raat bhar di hai dar-e-dil pe kisi ne dastak vo ye kahtaa hai nahin koi luTeraa hogaa aaj ji bhar ke use dekh le 'kausar' sar-e-baam jaane un galiyon mein phir kab tiraa pheraa hogaa"

"main ne har gaam use avval o aakhir jaanaa lekin us ne mujhe lamhon kaa musaafir jaanaa main to thaa us ke chaman-zaar-e-mohabbat kaa asiir lekin us ne mujhe har shaakh kaa taair jaanaa us ne ikhlaas ke maare hue divaane ko ek aavaara o badnaam saa shaaer jaanaa dar-haqiqat yahi eazaaz bahut hai 'kausar' do ghaDi us ne hamein apnaa ba-zaahir jaanaa"

"kyaa haqiqat mein nahin the ye sazaa-vaar tire kyuun shifaa-yaab na ho paae ye bimaar tire abr kyaa kyaa na inaayaat ke barse lekin jaan-ba-lab aaj bhi hain tishna-e-didaar tire hai sataaish ki tamannaa na sile ki parvaa kis qadar saada-tabiat hain parastaar tire tujh se karte hain taqaazaa tiri tasviron kaa ham haqiqat mein agarche hain talabgaar tire mar gayaa kyaa tiraa shaaer tiraa 'kausar'-niyaazi suune suune se hain kyuun kucha o baazaar tire"

"jab ziist ke mushkil lamhon mein apne bhi kinaaraa karte us vaqt bhi ham ai ahl-e-jahaan hans hans ke guzaaraa karte hain sayyaad ne tere asiron ko aakhir ye kah kar chhoD diyaa ye log qafas mein rah kar bhi gulshan kaa nazaaraa karte hain jazbaat mein aa kar marnaa to mushkil si koi mushkil hi nahin ai jaan-e-jahaan ham tere liye jiinaa bhi gavaaraa karte hain manjdhaar mein naav Duub gai to maujon se aavaaz aai dariyaa-e-mohabbat se 'kausar' yuun paar utaaraa karte hain"

"kucha-e-yaar mein gadaai ki ik yahi kaam ki kamaai ki haae vo intizaar ke lamhe aah ye saaatein judaai ki ham ne husn-e-adaa kahaa is ko jab kabhi tu ne kaj-adaai ki dosto dekh bhaal kar chalnaa sakht manzil hai aashnaai ki shaikh-saahab khudaa hi ban baiThe hai buri chaaT paarsaai ki rang-e-'hasrat' mein aaj ai 'kausar' khuub tu ne ghazal-saraai ki"

"zamin ki god mein baiThaa humak rahaa huun main falak pe chaand ki jaanib lapak rahaa huun main nahin hai apni zamin ki koi khabar lekin khalaa mein duur kisi shai ko tak rahaa huun main nahaa gayaa huun khud apne lahu mein sar-taa-paa junun ki aag mein lekin dahak rahaa huun main agarche zulmat-e-shab mein kami nahin aai misaal-e-maah-e-darakhshaan chamak rahaa huun main har ek samt badalti ruton kaa maatam hai shagufta ghunche ki surat chaTak rahaa huun main parakhne vaale mujhe dekh is tarah bhi zaraa agar hai khoT to kaise chamak rahaa huun main giri hi jaati hai divaar-e-girya har lahza kisi ki aankh se shaayad Dhalak rahaa huun main tamaam shahr ne didaar kar liyaa 'kausar' ab apni laash ke chehre ko Dhak rahaa huun main"

"kabhi jo nikhat-e-zulf-e-nigaar aai hai fazaa-e-murda-e-dil mein bahaar aai hai zarur teri gali se guzar huaa hogaa ki aaj baad-e-sabaa be-qaraar aai hai koi dimaagh tasavvur bhi jin kaa kar na sake ye jaan-e-zaar vo lamhe guzaar aai hai tujhe kuchh us ki khabar bhi hai bhulne vaale kisi ko yaad teri baar baar aai hai khudaa-gavaah ki un ke firaaq mein 'kausar' jo saans aai hai vo sogvaar aai hai"

"khudaa nasib kare jis ko sohbatein meri na bhuul paae kabhi vo hikaayatein meri kahaan gae miri masruf saaaton ke rafiq sadaaein deti hain ab un ko fursatein meri tamaam shahr gurezaan hai aaj kal jaise kisi ke naam na lag jaaein tohmatein meri khudaa kaa shukr ki main khud-shanaas huun varna samajhtaa kaun pur-asraar aadatein meri main apni zaat ke sahraa mein kho gayaa 'kausar' miri nazar se bhi ojhal hain vusatein meri"

"ham dil ki tabaahi kaa ye saamaan na kareinge is ghar mein kisi aur ko mehmaan na kareinge ghabraa ke kabhi chaak girebaan na kareinge badnaam tujhe fasl-e-bahaaraan na kareinge mishal ko charaagh-e-tah-e-daamaan na kareinge jo daagh hain siine mein vo pinhaan na kareinge Takraaeinge tere liye har mauj-e-balaa se saahil pe khaDe shikva-e-tufaan na kareinge ai vo ki tiri yaad hai taskin-e-dil-o-jaan haalaat hamein kuchh bhi pareshaan na kareinge ye dard ki hai teri mohabbat ki amaanat mar jaaeinge is dard kaa darmaan na kareinge ai dost mohabbat ki nazaakat hai nazar mein ham tujh ko kisi taur pashimaan na kareinge dil mein hai tiri chaah to ai jaan-e-tamannaa ham aur kisi chiiz kaa armaan na kareinge"

"makDi ke jaalon mein kab se qaid hain raushan-daan mire haae kyaa socheinge ghar ko dekh ke kal mehmaan mire ab ke baras to dil ki zamin par aag falak se barsi hai fikr ki gandum ke daanon se khaali hain khaliyaan mire meri zabaan par maslahaton ke pahre hain to phir kyaa hai haq ke alam-bardaar hain ab bhi mazdur o dahqaan mire aaj hisaar-e-daar-o-rasan mein huun par aane vaalaa din shahr ki divaaron par chaspaan dekhegaa farmaan mire shakl-o-shabaahat mein be-shak kuchh farq zaraa saa thaa varna the to masihaa bhi insaan aur qaatil bhi insaan mire bar-sar-e-aam iqraar agar naa-mumkin hai to yunhi sahi kam-az-kam idraak to kar le gun be-shak mat maan mire kal 'kausar' mere aangan mein raqs-e-bahaaraan thaa lekin aaj taraste hain kaaghaz ke phulon ko gul-daan mire"

"be-sabab aaj aankh pur-nam hai jaane kis baat kaa mujhe gham hai phir koi ehtimaam-e-maatam hai mere siine mein dard kam kam hai ye taalluq hi mujh ko kyaa kam hai aap ke aastaan pe sar kham hai un ke kyuun ho ke rah gae 'kausar' bazm-e-ahbaab ham se barham hai"

"us ne har mashq-e-sitam ham pe ravaa rakkhi hai ham ne aavaaz bhi siine mein dabaa rakkhi hai qatl-gaahon mein lahu apnaa nichhaavar kar ke sham-e-insaaf ki lau ham ne baDhaa rakkhi hai kahin bikhri hain kitaabein kahin maile kapDe ghar ki haalat hi ajab ham ne banaa rakkhi hai apne vahshat-zada kamre ki ik almaari mein teri tasvir aqidat se sajaa rakkhi hai ham kisi baat kaa shikva na kareinge 'kausar' mohar honTon pe khamoshi ki lagaa rakkhi hai"

"baat qismat ki to kuchh ai dil-e-naakaam nahin apni taqsir hai ye gardish-e-ayyaam nahin ai masihaa kabhi tu bhi to use dekhne aa tere bimaar ko sunte hain ki aaraam nahin ek vo jin ke tasarruf mein hain sab mai-khaane ek ham jin ke liye durd-e-tah-e-jaam nahin mujh ko ye gham ki unhein dekhne vaale hain bahut un ko shikva ki yahaan zauq-e-nazar aam nahin safar-e-ishq mubaarak ho ki is mein 'kausar' gham-e-aaghaaz nahin khatra-e-anjaam nahin"

"teri zulfein tire rukhsaar tire lab mere jitne pahlu hain tire husn ke vo sab mere us se ab tark-e-mohabbat kaa gila kyaa maani mujh ko taslim ki atvaar the beDhab mere phir vahi chaand sar-e-shahr chaDhe to ai kaash us se raushan hon dar-o-baam bas ik shab mere jin kaa har lamha guzartaa thaa miri qurbat mein duur o nazdik nazar aate nahin ab mere mujh se katraa ke guzar jaate hain derina rafiq raaste dekhte hain sakht kaThin jab mere ab agar khul hi gae ho to chalo yunhi hi sahi varna tum dost to pahle bhi rahe kab mere kyuun mujhe shiddat-e-ehsaas ataa ki itni tujh se insaaf kaa taalib huun main ai rab mere khalq ki sang-zani kaa hai ye 'kausar' ehsaan tah mein jis ke gae sab husn o qubah dab mere"

"chand lamhon ke liye ek mulaaqaat rahi phir na vo tu na vo main aur na vo raat rahi kurra-e-arz ne dekhaa hi na thaa vo khurshid jis ki gardish mein shab o roz miri zaat rahi ab to har shakhs ujaalon mein khaDaa hai uryaan kaun si shakl pas-e-parda-e-zulmaat rahi sard-mehri mire lahje mein bhi hogi lekin tujh mein khud bhi to na pahli si koi baat rahi haal-e-dil us ko sunaa kar hai bahut khush 'kausar' lekin ab soch zaraa kyaa tiri auqaat rahi"

"girte hue jab main ne tiraa naam liyaa hai manzil ne vahin baDh ke mujhe thaam liyaa hai mai-khvaar to hai mohtasib-e-shahr ziyaada rindon ne yunhi muft mein ilzaam liyaa hai vo mil na sake yaad to hai un ki salaamat is yaad se bhi ham ne bahut kaam liyaa hai har marhala-e-gham mein mili is se tasalli har moD pe ghabraa ke tiraa naam liyaa hai tujh saa koi rahbar nahin ai duri-e-manzil ehsaan tiraa ham ne bahar-gaam liyaa hai ai shaikh dil-e-saaf yunhi to nahin miltaa ham ne asar-e-ru-e-dil-aaraam liyaa hai sajdon mein vo pahli se halaavat nahin 'kausar' jab se asar-e-gardish-e-ayyaam liyaa hai"